Read Termanu KELUARAN 39 Bible Online

KELUARAN 39 - Termanu bible

KELUARAN 39

¹Bezaleel no Aholiab tao bua papake makaluku-makatele neme temak kabelik balau, pilabalanggeok ma pilas soaneu basa imam-mala nai lelek lalalau-laoono nai Kama Malalao-malalafuk dale. Papake imam soaneu Harun, nanataok sama leo hata fo MANETUALAIN paletan neu Musa.

²Efod nanataok neme tema abalutu, temak kabelik balau, pilabalanggeok ma pilas, ma aba lilopilas.

³Ala tutu lilopilas bibiak-kala, de basa boema ala kaka'das da'di abas lutuanak, boema ala tenun no temak abalutu, ma temak kabelik balau, pilabalanggeok ma pilas.

⁴Basa ndia boema, ala tao ma efod, tali papa'a aluk dua, fo seun neu boboan-na.

⁵Kalikee abalutu-a, ala taon neme abas matak esa mai, de ala seun neu ba'du sakun ndia, nalosa ala da'di esa, sama leo hata fo MANETUALAIN paletan neu Musa.

⁶Ala fola batu poemata dula pilas, boema ala taon leo su'udoo lilopilas dale neu. No sila malelainan-na, de ala doki-dulak Yakob ana ka sanahulu duan-nala na'den-nala neu batu sila-la.

⁷Basa boema, ala tao batu sila-la neu efod-ta tali alun-nala da'dileo ta'du-tana nasanene'dak neu Israel leo ka 12n-nala, sama leo hata fo MANETUALAIN paletan neu Musa.

⁸Bezaleel no Aholiab tao babaa fanak fo tataon-na sama no tao efod, ma seseu-sosoon boeo matak esa.

⁹Ala tao lan balakak fo diku duak-kana, loloa nanalun senti beke 22.

¹⁰Nai babaa fanak ndia, tao batu poemata dalak 4 neu babaa fanak ndia. Nai dalak makasososak-ka tao batu poemata dula pilas, batu kabelik dula kunik, batu poemata dula fulak.

¹¹Nai dalak ka dua, batu poemata dula momo'dok, batu poemata dula balau ma intan.

¹²Nai dalak ka telu, tao batu poemata dula balau, batu poemata dula pilas, ma batu poemata dula pelabalanggeok.

¹³Nai dalak ka 4, tao batu poemata dula momo'do-balau, batu poemata dula momo'dok ma batu poemata dula kuni-mangadilak. Muse pa'a batu poemata ka 12 sila-la nenik lilopilas.

¹⁴Yakob ana ka sanahulu duan-nala na'den-na nanadoki-dulak nai poemata sila-la, fo da'di ta'du-tanan-nasanene'dak neu Israel leo ka sanahulu duan-nala.

¹⁵Boema ala tao-la namosina dua neme lilopilas isik-ka mai, de ala tatalin sama leo tali-a.

¹⁶Ala tao la suek lilopilas dua boe, de ala taon neu babaa fanak ndia pe'dan duas, poin-na.

¹⁷Boema ala tao namosina lilopilas ka duak sila leo suek sila-la dalek neu,

¹⁸ma pe'dak-ka duak-kala nanapa'ak neu su'udook-ka duak-kala, nalosa babaa fanak ndia hapu nanatutik no efod tali alun manai uluk-ka.

¹⁹Boema ala tao seluk suek lilopilas dua bai, de ala taon neu babaa fanak ndia, nai pe'dan manai dalek-ka dae, fo pe'dak manala'e efod.

²⁰Basa ndia boema, ala tao-la suek lilopilas dua, de ala taon neu efod tali alun ka duak manai uluk-ka, deka no seseu nanatutin-na dae faaanak, fo nai kalikee abalutu nisilain-na.

²¹Nandaa no MANETUALAIN paletan neu Musa, de suek babaa fanak-ka nanatutik no tali balau manai efod, nalosa babaa fanak ndia nahele nai kalikee lain de ta natapo'i fa.

²²Ba'du manalu fo nanapakek nai efod lain, nanataok neme temak kabelik balau mai.

²³Ala tao latea-lahele lesuha'in-na nenik temak nanatenuk, fo ela boso siihenin lai-lai.

²⁴Ala balias okofefeo su'udoo daen-na nenik dalima boak, neme temak abalutu, temak kabelik balau, pilabalanggeok ma pilas, de ala tata'dan nenik kileik lilopilas, fo nandaa no MANETUALAIN paletan neu Musa.

²⁷Ala tao ba'du kabaek fe Harun no anan-nala,

²⁸tema fefeo langak, papa'a langak, lopo ei keke'uk abalutu,

²⁹ma kalikee nanatenuk neme temak abalutu, temak kabelik balau, pilabalanggeok ma temak pilas, fo balias-sana nenik seseu-sosoo mana'ahiik, sama leo MANETUALAIN paletan neu Musa.

³⁰Boeo ala tao balias neme lilopilas isik-ka mai, fo da'di ta'du-tanan-nae sila nanahele hehelik soaneu MANETUALAIN. Dede'ak ia la nanadoki-dulak neu balias sila: “Nanahele hehelik soaneu MANETUALAIN.”

³¹Balias sila-la nanataok neu tema fefeo langak manai uluk-ka, fo nandaa no MANETUALAIN paletan neu Musa.

³²Mate'en-na, MANETUALAIN Lalaa Teman-na tatao-nono'in, basa la'iesak-kana. Hataholi Israel-la tao basa hata lala'en-na, sama leo hata fo MANETUALAIN paletan neu Musa.

³³Ala leni fe Musa, Lalaa Temak no basa hata-heton lala'en-na, soloka'don-nala, ai betubalan-nala, dii-la no dii ein-nala,

³⁴tatanak fo taon neme bi'ihiimane loun fo nanalosek nenik dula pilas, tatanak fo taon neme bana louk mangana'uk, teman popoti langan-na.

³⁵Peti Hehelu-balataak-ka no isin-na batu dua, no ai ndondolon-na, ma tatanan-na,

³⁶mei no basa hata-heton lala'en-na ma loti tunu-hotuk,

³⁷banu eik lilopilas isik-ka, banun-nala no basa hata-heton lala'en-na, mina soaneu banuk-ka,

³⁸mei tunu-hotu lilopilas-sa, mina feta, boomenik kaboomenik, Lalaa Temak-ka tema lelesun-na,

³⁹mei tunu-hotu liti no kafa nananala'ek neme liti mai, ai ndondolok, ma basa hata-heton lala'en-na; baak oe fo mamana sasafek-ka no buin-na,

⁴⁰temak soaneu uma so'dan-na, ma dii-la no dii ein-nala, lelesuina manai uma so'dak-ka tema lelesun-na, boema tali-nala, Lalaa Temak ai papakun-nala; basa lou-laak fo nanapakek nai Lalaa Temak dale,

⁴¹ma imam-mala bua papake makaluku-makatelen nai lelek lalalau-laoono nai Kama Malalao-malalafuk dale, ma bua papake hehelik soaneu Harun no anan-nala.

⁴²Hataholi Israel-la tao basa tatao-nono'ik ndia, sama leo MANETUALAIN paletan neu Musa.

⁴³Musa palisak basa hata lala'en-na, de nita nae ala tao lan nandaa sama leo MANETUALAIN paletan-na. Boema Musa fes baba'e-papalak.