Read Termanu KELUARAN 7 Bible Online

KELUARAN 7 - Termanu bible

KELUARAN 7

¹MANETUALAIN nafa'da Musa nae, “Neukose, Au tao o da'di sama leo Manetualain nai manek-ka matan, ma neukose o tolanoom Harun, ana kokolak non, da'di leo o nabim-ma.

²Manduku-malosak basa hata fo Au paletan neu o, neu Harun. Madenu Harun, fo nafa'da manek-ka, nae ana muse po'i hataholi Israel-la, fo ala la'oela nusa Masir-ra.

³ Tehu neukose, Au tao-a manek-ka da'di nalanga batu. Neukose ana ta taoafik neu o fa, leomae Au fe soe makadotok, da'di nai Masir so.

⁴Hu ndia de, neukose Au huku Masir, nenik huhuku-dodokik mabelaina, basa soona Au o leoina Israel, fo Au anang-ngala lala'en-na, kalua leme nusak ndia mai.

⁵Boema, hataholi Masir-ra neukose bubuluk, lae Au ia MANETUALAIN, nai lelek Au hukus-sala, ma nai lelek Au o Israel kalua neme sila nusan-na mai.”

⁶Musa no Harun tao tunga MANETUALAIN paletan-na.

⁷Nai lelek Musa no Harun leu leo manek-ka leu ndia, Musa teun faluhulu, ma Harun teun faluhulu telu.

⁸MANETUALAIN nafa'da Musa no Harun nae,

⁹“Metema manek-ka noke emi tao manada'di beuk, fo da'di neu buti soona, madenu Harun, fo ana ho'i-na aitete'en-na, fo ana tapan neu dae lain, nai manek-ka matan. Soona neukose, aitete'ek ndia nasafali da'di menge.”

¹⁰Boema Musa no Harun leu leo manek-ka leu, de ala tao hata fo Manetualain paleta neus. Harun tapa aitete'en-na neu dae lain, nai manek-ka ma hataholi mana'a ngga'din-nala matan, boema aitete'ek ndia nasafali da'di menge.

¹¹Hu ndia de, manek-ka boeo naloo ndia hataholi malelainan-nala, ma malela siula-tongonok-kala, de no sila malela siula-tongonoon-na, ala bisa tao leondiak boe.

¹²Ala tapa sila aitete'en-nala neu dae lain, de aitete'ek sila, lasafali da'di menge. Tehu Harun aitete'en-na ko'do heni sila aitete'en-nala.

¹³Leomae leondiak boe, manek-ka nalanga batu nahele, de ana ta taoafik neu Musa no Harun dede'a-kokolan, sama leo MANETUALAIN nafa'da basak-ka so.

¹⁴Basa boema, MANETUALAIN nafa'da Musa nae, “Manek ndia nalanga batu nanseli; ana ta nau po'i leoina Israel-la la'o fa.

¹⁵Hu ndia de, fafaianak soona, meu matongo moon, nai lelek neu leo Lee Nil-la neu. Ho'i meni aitete'ek fo nasafali da'di menge ndia, fo mahani mamain-na, nai lee su'un-na.

¹⁶Mafa'da manek ndia mae, MANETUALAIN, fo hataholi Ibrani-la Manetualain-na, nadenu au, fo afa'da au Ama Maneng, fo ela po'i Anan-nala, fo leu sene-do'ok neun nai moo solokaek-ka. Tehu losa besak ia, au Ama Maneng-nga, ta nau namanene fa.

¹⁷ Hu ndia de, MANETUALAIN, nafa'da nae leo ia, ‘Neme hata fo neukose, mahani te Au taon soona, neukose o bubuluk mae Au nde MANETUALAIN. Neukose au fepa aitete'ek ia neu lee-a oen lain, fo oen-na nasafali da'di daak.

¹⁸Neukose mate i'ak-kala, fo lee ia neukose naboo pulu, nalosa leoina Masir-ra, ta hapu linu oen-na fa.’ ”

¹⁹MANETUALAIN, nafa'da Musa nae, “Madenu Harun, fo ana ho'i-na aitete'e-na, fo leleuk-kana leo basa lee-la, oelolok-kala ma lifu-lifu manai Masir-ra. Neukose oen-nala da'di daak, ma neukose hapu daak nai nusak-ka lala'en-na, nakalenak nai tong ai-la dalek, ma nggusi batu-la dalek.”

²⁰Musa no Harun tao hata fo MANETUALAIN paletan. Nai manek-ka, ma hataholi mana'a ngga'din-nala matan, Harun so'u laik aitete'en-na, de ana fepa Lee Nil-la oen-na, boema oen-na nasafali da'di daak.

²¹Mate basa i'ak manai lee ndia dalek, de laboo pulu nanseli, nalosa hataholi Masir-ra ta bisa linu oe ndia fa. Hapu daak nai basa dae Masir-ra lala'en-na.

²²Tehu, basa malela siula-tongonok Masir-ra, ala tao leondiak boe, nenik sila malela siula-tongonoon-na, nalosa manek-ka nalanga batu nahele. Sama leo hata fo MANETUALAIN nafa'da basan so, nae manek-ka ta nau namanene Musa no Harun fa.

²³Nakalenak, ana fali ne'un leo uma manek-ka neu, no ana ta taoafik neu manada'dik ndia faaanak boen.

²⁴Basa hataholi Masir-ra, ala kali bolok ndolo-ndolo lee-la su'un-na, fo ala sanga oe nininuk, nanahu ta bisa linu lee ndia oen-na fa.

²⁵Seli faik hitu so, MANETUALAIN soo-supa Lee Nil-la.