Read Termanu KELUARAN 15 Bible Online

KELUARAN 15 - Termanu bible

KELUARAN 15

¹ Boema Musa no hataholi Israel-la lakamee nakameek-ka nde ia, soaneu ala koa-kio MANETUALAIN nae, “Au nau akamee soaneu MANETUALAIN, nana Ana sengi no namahoko-setelek so. Ana tapa basa ndala-la loo hataholi manasa'en-nala, leo tasi dale leu.

² MANETUALAIN, nde au manamasala'eng fo mabe'i-balakaik; Ndia nde soi-tefa-nala au-a. Ndia nde au Manetualaing-nga, de au nau koa-kion, Manetualain fo au bei-ba'i kaing-ngala sene-do'ok-ka, de Au amatutua-amadedeman.

³MANETUALAIN nde palani ta'tibatu, fo makadelek, Na'den-na nde, MANETUALAIN ndia.

⁴Ana tapa solda'du Masir-rala loo kaletan-nala, leo tasi dale leu. Malanga solda'du matuaina, fo mabe'i-balakaik nanseli-la, ala bolo lai Tasi Gelagah dalek.

⁵Tasi oe mademaina, ana ko'do-nalas, de sama leo batu-a, ana tu'da leo tasi oe-a buin-na neu.

⁶O be'i-balakaim dodoo doak-kana nanseli, ou MANETUALAIN, O taom-ma musu-a tonggela.

⁷No O matua-mademam fo matuainam-ma O tao mamopo-mamate basa hataholi fo manala'ban O-a. O nasa-melum lua ponu-ponu sama leo ha'i-a, de ana hotu henis sama leo ha'deaik-ka.

⁸O fuu tasi-a, de lii-a napoponu, napadeik natetu sama leo papala nanadamak-ka, nalosa hapu la'ok tunga tasi buin-na.

⁹Musu nafa'da nae, ‘Neukose au usis, fo au ho'u-alas, au fe'a au tafainang-nga, de au ta'ti isas. Boema au loso-a hata-heto-nala, au baba'en, fo au u'a-paken losa au doa-henin.’

¹⁰Tehu MANETUALAIN hela hahaen-na ka'da la'iesa mesak-kana, de neni fe Masir fai susa-soe. Ala bolo sama leo tima mabelaina nai lii mapoponuk dale.

¹¹Lamatua daebafak beek-ka nde hapu nakasusu'dik no O, ou MANETUALAIN Fo Mandela-masa'ak ma malalao-malalafuk? See kande hapu tao manada'dibeuk-kala ma tatao-nono'i matuaina sama leo MANETUALAIN?

¹²O lok O lima konam-ma, boema musu sapu-lalo, nana daebafak-ka ko'do-nan.

¹³O hela-nole leoina fo O soi-tefa-malak ia-la, nanahu O liineka neu O hala hehelum-ma. O masulu-mahapas, no be'i-balakai manituk, ma O hela-noles leo O dae-oem fo malalao-malalafuk-ka.

¹⁴Leoina-la lamanene, de ala dele bengge'be; hataholi Filistin-nala ma basa mauli-malanga Edom-mala lakalupu-lakasee. Hataholi Moab mabe'i-balakaik-kala dele ngge'be-ngge'be hataholi Kanaan-nala dalen-nala ba'ihana.

¹⁶Ala bii-lamata'u lanseli, nai lelek lita matan MANETUALAIN be'i-balakain. Lelek O anam-mala la'ok tunga ndia, tehu musu-a ta napalani kena-ka'i fas; Fe leoina fo O soi-po'i basak-kala lala tasi selik.

¹⁷Boema O hela-nole Israel leo mamanak fo O helen soaneu O mamana leleom-ma. Ala leo lahele leme O pupuku malalao-malalafum-ma nai Uma fo O nde mapadedeik-kana.

¹⁸O nde MANETUALAIN, Manek fo paleta losa dodoon-na.”

¹⁹Nai lelek hataholi Israel-la lena tasi-a, ala la'ok nai dae ma'dak lain. Tehu lelek Masir kaletan-nala loo ndala ma hataholi manasa'ek-kala masok leo tasi dale leu. MANETUALAIN taon-na tasi oen-na nakatema falik, nalosa ala bolo.

²⁰Boema Miryam, fo nabi inak esa, fo Harun ka'ainan-na, ho'in-na rebanan-nala, de basa inak-kala li'u no'u-no'u boema ala longe.

²¹Miryam nakamee soaneus nae, “Makamee ba'eneu MANETUALAIN, Nana Ana sengi no malole nanseli. Ana tapa basa ndala-la loo hataholi manasa'ek-kala leo tasi dale leu.”

²²Basa boema, Musa no leoina Israel-la leme Tasi Gelagah leo moo solokaek Syur-ra leu. Ala la'ok faik telu dalen-na, nai moo solokaek-ka, te ala ta hapu oe fa.

²³Boema ala losa mamanak-ka na'de Mara, tehu oe ndia makahe'dun-na seli, nalosa ala ta bisa linu fan. Hu ndia de, loke mamanak ndia lae Mara, fo sosoa-ndandaan nae, makahe'duk.

²⁴Boema hataholi sila-la beemumu loo Musa ma latane lae, “Neukose ita tinu beek?”

²⁵Musa hule-haladoi te'e-te'e neu MANETUALAIN, boema MANETUALAIN natu'dun ai nggenggelok esa. Musa tapa ai ndia leo oe dale neu, boema oe ndia nasafali da'di oe mamis, nalosa bisa linun. Nai mamanak ndia, MANETUALAIN fes nakanenetek-kala, ma Ana so'ba-su'dis nai mamanak ndia boe.

²⁶MANETUALAIN nae, “Tunga Au no te'e-te'ek, ma tao hata fo Au meten malole; tunga la'iesak Au paletang-ngala. Metema emi tao tungan leondiak soona, neukose Au ta huku emi nenik he'di-laus fo Au fen neu hataholi Masir-ra. Au nde MANETUALAIN, fo manatao nalea-nahai emi-a.”

²⁷Basa ndia boema, ala losa mamanak fo na'de Elim. Nai ndia hapu oemata sanahulu dua, ma ai kurma, huuk hituhulu. Ala ofu deka loo oemata ndia.