Read Termanu KELUARAN 40 Bible Online

KELUARAN 40 - Termanu bible

KELUARAN 40

¹MANETUALAIN nafa'da Musa nae,

²“Mapadedeik Au Lalaa Temak neu bula ka esa fain esa.

³Tao Peti Hehelu-balataak fo isin-na Paleta ka sanahuluk-kala leo dalek neu, fo tao temak tatanan-na neu uluk.

⁴Pe'da mei no hata-heton leo dalek neu. Tao banu eik-kala leo dalek neu boe, fo tao banuk-kala neu banuk eik lain.

⁵Pe'da mei tunu-hotu lilopilas fo mamanak tunu boomenik-ka neu Peti Hehelu-balataak-ka matan-na, ma lolo'e tema lelesu neu Lalaa Temak lelesun-na.

⁶Pe'da mei tunu-hotuk soaneu tutunu-hohotu nanatunuk-ka neu Lalaa Temak lelesun-na matan-na.

⁷Pe'da baak oe neu Lalaa Temak no mei tunu-hotuk ndia tala'da, boema sali oe leo dalek neu.

⁸Basa soona, lofa temak neu fo ana okofeo-na Lalaa Temak so'dan-na, ma lolo'e tema lelesu neu lelesuina manai uma so'dan-na.

⁹Basa soona, o muse tunu-hotu Lalaa Temak no hata-heton lalaena leo Au, no enon-na leoiak: lose mina neu basa hata lala'en-na nenik mina feta, soona basa sila-la nanafe hehelik soaneu Au.

¹⁰Tunu-hotu mei tunu-hotuk-ka no basa hata-heton lala'en-na, no enon-na leondiak boe, fo ela basa-basan lala'en-na nanafe hehelik soaneu Au.

¹¹Tao leondiak neu baak oe no buin-na boe.

¹²Basa ndia soona, madenu Harun no anan-nala mai leo Lalaa Temak lelesun-na mai, fo ala safe aoinan-nala.

¹³Pake papake imam-ma neu Harun, ma lose mina neun, fo ela nanahele hehelik soaneu nalalau-naoono Au da'di leo imam.

¹⁴Boema madenu anan-nala mai deka, fo pake ba'du kabaek neus.

¹⁵Boema lose mina neus sama leo o lose mina neu sila aman, fo ela sila boeo hapu lalalau-laoono Au da'di leo imam. No feta mina ndia, de sila leon-na ho'u lahele imam-ma bela-ba'un neme tititi-nonosik leo tititi-nonosik neu.”

¹⁶Musa tao basa-basan lala'en-na, sama leo MANETUALAIN paletan-na.

¹⁷Boema nai bula ka esa fain esa nai teu ka dua dalek, fo lelek leoina Israel-la la'oela Masir boema, lapadedeik MANETUALAIN Lalaa Temak ndia.

¹⁸Musa pe'da buin-nala, dii-nala, tao ai betubalan-nala leu, ma napadedeik natetetu diin-nala.

¹⁹Boema ana lofa Lalaa Temak doon-na ma ana tao tema popotik neu lain, sama leo MANETUALAIN paletan-na.

²⁰Basa boema, ana pe'da batu ka duak sila-la leo Peti Hehelu-balataak dale neu. Boema Musa tatana Peti ndia tatanan neu de ana tao ai ndondolon-nala leo suek-kala dalek neu.

²¹Boema ana pe'da Peti ndia nai Lalaa Temak dale, de ana lolo'e tema popotin-na neu Peti matan-na, sama leo MANETUALAIN paleta neun.

²²Basa boema, Musa pe'da mei nai Lalaa Temak dale, nai boboan kii, fo nai temak-ka dean-na,

²³boema ana pe'da loti nanasadiak-ka neu mei ndia lain, sama leo hata fo MANETUALAIN paletan neu Musa

²⁴Ana pe'da banu eik-ka nai Lalaa Temak dale, nai boboan kona, fo nasasalematak no mei ndia,

²⁵boema ana de'de napila banuk sila-la nai MANETUALAINmatan-na.

²⁶Ana pe'da mei tunu-hotuk-ka nai Lalaa Temak dale, fo nai temak-ka matan-na,

²⁷boema ana tunu boomenik kaboomenik sama leo hata fo MANETUALAIN paletan neu Musa.

²⁸Musa lolo'e Lalaa Temak-ka tema lelesun-na,

²⁹ma ana pe'da mei tunu-hotuk soaneu tutunu-hohotuk nanatunuk-ka nai lelesu ndia matan-na. Ana tunu-hotu tutunu-hohotu nanatunuk ma tutunu-hohotu nanasadiak-ka nai mei tunu-hotuk ndia lain.

³⁰Ana pe'da baak oe liti nai Lalaa Temak no mei tunu-hotuk-ka tala'da, boema ana sali oe leo dalek neu.

³¹Musa, Harun no anan-nala safe ei liman nai ndia,

³²nai lelek ala masok leo MANETUALAIN Lalaa Temak dale leu do ala deka loo mei tunu-hotuk-ka.

³³Musa tao laa okofefeok Lalaa Temak ma mei tunu-hotuk ndia, boema ana lolo'e lelesuina uma so'dak-ka, tema lelesun-na neu. Boema basa tatao-nono'ik ndia.

³⁴ Basa boema, ko'as-sa kona mai, de ana potiketu MANETUALAIN Lalaa Teman-na, de Lalaa Temak ndia henuk no MANETUALAIN ndela-sa'an.

³⁵Hu ndia de, Musa ta hapu masok leo Lalaa Temak ndia dalek neu fa.

³⁶Metema ko'as ndia kae neme MANETUALAIN Lalaa Temak lain mai soona, leoina Israel-la ofeheni sila uma ofun-nala fo ala lali leo mamana fe'ek leu.

³⁷Tehu metema ko'as ndia ta kae fa soona, ala ta la'o leme ndia mai fa.

³⁸Nai lelek leoina Israel-la bei laleu-lalaak, MANETUALAIN nai Lalaa Temak ndia dalek fo nalupa ko'as nai fai lele'don-na, ma nalupa ha'i nai fai le'odaen-na.