Read Termanu KELUARAN 9 Bible Online

KELUARAN 9 - Termanu bible

KELUARAN 9

¹MANETUALAIN nafa'da Musa nae, “Muu leo manek-ka muu, fo mafa'dan mae MANETUALAIN, fo hataholi Ibrani-la Manetualain-na, nafa'da nae, ‘Nemen-na, fo Au anang-ngala la'o, fo ela ala hapu sene-do'ok neu Au.

²Metema, o ta nau po'i fas soona,

³neukose Au fe he'di-laus matuaina la'e o bana-manum, ndala, keledei, unta, sapi, bi'ilopo ma o bi'ihiim-mala.

⁴Neukose, Au ta'da fe'e hataholi Israel-la bana-manun, neme hataholi Masir-ra bana-manun mai. Neukose, hataholi Israel-la bana-manun, ta mate esa boen.

⁵Au, fo MANETUALAIN aketu basa, balahaa soona, Au tao dede'ak ndia.’ ”

⁶Balahaa boema, MANETUALAIN taon sama leo hata fo nafa'da basan so. Mate basa hataholi Masir-ra bana-manun, tehu hataholi Israel-la bana-manun soona, ta mate esa boen.

⁷Manek-ka natane hata fo ana da'di so, boema ala tuin lae ta mate hataholi Israel-la bana-manun esa boen. Tehu, manek-ka nalanga batu, de ana ta nau po'i leoina ndia la'o fa.

⁸MANETUALAIN nafa'da Musa no Harun nae, “Ho'i-ma, afu nafanggetek de'ubee neme la'o dale mai. Fo Musa muse tapa afu ndia leo lalai neu, nai manek-ka matan.

⁹Soona afu ndia, neukose ana tapasasala leo basa dae Masir-ra lala'en-na neu. Neukose afu ndia, neni bisu nggumak fe hataholi ma bana-manu, fo ka'din soona, ana da'di bisu mananak.”

¹⁰ Boema Musa no Harun ho'i afu, de leu leo manek-ka leu. Musa tapa afu ndia leo lalai neu. Afu ndia neni bisu nggumak fe hataholi ma bana-manu, fo ka'din soona, ana da'di bisu mananak.

¹¹Basa hataholi malelak siula-tongonok-kala, ta bisa lasale leo Musa neu fa, nanahu basa aoinan-nala lala'en-na, henuk no bisu nggumak, sama leo hataholi Masir fe'ek-kala.

¹²Tehu MANETUALAIN tao-na manek-ka da'di nalanga batu, de sama leo hata fo MANETUALAIN nafa'da basan nae, manek-ka ta nau taoafik neu Musa no Harun hala-kokolan fa.

¹³MANETUALAIN nafa'da Musa nae, “Fafaianak nanseli soona, muu leo manek-ka muu, fo mafa'dan, mae MANETUALAIN fo hataholi Ibrani-la Manetualain-na, nafa'da nae, ‘Po'i Au anang-ngala, fo ela ala sene-do'ok neu Au.

¹⁴Oek ia soona, neukose Au fe soe-a ta la'e ka'da manapaleta-la, ma laun-nala mesak-kana fa, tehu neu o boe, fo ela o bubuluk, mae ta hapu hataholi nakasusu'dik no Au, nai daebafak-ka lala'en-na fa.

¹⁵Leounik-ka, Au nau huku o ma o laum-ma nenik he'di-laus soona, tao leo bee o, mopo-mate la'iesak emi so.

¹⁶ Tehu, Au po'ilotak emi maso'da, fo ela Au hapu atu'du Au koasang-nga neu o, nalosa Au na'deng-nga da'di nanakoa-kiok nai basa daebafak-ka lala'en-na.

¹⁷Leomae leondiak boe, o bei koao-ndaeao boe, de o ta nau po'i Au anang-ngala la'o fa.

