Read Termanu KELUARAN 14 Bible Online

KELUARAN 14 - Termanu bible

KELUARAN 14

¹Basa boema, MANETUALAIN, nafa'da Musa nae,

²“Madenu hataholi Israel-la fali le'us, fo ala ofu nai kota Pi-Hahirot-ta matan-na, nai kota Migdol ma Tasi Gelagah tala'da, deka no kota Baal-Zefon-na.

³Neukose, manek Masir-ra naedaenga hataholi Israel-la bei laleu-lalaak lai nusak ia, de ala sala nai moo solokaek-ka.

⁴Neukose, Au tao-an da'di langa batuk, fo neu usi emi. Tehu neukose, Au atu'du Au koasang-nga neu manek Masir-ra, ma solda'dun-nala, fo neukose ala bubuluk, lae Au nde MANETUALAIN.” Boema hataholi Israel-la taon, sama leo hata fo MANETUALAIN paleta neus.

⁵Lelek manek Masir-ra namanene lae hataholi Israel-la lalai so boema, ndia ma basa manapaletan-nala lasasale dale, de lafa'da lae, “Ita tao leo beek bai? Tao le'e de, ita po'ilotak hataholi Israel sila-la ala la'o, nalosa ita tamopo ita atan-nala?”

⁶Boema manek-ka sadia kaleta musu-la ma solda'dun-nala.

⁷Ana la'o no neni la'iesak ndia kaleta musun-nala, fo nai dalek hapu kaleta neulaun natun nee loo malanga solda'du matuainan-nala boe.

⁸Memak, MANETUALAIN tao-na manek Masir-ra da'di langa batuk, nalosa ana usi hataholi Israel-la bei lai leleo-lala'on-nala dalek, nai lelek ala la'oela nusak ndia no MANETUALAIN nasulu-nahapan.

⁹Solda'du Masir-ra loo basa ndala, kaleta ma hataholi manasa'e ndala-la, ala usi hataholi Israel-la, de ala tungas lai mamana ofun-nala, nai tasi su'un-na, deka no Pi-Hahirot.

¹⁰Lelek, hataholi Israel-la lita manek Masir-ra no solda'dun-nala mai boema, ala bii lanseli, de ala nggasi neu MANETUALAIN, fo loke tutulu-fafalik.

¹¹Lafa'da Musa lae, “Ade nai Masir ta hapu lates fa, nalosa o moo ami, fo ela ami mate nai mamanak ia do? Mitak o tatao-nono'im ndia nininin-na dei!

¹²Makahulun-na, ami mafa'da basa neme Masir, mae neukose dede'ak ia ana da'di! Ami makaseti o so, fo boso taom-ma ami dalem-ma ta tesa-tama fa, tehu nemen-na, fo ami da'di ata mahele nai Masir. Malole lenak, ami da'di ata nai naa, neme mate ami nai moo solokaek ia!”

¹³Musa nataa nae, “Boso bii-mamata'u! Makatatakak mahele! Neukose emi mita hata fo MANETUALAIN taon soaneu soi-tefa-nala emi. Hataholi Masir fo besak ia emi mitak sila-la, neukose emi ta mita seluk-kasa so'on.

¹⁴Neukose MANETUALAIN natee-nata'ti nggati emi, de emi pe'daom.”

¹⁵MANETUALAIN nafa'da Musa nae, “Tao le'e de, o nggasi moke tutulu-fafalik? Madenu hataholi Israel-la, fo ala la'ok lakandoo!

¹⁶So'uk o aitete'em-ma, fo leleuk-kana leo tasi lai neu. Soona neukose, oe-a ta'tiba'en neu dua, fo hataholi Israel-la hapu lena tasi-a, no ala la'ok nai dae ma'dak lain, nai tasi buin-na.

¹⁷Neukose Au tao-a hataholi Masir-ra lalanga batu, nalosa ala usi lahele hataholi Israel-la, fo neukose, Au atu'du Au koasang-nga neu manek Masir-ra, solda'dun-nala, kaleta musun-nala, boema basa hataholi manasa'e ndalan-nala.

¹⁸Soona neukose, hataholi Masir-ra bubuluk, lae Au nde MANETUALAIN.”

¹⁹Boema, Manetualain ata nusa so'dan manai solda'du Israel-la uluk-ka, ana lali leo dea neu. Ma dii ko'as-sa boeo, ana lali de ana losa

²⁰nai solda'du Masir-ra ma solda'du Israel-la tala'da. Ko'as ndia, neni makahatuk, nalosa le'odae katemak esa, solda'du bubua ka duak sila-la, esa ta hapu deka no esa fa.

²¹Boema Musa leleuk liman-na leo tasi lai neu, de MANETUALAIN fe ani timu matuaina mai, nalosa tasi oen-na le'a. Le'odaek ndia, ani timu nahele, de ana tao nasafali tasi-a da'di dae ma'dak.

²² Oe-a ba'eneu dua, de nai lelek hataholi Israel-la lena tasi-a, ala la'ok nai dae ma'dak lain, de oe manai boboa kii-konan, nalupa leo papala nanadamak-ka.

²³Hataholi Masir-ra loo basa ndala, kaleta ma hataholi manasa'ek-kala, ala usi lakandoo, de ala tunga hataholi Israel-la leo tasi tala'da leu.

²⁴Sanga deka lolebalahaak boema, MANETUALAIN mete solda'du Masir-ra neme dii ha'ik ma dii ko'as dale mai, de Ana taon-nalas lapokak.

²⁵Ana tao nalutu kaleta-la ein-nala, nalosa ala tutulumatak no sosota-mamanguk. Hataholi Masir-ra lafa'da lae, “MANETUALAIN natee-nata'ti nggati hataholi Israel-la, fo la'ban ita. Mai fo talai teme ia mai!”

²⁶MANETUALAIN nafa'da Musa nae, “Leleuk o limam-ma leo tasi lai neu, soona neukose oe fali, fo hataholi Masir-ra, kaleta-la ma hataholi manasa'ek-kala bolo.”

²⁷Boema Musa leleuk liman-na leo tasi lai neu, de nai lelek dulufula boema, oe-a nakabubua falik leo makasososan-na. Hataholi Masir-ra sanga enok fo laso'da, tehu MANETUALAIN tao-nalas ala bolo nai tasi dale.

²⁸Tasi oe-a ana luu ma'in, de ana potin-na kaleta-la, hataholi manasa'ek-kala, ma basa solda'du Masir manausi hataholi Israel-la, de lii-a ba'u nenis leo tasi tala'da leu, nalosa mate la'iesak-kasa.

²⁹Tehu lelek hataholi Israel-la lena tasi-a, ala la'ok nai dae ma'dak lain, ma oe-a nalupa leo papala nanadamak, nai kii ma nai kona.

³⁰Nai faik ndia, MANETUALAIN soi-tefa-na leoina Israel-la neme hataholi Masir-ra mai, ma lita hataholi Masir-ra popolan-nala benggela nai tasi su'un-na.

³¹Lelek hataholi Israel-la lita tao leo beek, de MANETUALAIN no koasa matuainan-na, Ana sengi hataholi Masir-ra boema, ala dodoo doak-kana nanseli, nalosa lamahele neun, ma lamahele neu Musa, fo Manetualain atan ndia.