Read Termanu KELUARAN 8 Bible Online

KELUARAN 8 - Termanu bible

KELUARAN 8

¹Boema MANETUALAIN, nafa'da Musa nae, “Muu leo manek-ka muu, fo mafa'dan Au hala hehelung-nga nde ia nae, ‘Po'i Au anang-ngala la'o, fo leu sene-do'ok neu Au.

²Metema o ta nau fa soona, neukose Au fe lo'donggelek-kala mai, fo henu nusak ia, fo da'di leo huhuku-dodokik.

³Neukose Lee Nil-la, henuk no lo'donggelek-ka, nalosa bana sila-la kalua mai, fo leu leo o uma manem dale leu, ma leu leo o kama susungum dale, ma o pepe'um lain leu, leu leo o manapaletam-mala ma laun-nala uman dale leu, nakalenak leu leo mamana tutunu loti-la dalek, ma kete-la dalek leu.

⁴Lo'donggelek sila-la, neukose lakaboku fo lakalala'ba o, basa manapaleta-la, ma laun-nala.’ ”

⁵MANETUALAIN nafa'da Musa nae, “Madenu Harun, fo nakandoondoo aitete'en-na neu lee-la, oelolok-kala, ma lifu-la lain, fo ela lo'donggelek-kala poka mai, fo dae Masir-ra henuk no lo'donggelek-ka.”

⁶Boema, Harun leleuk aitete'en-na leo basa oe-la lain neu, boema lo'donggelek-kala poka mai, de henu nusak ndia.

⁷Tehu, basa malelak siula-tongonok-kala, pake sila malela-nala boe, de lo'donggelek-kala poka mai, nai nusak ndia.

⁸Boema, manek-ka naloo Musa no Harun, de nafa'das nae, “Hule-haladoi neu MANETUALAIN, fo ela Ana tao namopo lo'donggelek ia-la soona, neukose au po'i o leoinam-ma la'o, fo leu tunu-hotu tutunu-hohotuk soaneu MANETUALAIN.”

⁹Musa nataa nae, “No namahokok, neukose au hule-haladoi soaneu au Ama Maneng. Maketu fain-na, soona neukose au hule-haladoi fe au Ama Maneng-nga, basa manapaleta-la, ma laun-nala. Soona, neukose au Ama Maneng-nga, natapo'i neme lo'donggelek ia-la mai, fo ta ela esa boen, ela ka'da manai Lee Nil-la.”

¹⁰Manek ndia nataa nae, “Balahaa soona, hule-haladoi fe au.” Musa nae, “Neukose au tao atetu au Ama Maneng-nga nonoken-na. Soona neukose, au Ama Maneng-nga bubuluk, nae ta hapu Manetualain fe'ek, sama leo MANETUALAIN, fo ami Manetualaim-ma.

¹¹Neukose, Ana soi-po'i au Ama Maneng-nga, basa manapaleta-la ma laun-nala, leme lo'donggelek sila-la mai. Ta hapu lo'donggelek nai uma-la so'on, ela ka'da manai Lee Nil-la.”

¹²Boema, Musa no Harun la'o leona. Basa boema, Musa hule-haladoi neu MANETUALAIN, fo ela Ana tao namopo lo'donggelek fo Ana fen neu manek-ka ndia.

¹³MANETUALAIN sipok Musa nonoken-na, de mate la'iesak lo'donggelek manai uma-la, manai uma-la so'dan-na, ma manai tina-la.

¹⁴Hataholi Masir-rala, hehele lakabubua lo'donggelek mates sila-la, de ladodou, nalosa basa nusak-ka lala'en-na naboo pulu.

¹⁵Lelek manek-ka nita, nae lo'donggelek sila-la mates so, boema nalanga batu. De sama leo hata fo MANETUALAIN nafa'da basan nae, manek-ka ta nau taoafik neu Musa no Harun hala-kokolan fa.

¹⁶MANETUALAIN nafa'da Musa nae, “Madenu Harun, fo ana fepa aitete'en-na neu dae lain, soona daesopuk manai nusa Masir-ra lala'en-na, neukose nasafali da'di nenik.”

