Read Termanu KELUARAN 18 Bible Online

KELUARAN 18 - Termanu bible

KELUARAN 18

¹Musa aliaman-na na'de Yitro, fo imam nai Midian, namanene basa hata lala'en fo Manetualain tao-no'in soaneu Musa ma leoina Israel-la, nai lelek nauli-nalangas kalua leme Masir mai.

²Boema Yitro neu donge-dama Musa no Zipora, fo Musa saon-na, fo lelek ndia, ana bei leo nai Midian,

³sama-sama no Gersom ma Eliezer fo Musa anatoun duas. Ana foi ana makasososan-na na'de Gersom, nanahu Musa nafa'da nae, “Au hataholi manamai esa nai nusa dea”;

⁴Ana foi ana ka dua-na, na'de Eliezer nanahu Musa nafa'da nae, “Manetualain fo au bei-ba'i kaing-ngala sene-do'ok-ka, tulu-fali au so, ma Ana soi-tefa-nala au, nalosa manek Masir-ra ta taonisa au fa.”

⁵Yitro mai sama-sama no Musa saon-na, ma anan duas leo moo solokaek-ka mai, fo nai mamanak fo Musa ofu deka no letek malalao-malalafuk-ka.

⁶Musa hapu halak, lae ala mai so,

⁷boema ana kalua mai, de neu soluk-kasa. Ana senek neu Yitro matan-na, de ana de'in. Ala latataneaok, la'eneu esa-esak so'da-molen, boema ala masok leo Musa ofun dale leu.

⁸Musa tui aliaman-na, basa hata lala'en fo MANETUALAIN taon la'eneu manek-ka ma leoina Masir-ra, soaneu soi-tefa hataholi Israel-la. Boeo ana tuin la'eneu toto'a-sosotak fo leoina Israel-la latongo loon nai eno tala'dak, ma tao leo beek de MANETUALAIN soi-tefas.

⁹Yitro namanene basa sila-la boema, namahoko nanseli

¹⁰de nafa'da nae, “Kokoa-kikiok neu MANETUALAIN, fo manasoi-tefa-nala emi neme manek-ka ma leoina Masir-ra liman mai! Kokoa-kikiok neu MANETUALAIN, fo manasoi-po'i leoina Israel-la, neme ata mai!

¹¹Besak ia, au bubuluk ae MANETUALAIN, ba'ulena basa lamatuak lala'en-na, nanahu Ana tao basa sila-la, nai lelek hataholi Masir-ra no koao-ndaeaok nanseli, ala tuni-ndeni hataholi Israel-la.”

¹²Basa boema, Yitro neni bana tutunu-hohotu nanatunuk, ma bana tutunu-hohotu nanado'dok de'ubee, fo da'di leo tutunu-hohotuk fe Manetualain. Harun ma basa leoina Israel-la mane leon-nala mai, de la'a sama-sama loo Yitro nai Manetualain matan.

¹³Balahaa boema, Musa palisak hataholi Israel-la dede'a nale'a-napilin-nala. Ana palisak dede'ak ndia, neme fafaik losa le'odae.

¹⁴Lelek Yitro nita basa hata fo Musa tao-no'in boema, natane nae, “O muse tao beek soaneu leoina ia? Tao le'e de, muse o mesa-mesam-ma tao-no'i basa ia-la, nalosa soaneu hataholi sila-la loke ka'da o nanoli-nafa'dam, boeo ala muse lapadeik lai ia, neme fafaik losa le'odae?”

¹⁵Musa nataa nae, “Hataholi sila-la ala mai leo au mai, fo ala bubuluk Manetualain hihii-nanaun.

¹⁶Metema, lale'a-lapilik soona, ala mai leo au mai, fo ela au aketu sila dede'an-na, ma au tui-benga fes, Manetualain paletan ma hoholo-lalanen-nala.”

¹⁷Yitro nae, “Leondiak soona, ta malole fa.

¹⁸No enok ndia, o tao masota o aoinam-ma mesak-kana, ma hataholi sila-la boe. Tatao-nono'ik sila-la belan-na seli soaneu o, neukose o mesam-ma ta bisa tao-no'i fan.

¹⁹Mamanene au nanoli-nafa'dang, fo neukose Manetualain tulu-fali o. Memak malole, nana o mapadeik nggati leoina ia, nai Manetualain matan, fo o meni leoina ia dede'an-na neun.

²⁰O muse manolis Manetualain paletan-nala, ma mafa'da mangalele'dos, so'da malole-a eno-dalan, ma hata fo ala muse taon.

²¹Tehu fe'ek neme ndia mai, o muse hele-ma touk manatee-tenok de'ubee, fo fes da'di malangan neu hataholi lifun esa, natun esa, limahulu, ma sanahulu. Hataholi sila-la, muse hataholi fo ala bii Manetualain, ma ala tunga Manetualain, hapu nananamahelek, ma ala ta nau sipo doi sosolo dalek fa.

²²Madenus, fo ala tao-no'i da'di leo leoina ia manakee-manafulan, nai esa-esak baba'en-na dalek. Sila muse lakalala'ok bela-ba'uk ndia, no malole. Bole leni dede'a matua-la leo o mai, tehu sila laketu-lala'di aon dede'a nale'a-napilik anak-kala. Neukose, enok ndia tao namada'du o bela-ba'um, nanahu ala lu'a-lepa fali o, nai o bela-ba'um-ma dalek.

²³Metema o tao leondiak, ma Manetualain paleta dede'ak ndia neu o soona, neukose o makalala'ok mabe'i o bela-ba'um, de basa hataholi-la fali le'us no namahokok, nanahu sila dede'an-na nananaketu-nala'dik no lai-laik.”

²⁴Musa tunga Yitro nanoli-nafa'dan,

²⁵de ana hele-na, leoina Israel-la hataholi manatee-tenon de'ubee. Ana fes da'di mauli-malangan neu hataholi lifun esa, natun esa, limahulu, ma sanahulu.

²⁶Lakalala'ok sila bela-ba'un da'di leo manakee-manafula neu leoina Israel-la. Leni dede'a matua-la leo Musa neu, te sila laketu-lala'di aon dede'a nale'a-napilik anak-kala.

²⁷Basa boema, Musa po'i Yitro fali leo nusan-na neu, boema Yitro fali ne'un leon-na.