Read Termanu KELUARAN 22 Bible Online

KELUARAN 22 - Termanu bible

KELUARAN 22

¹“See namanako-na sapi do bi'ilopo esa, boema ana do'don do nase'on soona, muse ana nggati sapi ndia nenik sapi lima ma bi'ilopo ndia nenik bi'ilopo haa.

²Metema nakodaa esa, namanako-na buas esa, soona ana muse nggati buas fo namanako-nan ndia. Metema, hataholi ndia ta nanuu hata esa boen soona, nase'o hataholi ndia, fo ana da'di ata soaneu nggati buas fo namanako-nan ndia. Metema, namanako-na buas-sa, nalupa sapi, keledei do bi'ilopo, de ala hapu bana sila-la nai hataholi ndia, te bana sila-la bei maso'dak soona, bana esa-na, ana muse nggati bana dua. Metema ho'un-na hataholi nakodaa esa nai uma esa, la'e le'odaek, boema taonisan soona, hataholi manataonisan ndia, ta nasala fa. Tehu, metema manada'dik ndia, ana da'di la'e lele'dok soona, hataholi manataonisak-ka, ana hapu salak.

⁵See po'ilotak bana-manun la'a na'u nai tinan dale, do nai osi angon dale, boema bana sila-la leo deak leu, de la'a hataholi fe'ek tinan-na bubu'u-palusan, soona mabanak ndia, muse nggati tina ha'i na'ak ndia bubu'u-palusan, nenik ndia tinan-na do osi angon-na buna-boa neulaun-nala.

⁶See tao ha'i nai tinan dale, boema ha'i ndia na'a leo hataholi fe'ek tinan neu, de na'a heni gandum nanake'di bei tak-kala, do gandum fo besak-ka ala ke'dis, de ala puputus, soona muse kee fe hataholi manatao ha'i ndia, nahuta.

⁷Metema, hataholi esa pe'da doin, do bua-lo'a kabelin-na nai nonoon-na uman. Tehu, basa boema, lamanako-la buas sila-la neme nonoon-na uman mai. Metema, ala ho'u-la nakodaa soona, ana muse bae didikuk la'i dua.

⁸Tehu metema, ta ho'un-na nakodaa ndia fa soona, muse hataholi mabuas-sa, noo hataholi manape'da buas ndia leu leo mamana makaluku-makatele leu, fo nai ndia, ana muse soo nae ndia ta namanako-na buas fo ana pe'dan ndia fa.

⁹Nai nale'a-napilik la'eneu pusaka dalek, nau la'eneu sapi, keledei, bi'ilopo, bua papakek do su'di beek fo mopon, boema hapu falik-kana soona, hataholi fo ana manaku, nae ndia nuun-na, muse noon leo mamanak makaluku-makatele neu. Hataholi fo Manetualain nafa'dan da'di leo hataholi masalak-ka, muse ana bae didikuk la'i dua leo manonuuk-ka neu.

¹⁰Metema, hataholi nakaboboi keledei, sapi, bi'ilopo do bana-manu fe'ek fo nonoo hataholin-na nuun. Basa boema, mate bana ndia, do nakahina, do musu-a natona-nan, te se'kona sakasiin ta.

¹¹Soona ana muse neu leo mamanak makaluku-makatele neu fo ana soo pake MANETUALAIN na'den-na, nae ndia ta namanako bana fo ala fen ana ho'un ndia fa. Metema memak ta namanako-na fan soona, manonuuk-ka, muse lu'a-lepa hutak ndia, ma hataholi mana makaboboi-a, ta paluu bae hutak fa.

¹²Metema hataholi fe'ek nde namanako-na bana ndia, soona hataholi manamakaboboi-a, muse bae hutak leo manonuuk-ka neu.

¹³Metema bana fuik kaa-na bana ndia soona, hataholi manamakaboboi-a, muse natu'du bana fuik-ka na'a ela duin-na, da'di leo buti neu manonuuk-ka, fo ta paluu ana bae hutak hu kande bana ndia fa.

¹⁴Metema hataholi esa, ana tona bana esa, fo bana ndia nakahina, do maten nai lelek manonuuk-ka ta nai mamanak ndia fa soona, manatona muse nahuta.

¹⁵Tehu metema manada'dik ndia ana da'di, nai lelek manonuuk-ka nai mamanak ndia soona, ta paluu hataholi manatona nahuta fa. Metema bana ndia, bana sese'ba-babaek soona, huta-bu'un ndia, nai sese'ban dale so.”

¹⁶ “See fufu'di-oodok anafe'oana matatema esa, hataholi beita adu-natane fan, fo ana sungu non soona, muse ana fe belin-na, ma ana sao-nan.

¹⁷Tehu, metema inaanak ndia aman ta nau touk ndia sao anafe'on-na fa soona, touk ndia muse bae doik, de'u anafe'oana matatema esa belin-na.

¹⁸ Inak bee siula-tongono soona, muse taonisan.

¹⁹ Hataholi see, ana sao bana soona, muse taonisan.

²⁰ See tunu-hotu tutunu-hohotuk fe lamatua fe'ek-kala, ta'da fe'e ana tunu-hotu fe Au, fo MANETUALAIN soona, muse hukunisan.

²¹ Boso tuni-ndeni, do ta tao tunga ndoos ma matetuk soaneu hataholi manamai-a; mafandendelek te makahulun-na, emi hataholi manamai nai Masir boe.

²²Boso tao su'di bebe'ik-ka neu faluina do anamaak.

²³Metema, emi tao mangalauk neus, fo metema laloo bou-bou neu Au, fo loke tutulu-fafalik soona, Au, fo MANETUALAIN, neukose amanene dokodoen-nala.

²⁴Neukose Au amanasa, fo Au taoisa emi nai musu dale, nalosa emi saom-mala da'di inafalu, ma emi anam-mala, da'di anamaak.

²⁵ Metema, emi tona doik neme hataholi nuu-taa hata-taak esa, nai Au leoinang dale soona, boso tao sama leo hataholi manala'ok huta-bu'uk-ka, fo noke bunak.

²⁶ Metema emi ho'i-ma hataholi fe'ek ba'du manalun-na da'di neu bua nggangga'dek soona, muse emi fe falik ba'du manalu ndia, bei dai le'do-a beita tenak fa,

²⁷nana ba'du ndia nde been-na, ndia ba'dun fo manatao nato'bi aoinan-na. Metema emi ta fe falik-kana fa soona, ana muse nalu'e beek, nai lelek ana sungu? Metema naloo bou-bou noke tutulu-fafalik neu Au soona, neukose Au amanenen, nanahu Au manasue-manalaik.

²⁸ Boso supa-soo Manetualain, ma boso supa-soo o leoinam-ma, mauli-malangan-nala.

²⁹Neu faik fo nananaketuk-ka, tunu-hotu fe Au, emi gandum, angol ma emi mina setum-ma, beke selik. Fe emi anaulu toum-mala leo Au mai,

³⁰ma emi sapim-ma, emi bi'ilopom-mala, ala bongi ana maneanak makasososak-ka. Po'i bana sila-la lahele loo inan-nala, faik hitu dalen-na, boema neu fai ka falun-na soona, fes leo Au mai.

³¹ Au anang emi, hu ndia de bana fuik-ka kaa-na bana beek ndia boe, emi ta bole mi'a paan-na fa; fen neu busa-la.”