¹⁷Boema, Harun fepa aitete'en-na neu dae lain, de daesopuk manai Masir lala'en-na, nasafali da'di nenik, de lakamomotu-la hataholi-la ma bana-la.

¹⁸Basa malela siula-tongonok-kala, ala sanga enok lenik sila malelan-nala, fo lakadada'dik nenik boe, tehu ta da'di fa. Nenik-kala nai basa mamanak lala'en-na,

¹⁹ nalosa basa malela siula-tongonok sila-la, lafa'da manek-ka lae, “Manetualain nde tao ia.” Tehu, manek ndia nalanga batu nahele, de sama leo hata fo MANETUALAIN, nafa'dan nae, manek ndia, ta nau taoafik neu Musa no Harun hala-kokolan fa.

²⁰MANETUALAIN nafa'da Musa nae, “Lolebalahaak soona, muu leo manek-ka muu, nai lelek ana kona leo lee dale neu, fo mafa'dan, Au hala-kokolang nde ia nae, ‘Po'i Au anang-ngala la'o, fo leu sene-do'ok neu Au.

²¹Metema o ta nau fa soona, neukose Au fe pena-la mai leo o mai, leo manapaleta-la ma laun-nala. Hataholi Masir-ra uman-nala, nakalenak basa nusak-ka lala'en-na, henuk no pena.

²²Tehu neukose Au ta'da fe'e nusa Gosyen-na, fo Au anang-ngala mamana leleon-na. Neukose ta hapu pena nai naa fa, fo ela emi bubuluk, mae Au, fo MANETUALAIN nde manatao manada'dik ndia.

²³Neukose Au ta'da fe'e Au anang-ngala loo o laum-mala. Balahaa soona, neukose manada'di beuk ndia ana da'di.’ ”

²⁴MANETUALAIN fe pena makadotok nanseli leo uma manek-ka, ma basa manapaleta-la uma-nala neu. Basa nusa Masir-ra lala'en-na doi-doso lanseli, nanahu pena sila-la.

²⁵Basa boema, manek-ka naloo Musa no Harun, de nafa'da nae, “Meu tunu-hotu tutunu-hohotuk soaneu emi Manetualaim-ma, tehu ka'da nai nusak ia dalek.”

²⁶Musa nataa nae, “Malole lenak bosok, nanahu ami tutunu-hohotum sila-la, neukose ana da'di nakamumuluk-nakamamaek ba'eneu hataholi Masir-ra, de tao leo bee-o ala pia lisa ami.

²⁷Ami muse meu leo mook solokaek-ka meu, fo dodoon-na la'ok faik telu, soaneu ami tunu-hotu tutunu-hohotuk neu MANETUALAIN, fo ami Manetualaim-ma, sama leo paletan neu ami-a.”

²⁸Boema manek-ka nafa'da nae, “Hei, au po'i emi meu leo mook solokaek-ka meu, fo tunu-hotu tutunu-hohotuk soaneu MANETUALAIN, fo emi Manetualaim-ma, sa'di boso meu leo dook-ka meu. Mafandendelek, fo hule-haladoi fe au!”

²⁹Musa nataa nae, “Au la'o, fo no lai-laik au hule-haladoi neu MANETUALAIN, fo ela balahaa soona, pena sila-la la'oela au Ama Maneng-nga, basa manapaleta-la, ma laun-nala. Tehu, boso ke'di-ndiu seluk ami bai, ma boso mapanggengge leoina Israel-la, fo leu tunu-hotu tutunu-hohotuk soaneu MANETUALAIN.”

³⁰Musa la'o leona, boema ana hule-haladoi neu MANETUALAIN,

³¹de MANETUALAIN sipok Musa huhule-haladoin. Pena sila-la, ala laa la'oela manek-ka, basa manapaleta-la, ma laun-nala. Ta ela esa boen.

³²Tehu oek ia boe, manek-ka nalanga batu, de ana ta po'i leoina ndia, la'o fa.