Read Termanu AYUB 1 Bible Online

AYUB 1 - Termanu bible

AYUB 1

¹Touk esa na'de Ayub, ana leo nai dae Us-sa Ana sene-do'ok, ma ana lilineka neu Manetualain. Hataholi ia, hataholi dale malole, ma ana ta tao tatao-nono'i mangalauk faaanak boen.

²Anatoun 7, ma anainan 3.

³Fe'ek neme ndia mai boe, nanuu ata makadotok, bi'ilopo 7.000, onta 3.000, sapi 1.000, ma keledei natun lima. Dede'a keke'un-na hataholi ia nde been-na, hataholi kamasu'ik nanseli, nai laun manai nusak Dulu-a dalek.

⁴Ayub anatou ka hitun-nala, biasa ala tao feta nai esa-esak uman langganggatik. Ala ka'i Ayub anafe'o ka telun-nala boe, fo la'a-linu sama-sama.

⁵Metema basa feta esa soona, Ayub fo'a fafaianak tatas esa, fo ana tunu-hotu tutunu-hohotuk soaneu anan-nala esa-esak, fo ela MANETUALAIN fes do'o do ampon. Nana Ayub dodoo nae, bole da'di anan sila-la tao basa sala-singok, ma ta lame'da fa te, lakamumulu-lakamamaek Manetualain so.

⁶ Faik esa boema, mahahaek nusa so'dak-kala, leu leo MANETUALAIN leu, de nitu neu boe.

⁷MANETUALAIN natanen nae, “O meme bee mai?” Nitu nataa nae, “Besak-ka, atam-ma naleu-nalaak su'di leo bee neu, ma au la'ok okofefeo daebafak-ka.”

⁸Boema, MANETUALAIN natanen nae, “Ade o taoafik neu Au atang Ayub do ta? Nai basa daebafak-ka lala'en-na, ta hapu hataholi lilineka leondiak, ma dalen-na malole sama leo ndia fa. Ana sene-do'ok neu Au, ma ana ta tao tatao-nono'i mangalauk makandondook fa.”

⁹ Tehu, nitu nataa nae, “Tao leo bee-o, Ayub sene-do'ok neu O, nana ana sipo baba'ek.

¹⁰O masulu-mahapa uma isin-nala, ma su'i-beten lala'en-na tataas esa. O ba'e-pala ue-le'din, ma O fen bana-manu makadotok, dai soaneu ala tao lahenu nusak-ka lala'en-na.

¹¹Tehu, leouni'ka, O ho'i falik su'i-beten sila-la lala'en-na soona, tao leo bee-o, ana nakamumulu-nakamamaek O tutik nenik dede'a kokolan.”

¹²Boema MANETUALAIN nafa'da nitu-a nae, “Basa Ayub su'i-beten lala'en-na, nai o koasam dale, sa'di boso tao mahe'di aopaan-na!” Boema nitu-a la'o neme MANETUALAIN matan-na mai.

¹³Basa faik de'ubee boema, Ayub anan-nala tao feta nai ka'a uluk-ka uman.

¹⁴No kaiboik, ata esa nalai-nalai mesan leo Ayub uman na neu, de nafa'dan nae, “Tuan, hataholi Syeba-la ala mai, de ala sapu-la ami, nai lelek sapi-la bei lakauuk tina-la, ma keledei-la bei la'a na'u deka lai ndia. Boema ala kalo leni bana sila-la, ma ala taolisa Tuan atan manai sila-la. Ela ka'da atam-ma mesak-kana naso'da, de atam-ma mai nafa'da Tuan.”

¹⁶Lelek ana bei kola-kola te, ata ka dua, ana mai de nafa'da nae, “Ta'tas-sa ho'i Tuan bi'ilopon-nala loo basa manafoo-la, de mate la'iesak-kasa. Ela ka'da atam-ma mesak-kana naso'da, de atam-ma mai nafa'da Tuan.”

¹⁷Ana beita kokolak basa fa te ata ka telu-a ana mai neni halak-ka nae, “Manabonga uma Kasdim bubuak telu, ala kalo leni Tuan ontan-nala, ma ala taolisa Tuan atan-nala. Ela ka'da atam-ma mesak-kana naso'da, de atam-ma mai nafa'da Tuan.”

¹⁸Lelek, ana bei kola-kola te, ata fe'ek esa mai, de neni halak-ka nae, “Tuan anan-nala tao feta nai Tuan ana ulun-na uman.

¹⁹No kaiboik, ani sangu-a ana mai neme moo solokaek-ka mai, de ana tao natu'u uma ndia, de mate la'iesak Tuan anan-nala. Ela ka'da atam-ma mesak-kana naso'da, de atam-ma mai nafa'da Tuan.”

²⁰Boema, Ayub fo'a napadeik, de ana sii-sii lulu'i bua papaken-na ma ana nggeu polik langan-na, da'di ta'du-tana dale-he'dik. Basa boema ana senek,

²¹ma nafa'da nae, “Au inang bongi au-a, au ta eni hata esa boen, de neukose au mate boeo, au ta eni hata esa boen. MANETUALAIN nde fe-a, de MANETUALAIN boeo nde ho'i falik-kana. Koa-kio na'den-na!”

²²Da'di, leomae Ayub la'ola'di basa susa-soe sila-la, tehu ana ta tao sala-singok, ma ana ta fe salak neu Manetualain fa.