Read Termanu KELUARAN 11 Bible Online

KELUARAN 11 - Termanu bible

KELUARAN 11

¹MANETUALAIN, nafa'da Musa nae, “Neukose, Au fe soe esa seluk, tuni la'e manek Masir-ra no laun-nala. Basa ndia soona, neukose ana po'i emi la'o. Nakalenak, emi basa-basam-mala, neukose nanausi henik neme ia mai.

²Hu ndia de, kokolak moo leoina Israel-la; madenus fo loke lilopilas ma lilofulak, neme sila uma titia-tatain-nala mai.”

³MANETUALAIN, taon-na hataholi Masir-rala, ladale malole neu hataholi Israel-la. Ma basa manapaleta-la, ma laun Masir-ra lala'en-na, tao Musa da'di hataholi nanafe ha'da-holomata nanseli.

⁴Musa nafa'da manek-ka nae, “MANETUALAIN nafa'da nae leo ia, ‘Fafa'kama, fatila'da te, neukose Au la'ok feo dae Masir-ra.

⁵Basa anatou uluk manai dae Masir-ra, neukose mates, mulai neme mane Masir-ra anatou ulun-na mai, losa ata inak manapo'de gandum-mala anatou ulun-na. Basa bana-manu ana ulun-nala boeo, neukose mates.

⁶Nai basa dae Masir-ra lala'en-na, neukose hala kikii-makaleleuk nananamanenek, sama leo ana beita da'di nita fa, ma neukose ana ta da'di seluk so'on.

⁷Tehu, nai hataholi Israel-la dalek, nau hataholi, do bana-manu boe, neukose soe ndia, ta la'e fas. Soona neukose emi bubuluk, mae Au, MANETUALAIN, ta'da fe'e hataholi Masir-rala, neme hataholi Israel-la mai.’ ”

⁸Mate'en-na, Musa nafa'da nae, “Basa au Ama Maneng-nga, manapaletan-nala, neukose ala mai, fo ala sene-do'ok leu au matang-nga, ma loke fo ela au ma au leoinang-nga la'oela nusak ia. Basa ndia soona, neukose au la'o.” Boema Musa la'o ela manek-ka no namanasa nanseli.

⁹MANETUALAIN, nafa'da Musa nae, “Neukose, manek-ka ta taoafik neu o hala-kokolam fa, fo ela Au hapu tao manada'di beuk bauk-ka seluk, nai basa Masir lala'en-na.”

¹⁰Musa ma Harun tao basa manada'di beuk sila-la nai manek-ka matan, tehu MANETUALAIN tao-nan nalanga batu, nalosa ana ta nau po'i hataholi Israel-la la'oela nusan-na fa.