Read Termanu KELUARAN 35 Bible Online

KELUARAN 35 - Termanu bible

KELUARAN 35

¹Musa naloo nakabubua basa leoina Israel-la lala'en-na, boema nafa'das nae, “MANETUALAIN paletan-na nde ia soaneu emi nae:

² Hapu faik nee soaneu naue-nale'di, tehu nai faik-kahitun-na nde been-na, faik soaneu hahaeaok, fai malole fo nanahele hehelik ba'eneu MANETUALAIN. See naue-nale'di lae fai Sabat-ta soona, muse nanahukunisak.

³Nai faik ndia, emi ta bole mana'a ha'i nai emi umam fa.”

⁴Musa nafa'da basa leoina Israel-la lala'en-na nae, “MANETUALAIN paletan-na nae leoia:

⁵Meni fe MANETUALAIN tutunu-hohotuk. See fo dalen-na nakababale soona, muse ana tunu-hotu lilopilas, lilofulak ma liti,

⁶tema abalutu, tema kabelik balau, pilabalanggeok ma pilas; temak fo tenun neme bi'ihiik-ka bulun-na mai;

⁷bi'ilopo mane louk fo nanalose dula pilas, bana lou mangana'uk, ai akasia,

⁸mina soaneu banuk-ka, bumbu-bumbu soaneu mina feta, ma soaneu boomenik kaboomenik;

⁹poemata dula pilas, ma poemata fe'e-fe'ek soaneu dokik-kana neu efod, ma Imam Matuaina babaa fanan-na.”

¹⁰“Basa tuka malelak manai emi dalek-kala, muse mai fo tao basa hata lala'en fo MANETUALAIN paletan, fo nde:

¹¹Lalaa Temak, punin ma sisinin-na, soloka'do no diin-na, ai betubalak-kala, dii lelesu-la no dii ein-nala;

¹²Peti Hehelu-balataak-ka no ai ndondolon-na, tatanan-na ma temak popoti langak;

¹³mei tunu-hotuk-ka no ai ndondolon-na, basa bua-lo'an ma loti tunu-hotuk,

¹⁴banu eik-ka soaneu de'den no bua-lo'an, banuk-ka no minan-na;

¹⁵mei fo mamanak tunu boomenik-ka no ai ndondolon-na, mina feta, boomenik kaboomenik; tema lelesu soaneu Lalaa Temak lelesun-na,

¹⁶mei soaneu tutunu-hohotu nanatunuk no kafa nala'en-na taon neme liti mai, ai ndondolok-ka no basa bua-lo'an; baak oe fo mamana sasafek-ka no buin-na,

¹⁷temak soaneu uma so'dan-na, dii-la no dii ein-nala, lelesuina uma so'dak-ka tema lelesun-na,

¹⁸ai papakuk-kala ma tali soaneu Lalaa Temak ma soaneu Lalaa Temak so'dan-na;

¹⁹Bua papakek makaluku-makatele soaneu basa imam-mala nai lelek lalalau-laoono nai Kama Malalaok dale, ma bua papake hehelik soaneu Imam Harun, ma anan-nala.”

²⁰Boema basa hataholi Israel manamakabubuak sila-la, esa-esak fali leo uman neu,

²¹de su'di see fo dalen-na nakababale soona, neni tutunu-hohotuk leo MANETUALAIN neu, fo tao natetu MANETUALAIN Lalaa Teman-na bua-lo'an. Sila boeo leni basa hata fo paluun soaneu makaluku-makatele ma soaneu imam-ma bua papaken-na.

²²Su'di see fo anan nau, nau touk do inak boe, ana mai fo neni faneti balias, lolo'ek, ndeli, henu, ma basa balias lilopilas mata-matak lala'en-na fo tunu-hotun soaneu MANETUALAIN.

²³Ba'e neu see fo nanuu tema abalutu, temak kabelik balau, pilabalanggeok, ma pilas temak fo tenun neme bi'ihiik-ka bulun-na mai, bi'ilopo mane louk fo nanalose dula pilas, do bana lou mangana'uk soona, tunu-hotu bua-lo'as sila-la.

²⁴Ba'e neu see fo ana tulu-fali lilofulak do liti soona, ninin leo MANETUALAIN neu. Ba'e neu hataholi fo nanuu ai akasia soaneu tatao-nono'ik ndia, ana tao leondiak boe.

²⁵Basa inak fo manale'a nalelak abas-sa, leni abas temak abalutu boema abas temak kabelik balau, pilabalanggeok ma pilas fo ala tao laak-ka.

²⁶Sila boeo le'a abas neme bi'ihii bulu mai.

²⁷Basa mauli-malangan leni poemata dula pila, ma poemata fe'e-fe'ek-kala soaneu dokik-kana neu efod ma babaa fanan-na.

²⁸Sila boeo leni bumbu-bumbu ma mina soaneu banuk-ka, mina feta ma boomenik kaboomenik.

²⁹Basa hataholi Israel-la no sila dale hihii mesan-na, leni sila tunu-hotun leo MANETUALAIN neu soaneu tatao-nono'ik fo MANETUALAIN paletan tunga Musa.

³⁰Basa boema, Musa nafa'da hataholi Israel-la nae, “MANETUALAIN hele basa Bezaleel, fo Uri anan-na, ma Hur neme leo Yehuda, upun-na,

³¹de Ana ba'e-batin nenik koasan-na Manetualain fen dudu'a maneu, malelak ma be'i-balakaik nai tatao-nono'i doki-dulak mata-matak lala'en-na dalek,

³²soaneu ana tutu'u dodoki-dudulak leo beek-ka, fo ana taon neme lilopilas, lilofulak ma liti-a mai;

³³soaneu fofola batu poemata fo sanga dokik-kana; soaneu doki-dulak ai, ma soaneu tatao-nono'ik doki-dulak mata fe'ek lala'en-na.

³⁴Ba'eneu Bezaleel ma Aholiab, fo Ahisamakh neme leo Dan-na mai, anan-na, MANETUALAIN fes malelak fo lanoli sila malelan-na neu hataholi fe'ek.

³⁵Manetualain fes malelak nai basa tatao-nono'i mata-matak-kala dalek, fo tatao-nono'ik ndia hataholi manadokik malelaina-la, manadudu'a-dodoo tatao-nono'ik-kala ma manatenu malelak tema abalutu, temak kabelik balau, pilabalanggeok ma pilas, ma temak fe'ek-kala tatao-nono'in ndia. Hataholi sila-la nde been-na, malelainan nai dudu'a-dodoo tatao-nono'ik-ka dalek, ma ala tao lalelak basa tatao-nono'i matak-matak-kala.