Read Termanu KELUARAN 4 Bible Online

KELUARAN 4 - Termanu bible

KELUARAN 4

¹Boema, Musa nataa MANETUALAIN nae, “Tehu tao leo beek, fo leounik-ka hataholi Israel-la ta nau lamahele ma ta nau taoafik neu au hala-kokolang fa? Metema, leounik-ka lafa'da lae MANETUALAIN ta natu'du aoinan-na neu au fa soona, au muse tao beek?”

²MANETUALAIN natane Musa nae, “Beek manai o limam-ma ndia?” Musa nataa nae, “Aitete'ek.”

³MANETUALAIN nae, “Tapa aitete'ek ndia leo dae lain neu” Boema Musa tapan neu, de aitete'ek ndia nasafali da'di menge, boema Musa nalai leo dook-ka neu.

⁴MANETUALAIN nafa'da Musa nae, “Muu deka moo menge ndia, fo ho'u-ma ikon-na”. Musa neu deka non, de ana ho'un-na menge ndia, boema no lai-laik nasafali seluk da'di aitete'ek, nai Musa liman dale ndia.

⁵MANETUALAIN nae, “Taon leondiak, fo ela hataholi Israel-la lamahele, lae Au, MANETUALAIN, fo sila bei-ba'i kain Abraham, Isak ma Yakob Manetualain-na, natu'du basa aoinan-na neu o so.”

⁶MANETUALAIN nafa'da seluk Musa nae, “Tao o limam-ma, leo o ba'dum dale neu.” Musa taon neu, de nai lelek ana hela falik liman-na leo deak mai, te liman ndia fulak ha'do-ha'dok, nanahu la'e he'di lou mangalauk.

⁷Boema, MANETUALAIN nafa'da nae, “Tao falik o limam-ma, leo o ba'dum dale neu.” Musa taon neu, de nai lelek ana hela falik-kana, te liman ndia lea-hai so.

⁸MANETUALAIN nae, “Metema, ala ta nau lamahele o fa, do nai lelek lita manada'di beuk makasososak-ka, te ta lamahele fa, soona neukose manada'di beuk ia, taon-nalas lamahele.

⁹Metema, ala beita nau lamahele neu o boen, leomae lita manada'di beuk ka duak ia-la so, boema ala ta nau taoafik neu o hala-kokolam fa soona, ho'i-ma Lee Nil-la oen faaanaks, fo po'an neu dae lain. Neukose oe ndia, nasafali da'di daak.”

¹⁰Tehu Musa nae, “Ou, Manetualain, au hataholi esa, ta kokolak alelak fa, nau neme makahulun-na mai, do losa besak ia boe, lelek MANETUALAIN kokolak basa no au. Au maang-nga balakaik-ka, de au kokolak ma'a-ma'a, te ta lai-lai fa.”

¹¹MANETUALAIN nafa'dan nae, “See kande, fe hataholi daebafak-ka bafak? See kande, tao-na hataholi ndia hala taak, do pakek? See kande, tao-na hataholi ndia nita, do poken? Ade ta Au, fo MANETUALAIN fa do?

¹²Besak ia, muu leona, te neukose Au tulu-fali o, fo o kokolak, ma Au anoli o, hata fo o muse mafa'dan.”

¹³Tehu Musa nataa nae, “Au dokodoe, fo boso madenu au, ou Manetualain, te madenu hataholi fe'ek.”

¹⁴Boema, MANETUALAIN, namanasa nanseli, de nafa'da nae, “Ade o tolanoom esa, ta na'de Harun fa do? Au bubuluk hataholi bafa da'uk ndia; nakalenak ana mai leo ia mai, de nai eno tala'dak so; metema nita o soona, neukose namahoko nanseli.

¹⁵Kokolak moon, fo mafa'dan hata fo muse ana kokolak-kana. Neukose Au tulu-fali ma Au anoli emi dua, hata fo emi muse kokolak ma tao-no'in.

¹⁶Ana muse kokolak pake o na'dem-ma, nai laun-na matan. Neukose, ana da'di o hataholi manakokolam, de ana tao o da'di sama leo Manetualain, fo nafa'da hata fo ana muse kokolak-kana.

¹⁷Ho'i meni aitete'ek ndia, nanahu neukose o tao manada'di beuk, menik aitete'ek ndia.”

¹⁸Basa ndia boema, Musa fali ne'un leo aliaman Yitro uman neu, de nafa'dan nae, “Fe au loak fali leo Masir u, fo au u dama au tolanoong-ngala, ma au metes, ade bei laso'da do ta.” Yitro nafa'da Musa nae, “La'o no so'da-molek.”

¹⁹Lelek Musa bei nai dae Midian-na, te MANETUALAIN nafa'dan nae, “Fali leo Masir muu leona. Te mate la'iesak hataholi, fo ala nau taolisa o-a so.”

²⁰Boema, Musa leleko saon-na ma anan-nala, de nakasasa'ek-kasa neu keledei lain, de ala la'o sama-sama leo Masir leu. No Manetualain paletan-na, de Musa ho'i neni aitete'en-na boe.

²¹MANETUALAIN, nafa'da Musa nae, “Au fe basa o koasa, soaneu tao manada'di beuk-kala so. Da'di, mahani te, metema o losa Masir soona, tao basa manada'di beuk sila-la nai manek Masir-ra matan. Tehu, neukose Au tao-an nalanga batu, nalosa ana ta po'i leoina ndia la'o fa.

²²Boema, mafa'da manek ndia mae Au, MANETUALAIN, helu ae leo ia, ‘Israel nde been-na Au ana ulung-nga,

²³ de Au paleta basa o so, de po'i Au anang sila fo ala la'o, fo ela ala sene-do'ok neu Au, tehu o ta sipok fa. Besak ia, neukose Au taoissa o ana ulum-ma.’ ”

²⁴Nai leleo-lala'on-na dalek, fo nai mamana oofuk esa, MANETUALAIN mai leo Musa mai, fo Ana sanga taonisan.

²⁵Zipora, fo saoinan-na, ho'i-na batu matane esa, de ana sunat anan-na, boema ana lose daan-na neu Musa ein-na, Zipora nae, “O nde been-na saotou daak, ba'eneu au.”

²⁶Nafa'da dede'ak ndia, nana natutik no sunat-ta. Boema MANETUALAIN, ta da'di taonisa Musa fa.

²⁷Boema, MANETUALAIN nafa'da Harun nae, “Muu leo moo solokaek-ka muu, fo matongo moo Musa.” Harun neu, de natongo no fa'din-na, nai lete malalao-malalafuk-ka, de ana de'in.

²⁸Musa tui Harun, basa hata fo MANETUALAINnafa'da neun, nai lelek nadenun fali leo Masir neu, boeo ana tuin la'eneu basa manada'di beuk, fo muse ana taon.

²⁹Basa boema, Musa ma Harun leu leo Masir leu, de laloo lakabubua basa mane leo Israel-la.

³⁰Harun nanduku-nalosak neus, basa hata lala'en fo MANETUALAIN nafa'dan neu Musa, de Musa tao basa manada'di beuk-kala, nai hataholi sila-la matan.

³¹Boema lamahele, ma nai lelek lamanene lae MANETUALAIN, taoafik neu leoina Israel-la, ma nita sila doi-doson lala'en-na boema, lakaluku-lakatele.