Read Termanu KELUARAN 24 Bible Online

KELUARAN 24 - Termanu bible

KELUARAN 24

¹Basa boema, MANETUALAIN nafa'da Musa nae, “Kae leo lain mai fo mataa Au, sama-sama moo Harun, Nadab ma Abihu, ma leoina mauli-malanagan ka hituhulun-nala, fo sene-do'ok neu Au, tehu boso deka Au.

²Ka'da o mesam-ma mai deka moo Au. Fe'e-fe'ek-kala ta bole mai deka-deka fa, ma nakalenak laun-na ta bole kae leo letek ia lain mai fa.”

³Boema Musa neu de ana po'a-benga basa MANETUALAIN paletan ma nakaneneten-nala neu leoina ndia. Sila basa-basas lataa landaa lae, “Ami nau tao basa hata fo MANETUALAIN nafa'dan.”

⁴Basa ndia boema, Musa sulak-na basa MANETUALAIN paletan-na. Balahaa fafaik boema, napadedeik na mei tunu-hotuk esa no dii sanahulu dua nai letek ndia huun-na; dii esa soona, ana da'di ta'du tana neu Israel leon esa.

⁵Boema Musa nadenu hataholi muli-soluk de'ubee fo leu tunu-hotu tutunu-hohotu nanatunuk soaneu MANETUALAIN, boema ala ta'ti sapi de'ubee soaneu tutunu-hohotu mole-dame.

⁶Musa ho'in-na sapi sila-la daan seli, de ana po'an leo bokol dale neu. Ana po'a seli leo mei tunu-hotuk lain neu.

⁷Basa boema, ana ho'i-na susula hehelu-balataak fo MANETUALAIN paletan-nala nanasulak nai dalek-ka, de ana lees napane'en neu leoina ndia. Lafa'da lae, “Ami nau tunga MANETUALAIN ma tao basa paletan lala'en-na.”

⁸ Boema Musa ho'in-na daak manai bokol sila-la dalek, de ana pisin neu laun-na. Nae, “Daak ia, tao natea-nahele hala-heheluk fo MANETUALAIN hengenee-balataan no emi tunga paletan-nala.”

⁹Basa boema, Musa, Harun, Nadab, Abihu ma mauli-malangan ka hituhuluk sila-la kae leo letek lain leu,

¹⁰de lita Israel Manetualain-na napadeik nai hata esa lain, sama leo uma latek fo nanataok neme batu nilam-ma mai, ma mangale'dok sama leo lalai-a namaneu.

¹¹Basa mauli-malangan Israel sila-la lita Manetualain so; leomae leondiak boe, Ana ta tao namopo-namate fas. Basa ndia boema, la'a-linu.

¹²Basa boema, MANETUALAIN nafa'da Musa nae, “Mai leo Au mai, nai letek lain. Nai ndia, neukose Au fe o batu dua, Au sulak basa Au hoholo-lalaneng-ngala nai dalek. Basa hoholo-lalanek sila-la, da'di nanolik ba'eneu leoina ndia.”

¹³Boema Musa ma Yosua fo Musa manatulu-falin-na, laheheleaon de Musa kae leo MANETUALAIN lete leleon ndia lain neu.

¹⁴Musa helu basa neu basa mauli-malangan Israel-la nae, “Mahani meme mamana oofuk ia, losa ami falima'im-ma. Harun ma Hur sama-sama loo emi nai ia. See hapu dede'ak soona, bole moos leu lataa fo laketu dede'an-nala.”

¹⁵Musa kae Letek Sinai, boema ko'as bubuak esa poti-nan.

¹⁶MANETUALAIN ndela-sa'an kona nai letek ndia lain, de hataholi Israel-la litan sama leo ha'i-a pila nai letek-ka poin-na. Faik nee dalen-na, ko'as-sa poti-na letek ndia, de neu fai ka hitun-na boema, MANETUALAIN naloo Musa neme ko'as ndia dalek mai.

¹⁸ Boema Musa kae nakandoo, losa ana masok leo ko'as ndia dalek neu. Musa leo neme ndia, lele'dok haahulu, le'odaek haahulu.