Read Termanu KELUARAN 12 Bible Online

KELUARAN 12 - Termanu bible

KELUARAN 12

¹ MANETUALAIN, kokolak no Musa ma Harun nai dae Masir-ra nae,

²“Tunga teuk soona, bulak ia da'di bula makasososak ba'eneu emi kalua meme Masir mai.

³Manduku-malosak paleta ia neu basa hataholi Israel-la lala'en-na mae: Nai bulak ia fain sanahulu soona, touk esan-na, muse ana helen-na bi'ilopoana esa, fo ela no uma isin-nala la'a.

⁴Metema, uma isi ndia lumanak, fo dodoo-nana, ta la'a basa bi'ilopoana esa paan-na fa, soona uma isi ndia, nafa'da uma titia-tatain manadeka noon-nana, fo bole la'a sama-sama bi'ilopoana ndia paan-na. Muse baba'e bi'ilopo ana ndia paan-na, nandaa no hataholi manana'ak-kala dede'un-nala.

⁵Emi bole hele bi'ilopo do bi'ihiik, tehu muse hele bi'i mane, besak-ka teuk esa, ma ta lu'u-la'ak fa.

⁶Emi muse pa'a mahelen losa bulak-ka fain sanahulu haa. Nai faik ndia le'donoso-na soona, basa hataholi Israel-la lala'e-na, muse do'do bi'ilopoana ndia.

⁷Muse lose daan faaanak neu uma fo sila la'a bi'ilopoana paan-na ndia, dii lelesun duas, ma netes manai lelesu-a lain.

⁸Le'odaek ndia boe, muse dala paan-na, fo la'an no aidoo makaheduk ma loti fo kamen ta pake laluteik fa.

⁹Muse dala la'iesak bi'ilopoana ndia no langan-na, ein-nala ma tei-aten. La'a paa nanadala basak ndia, boso la'a matak do nasu paa ndia nggelok.

¹⁰Boso ela faaanak boen losa fafaik; metema bei ela soona, muse hotu henin.

¹¹Nai lelek emi mi'a, emi muse pake-nggao memak, soaneu leo-la'o, pake ta'bueis ma ho'u aitete'ek. Emi muse mi'a lai-lai. Ndia nde feta Paskah soaneu fe ha'da-holomata neu Au, fo MANETUALAIN.

¹²Nai le'odaek ndia, neukose Au la'ok okofeo basa dae Masir-ra lala'en-na, fo Au taoisa anatou uluk-kala, nau hataholi do bana-manu boe. Neukose, Au huku basa lamatua daebafak manai Masir-ra, nanahu Au nde MANETUALAIN.

¹³Daak manai emi umam-ma lelesu-na, neukose ana da'di ta'du-tana neme uma fo emi mamana leleom-ma. Metema Au ita daak ndia soona, Au la'o seli emi, ma nai lelek Au huku Masir-ra, Au ta tao amopo-amate emi fa.

¹⁴ Emi muse tao faik ndia, da'di faik nasanene'dak, da'di leo fai malole ba'eneu MANETUALAIN. Tunga teuk, emi muse tao faik ndia da'di fai malole, neme bobongik leo bobongik neu.”

¹⁵MANETUALAIN, nafa'da nae, “Faik hitu dalen-na, emi ta bole mi'a loti fo kamen pake lauteik fa. Nai fai makasososak-ka, muse kalua heni basa laluteik-kala leme emi umam dale mai, nana metema nai faik hitu dalen-na, hataholi esa na'a loti fo kamen pake laluteik soona, hataholi ndia ta da'di Au anang so'on.

¹⁶Nai faik makasososan-na, ma fai ka hitun-na boe, emi muse makabubua, fo tao makaluku-makatele. Nai faik ndia dalen-na, emi ta bole tao tatao-nono'ik hata esa boen, ta'da fe'e emi paluu beek, soaneu do'de-nasu emi nana'a-nininum.

¹⁷Nai faik ndia, Au o la'iesak o leoinam-ma, kalua leme Masir mai. Hu ndia de, tunga teun, emi muse tao faik ndia da'di faik nasanene'dak, da'di neu fai malole, losa dodoon-na.

¹⁸Nai hataholi Yahudi-la bula ka esan-na, mulai fain sanahulu haa le'odaen-na, losa fain duahulu esa le'odaen-na, emi ta bole mi'a loti fo kamen pake laluteik fa. Nai faik hitu dalen-na ndia, emi muse kalua heni basa laluteik-kala leme emi umam dale mai. Hataholi Israel, do hataholi nusadea, nai lelek fai malole ndia la'ok, metema na'a loti fo kamen pake laluteik soona, hataholi ndia ta da'di Au anang so'on.”

¹⁹

²⁰

²¹Musa naloo basa maneleo Israel-la de nafa'das nae, “Meu leon-na, fo ho'u-ma bi'ilopoana esa soaneu emi uma isim-ma, ma soaneu feta Paskah.

²²Ho'i-ma na'u hisop puputuk esa, fo dopen leo bokol fo bi'ilopo ndia daa-na nai dalek-ka, fo losen neu emi umam-ma lelesun-na diin duas, ma neu netes manai lelesu-a lain. Ta bole emi hataholim esa boen, la'oela uman-na, losa fafaik fa.

²³ Nai lelek MANETUALAIN, la'ok okofeo nusak ia, fo Ana taonisa hataholi Masir-ra, neukose MANETUALAIN nita daak manai emi umam-ma lelesun-na diin duas, ma nai netes manai lelesu-a lain; soona neukose, Ana la'ok nakandoo, ma Ana ta fe Ata nusa so'dak fo maneni Mamates-sa loak ana masok emi umam-ma, fo ana taonisa emi fa.