¹⁸Balahaa fafaik, nai li'u sama leo ia boe, neukose Au fe u'da eis matuaina mai, sama leo ana beita da'di nita nai Masir, neme makahulun eli losa besak ia fa.

¹⁹Boema fe paleta, fo ela basa o bana-manum, ma o hata-hetom manai kota deak-ka, lenis leo mamana nee-nee lino-linok-ka neu. Basa hataholi ma bana-manu manai kota deak, fo ala ta hapu mamana nasulu-nahapak fa, neukose u'da eis-sa tuni nisas.’ ”

²⁰Nai hataholi manaho'u paleta-la dalek, hapu de'ubee bii-lamata'u neu MANETUALAIN hala-kokolan. Loo atan-nala ma bana-manun-nala leu leo uma dale leu, fo ela ala hapu nasulu-nahapak.

²¹Tehu sila nggelok ta tao dalek neu hala nasanene'dak ndia fa, de ala po'ilotak atan-nala ma bana-manun lahele leme mook-ka.

²²Boema, MANETUALAIN nafa'da Musa nae, “So'uk o limam-ma leo lain neu, fo neukose u'da eis-sa mai nai basa dae Masir-ra lala'en-na. Neukose u'dan ndia, tuni-na hataholi daebafak-ka, bana-manu ma basa bubu'u-palusa manai tina lala'en-na.”

²³Boema Musa so'uk aitete'en-na leo lain neu, de MANETUALAIN nakona mangguluk-ka, ma u'da eis-sa, ma ta'tas-sa teen-na daebafak. MANETUALAIN fe

²⁴ u'da eis matuaina mai, sama-sama no ta'tas-sa tu'ti-nato. Ndia nde u'da eis matuainan nanseli, nai Masir susula tutuin dale.

²⁵Nai basa nusak-ka lala'en-na, u'da eis ndia, ana tao namopo-namate basa hata lala'en-na nai tina, ma hataholi daebafak-ka no bana-manu boe. Nalutu basa bubu'u-palusa manai tina-la, ma ai-la tu'u leu.

²⁶U'da eis-sa, ta tuni la'e ka'da nusa Gosyen-na, fo hataholi Israel-la mamana leleon-na fa.

²⁷Boema, manek-ka naloo Musa no Harun, de nfa'da nae, “Au asala-asingo so. MANETUALAIN nde ndoos-sa, te au ma au laung-ngala, tao salak so.

²⁸Hule-haladoi neu MANETUALAIN leona; ami doi-dosom-ma dai so, nanahu mangguluk ma u'da eis ia. Neukose, au po'i emi la'o. Emi boso boe leo meme ia bai.”

²⁹Musa nafa'da manek-ka nae, “Au losa kota deak tutik-ka, neukose au so'uk au limang-nga, fo au hule-haladoi neu MANETUALAIN. Neukose mangguluk-ka hahae, ma u'da eis-sa neukose nakamate, fo ela au Ama Maneng bubuluk, nae daebafak ia, MANETUALAIN nuun.

³⁰Tehu au bubuluk, ae au Ama Maneng-nga, ma basa manapaleta-la, beita bii-lamata'u neu MANETUALAIN boen.”

³¹Nalutu bubu'u-palusa abas ma betek-kala, nanahu abas-sa nabuna, ma betek-kala mapulek.

³²Tehu, ta nalutu gandum-ma, ma ai de'ek-kala fa, nanahu beita losa sila fain-na fa.

³³Boema, Musa la'o leona, de neu leo kota deak neu; nai ndia, ana so'uk liman-na, fo ana hule-haladoi neu MANETUALAIN. Hatematak ndia boe, mangguluk-ka, u'da eis-sa ma u'dan-na hahae.

³⁴Lelek manek-ka nita manada'dik ndia boema, nasala-nasingo seluk. Ndia no manapaletan-nala, lalanga batu lahele.

³⁵Sama leo hata fo MANETUALAIN nafa'dan tunga Musa nae, manek-ka ta nau fe hataholi Israel-la loak, fo ala la'o fa.