Read Termanu KELUARAN 13 Bible Online

KELUARAN 13 - Termanu bible

KELUARAN 13

¹MANETUALAIN nafa'da Musa nae,

² “Tunu-hotu basa ana uluk-kala fe Au. Basa Israel anatou ulun-nala, ma basa bana-manu ana ulun-nala nde been-na, Au nuung sila.”

³Musa nafa'da leoina Israel-la nae, “Nai faik ia, MANETUALAIN, Ana soi-po'i emi nenik koasa matuainan-na, nalosa emi hapu kalua meme Masir, mamanak fo emi da'di ata. Hu ndia de, tao faik ia da'di faik nasanene'dak. Boso mi'a loti fo kamen pake laluteik.

⁴Nai faik ia, hataholi Yahudi-la bula Abib-pa, do bula ka esa fain esa, emi la'oela nusa Masir-ra.

⁵No soo-supak, MANETUALAIN helu emi bei-ba'i kaim-mala, fo Ana fe emi leoina Kanaan, Het, Amori, Hewi ma Yebus nusan-na. MANETUALAIN no basa emi leo nusak fo kamasu'i-makabetek, ma maoe-maisik ndia neu so, de tunga teuk, nai hataholi Yahudi-la bula Abib-pa dalek, emi muse tao feta ia.

⁶Nai faik hitu dalen-na, emi muse mi'a loti fo kamen Ta Pake Laluteik fa, ma neu fai ka hitun-na soona, muse tao feta soaneu fe ha'da-holomata neu MANETUALAIN.

⁷Nai faik hitu dalen-na, emi ta bole mi'a loti fo kamen pake laluteik fa, ma nai emi nusam dale lala'en-na, ta bole hapu laluteik, do hata esa, ana pake laluteik.

⁸Nai feta ndia faik makasososan-na, emi muse tui emi anatoum-mala, mae emi tao basa ia-la, nanahu MANETUALAIN tao basa hata lala'en-na soaneu emi, nai lelek emi la'oela nusa Masir-ra.

⁹Feta ia, ana da'di nasanene'dak soaneu emi, sama leo ta'du esa, nanapa'ak nai emi limam-ma, do emi dedeim-ma. Feta ia fe emi nasanene'dak, fo moke makasi nakandoo, ma manoli MANETUALAIN hoholo-lalanen, nana MANETUALAIN kalua heni emi meme Masir mai, nenik koasa matuainan-na.

¹⁰Tao feta ia tunga teuk, nai faik fo nananaketuk-ka.”

¹¹Musa nafa'da leoina Israel-la nae, “Neukose, MANETUALAIN noo emi leo nusa Kanaan fo Ana helu fen neu emi, ma emi bei-ba'i kaim-mala nenik soo-supak. Metema dae ndia, ana da'di emi nuum soona,

¹² emi muse tunu-hotu anatou uluk lala'en-na, ma bana-manu ana maneanan makasososan-nala. Basa sila-la MANETUALAIN nuun,

¹³tehu keledei-la ana maneanan makasososan-nala, emi muse soi-malas neme MANETUALAIN mai, nenik tunu-hotu bi'ilopo ana esa, da'di neu ngganggatin-na. Metema, emi ta nau soi-ma keledei ndia fa soona, muse helu la'di lesuha'in-na. Emi muse soi-ma emi anatou ulum-mala.

¹⁴Metema nai fai makabuin, emi anam-mala latane basa sila-la sosoa-ndandaan hata soona, emi muse mataa mae leo ia, ‘No koasa matuaina, MANETUALAIN noo ita kalua teme nusa Masir-ra mai, mamanak fo ita da'di ata.

¹⁵Lelek manek Masir-ra nalanga batu, de ana ta nau po'i ita la'o fa, MANETUALAIN taonisa la'iesak anatou uluk manai Masir-ra, nau hataholi daebafak-ka anan-nala, do bana-manu anan-nala boe. Hu ndia de, ita tunu-hotu fe MANETUALAIN basa bana-manu ana maneanan fo bongi makasososak-ka, tehu ita asa-ta falik ita ana ulun-nala, neme MANETUALAIN mai.’

¹⁶Ha'da-tataok ndia, ana da'di nasanene'dak esa ba'eneu ita, sama leo ta'du esa nanapa'ak nai ita liman-na, do nai ita dedein-na. No enok ndia, neukose ana fe ita nasanene'dak tataas esa, nae MANETUALAIN kalua heni ita teme Masir mai, nenik koasa matuainan-na so.”

¹⁷Manek Masir-ra, ana po'i basa leoina Israel-la la'o boema, Manetualain ta noos tunga enok manatunga nusa Filistin-na fa, leomae enok ndia eno tetepak. Manetualain dodoo nae, “Boso nalosak hataholi sila-la lasasale dale, metema ala bubuluk, lae sila muse latee-lata'ti, boema ala fali le'us leo Masir leu.”

¹⁸Hu ndia de, Manetualain noos tunga enok-ka naleo, fo ala tunga moo solokaek-ka, de leu leo Tasi Gelagah leu. Nai lelek, hataholi Israel sila-la la'oela Masir-ra, ala ho'u tee-tafa sama leo sanga leu latee-lata'ti.

¹⁹ Musa ho'i neni Yusuf dui-kalun, nana nai lelek Yusuf bei naso'da, nadenu hataholi Israel-la soo-supa, fo ala ho'i leni dui-kalun. Yusuf hala hehelun-na nae leo ia, “Nai lelek, Manetualain soi-po'i emi soona, emi muse ho'i meni au popolang-nga, neme mamanak ia mai.”

²⁰Hataholi Israel-la la'oela Sukot boema, ala ofu leme kota Etam-ma, fo nai moo solokaek-ka su'un-na.

²¹Nai fai lele'don-na, MANETUALAIN la'ok nai uluk, fo nai dii ko'as dale, ma nai fai le'odaen-na, Ana la'ok nakahuluk-kasa nai dii ha'ik dale, fo natu'du enok-ka. No enok ndia, ala hapu la'ok lele'do le'odaen.

²²Neme fafaik losa le'odae, dii ko'as-sa nai leoina ndia uluk, ma neme le'odae losa fafaik, dii ha'ik-ka nos.