²⁴Emi ma emi anam-mala, muse tunga paleta ia losa dodoon-na.

²⁵Metema emi masok nusak fo MANETUALAIN helu basan neu emi soona, emi muse tao feta ia.

²⁶Metema emi anam-mala latane lae, ‘Feta ia sosoa-ndandaan hata?’

²⁷Soona emi muse mataa mae, ‘Ia tutunu-hohotu Paskah, soaneu fe ha'da-holomata neu MANETUALAIN, nana Ana la'ok seli hataholi Israel-la uman-na nai Masir, nai lelek Ana taonisa hataholi Masir-ra anatou ulun-nala, de Ana fe ita taso'da!’ ” Boema hataholi Israel-la senek, ma lakaluku-lakatele.

²⁸Boema ala la'o, de ala tao tunga MANETUALAIN, paletan neu Musa ma Harun.

²⁹ Fatila'dak ndia, MANETUALAIN taonisa basa leoina Masir-ra, anatou ulun-nala, mulai neme manek-ka anan-na, losa hataholi manai bui dale-la anan-nala. Basa bana-manu ana ulun-nala boeo, nanataonisak.

³⁰Le'odaek ndia, basa manek-ka manapaletan-nala, ma basa hataholi Masir-rala fo'a. Nai basa nusa Masir-ra lala'e-na, hala kikii-makaleleu matuaina nananamanenek, nanahu ta hapu uma esa boen, fo ta mate anatoun-na fa.

³¹Le'odaek ndia boe, manek-ka naloo Musa ma Harun, de nafa'das nae, “Emi basa-basam-mala, la'o meme ia mai! La'oela au nusang-nga! Meu leona, fo sene-do'ok neu emi Manetualaim-ma, sama leo emi nonokem-ma.

³²Meni la'iesak emi sapi, bi'ilopom ma bi'ihiim-mala, fo la'o leona! Moke fe au baba'e-papalak boe!”

³³Hataholi Masir-ra lakaseti hataholi Israel-la, fo no lai-laik ala la'oela nusak ndia. Lafa'da lae, “Metema emi ta la'o fa soona, neukose mate la'iesak ami!”

³⁴Boema hataholi Israel-la ho'i-la ha'desopu nanakamek te ta pake laluteik manai sila bokol-nala dalek-ka, boema ala popotis nenik temak de ala lu'an boema ala la'o leona.

³⁵Ala tao basa hata fo Musa nafa'dak-kala boe, fo nde loke lilopilas ma lilofulak, boema bua papakek neme hataholi Masir-rala mai.

³⁶MANETUALAIN, taon-na hataholi Masir-rala ladale malole neu hataholi Israel-la, nalosa ala fe basa hata fo hataholi Israel-la loken. No enok ndia, hataholi Israel-la ho'i leni hataholi Masir-rala su'i-beten, kalua leme nusak ndia dalek mai.

³⁷Hataholi Israel-la la'o, de ala la'o eik leme kota Raamses-sa leo kota Sukot-ta leu. Dede'un-nala, hataholi 600.000 ta leke inak-kala, ma ni'iana-la fa.

³⁸Leni sapi, bi'ilopo ma bi'ihiik makadotok. Hataholi manamai makadotok, ala tunga boe.

³⁹Ala tunu loti fo kamen ta pake laluteik fa, fo leni ha'desopu nanakamek ndia neme Masir mai. Nana ala usi henis no kaiboik leme nusak ndia mai, nalosa ala ta hapu loak tao tua-lepa fa.

⁴⁰ Leoina Israel-la, leo leme Masir teuk 430 dalen-na.

⁴¹Nai teuk ka 430-a, fai mate'en ndia, nde basa MANETUALAIN anan-nala lala'en-na, la'oela dae Masir-ra.

⁴²Le'odaek ndia, MANETUALAIN, nanea nakandoo, fo nos kalua leme Masir mai. Ma le'odaek ndia boe, nde le'odaek fo ala fen neu MANETUALAIN, losa dodoon-na, fo da'di leo leo'daek nasanene'dak. Nai le'odaek ndia, hataholi Israel-la muse lanea.

⁴³MANETUALAIN nafa'da Musa ma Harun nae, “Ito-ato feta Paskah nde ia. Hataholi nusa dea-la, ta bole la'a paa bi'ilopo, fo nana tunu-hotuk nai fai Paskah fa.

⁴⁴Tehu, emi asa-ma ata-la, metema nanasunat basak soona, bole la'a.

⁴⁵Hataholi manamai, do hataholi mana'a ngga'di-la, ta bole la'a fa.

⁴⁶ Muse na'a bi'ilopo ndia paan-na lala'en-na, nai uma dale, ta bole menin leo deak neu fa. Ta bole tao la'di duin esa boen.

⁴⁷Basa hataholi Israel-la lala'en-na, muse tunga feta ndia.

⁴⁸Hataholi nanasunat bei taak-kala, ta bole la'a nana'a feta ndia fa. Metema hataholi nusa dea esa leo nahele so, de nai lelek emi hii tao feta Paskah soaneu fe ha'da-holomata neu Au fo MANETUALAIN soona, muse sunat nakahuluk basa touk manai teidalen-na dalek. Basa ndia soona, sipok-kasa da'di leo hataholi Israel isik, fo ala bole tunga feta Paskah.

⁴⁹Ito-atok matak esa, la'e hataholi Israel isik-kala, ma hataholi nusa dea fo manaleo lahele loo emi-a.”

⁵⁰Basa hataholi Israel-la tunga, de ala tao tunga basa hata fo MANETUALAIN paletan neu Musa ma Harun.

⁵¹Nai faik ndia, MANETUALAIN no basa hataholi Israel-la lala'en-na, kalua leme Masir mai.