Read Termanu AYUB 10 Bible Online

AYUB 10 - Termanu bible

AYUB 10

¹Au pela-malua au so'dang-nga, boema, au kalua heni basa au samaneng-nga hoo-nggu'ung.

²Neukose, au afa'da Manetualain ae, Ou Manetualain, boso fe salak neu au; Mafa'da mangalele'do, tao le'e de, O la'ban au.

³Hapu nanalak hata, metema O tuni-ndeni leoiak, de O tu'u-tapa heni, O ue-le'dim buna-boan? Hapu nanalak hata, metema O sipok hataholi mangalauk-kala, hahapun, ma dale tutu'un-nala?

⁴O mata memetem-ma, ta sama no hataholi daebafak-ka, mata memeten-na fa

⁵ma O teum-ma, ta keke'uk, sama leo teun-na fa.

⁶Metema, leondiak soona, tao le'e de, O sanga au sala-singong lala'en-na? tao le'e de, O usi salang-ngala esa-esak?

⁷Tunga ndoon-na, O bubuluk ma mame'da, mae au salang ta, tehu ndoos. O bubuluk mae ta hapu esa boen ana soi-tefa nala au neme O limam-ma mai fa.

⁸O limam-ma, nde taon-na au, alupa hataholi-a, masa bole esak ia, O sanga tao mamopo-mamate au?

⁹Mafandendelek te, O makadada'dik au neme dae ulek-ka mai! Masa bole, O taom-ma au, da'di dae sopok seluk?

¹⁰O fe au amang, bisa nakadada'dik au, ma O fe au amatua, nai au inang tein dale.

¹¹O tao au aopaang-nga nenik duik ma uak; O fe au duing-nga, nanuu aoisik, de au loung-nga poti ketun.

¹²O fe au aso'da; ma O sue-lai au, O manea au so'dang-nga, nenik O makaboboi au.

¹³Tehu besak ia au bubuluk ae sekom-ma basandia, te no denge-dengek, O tutu'u au fai soeng-nga.

¹⁴O maku au, fafa'kama au tao salak, fo ela O ta fe au do'o do ampon fa.

¹⁵Metema, au tao sala-singok, soona te'e-te'e, soe ba'eneu! Tehu metema, au tatao-nono'ing ndoos boeo, O mafa'da mae, au tao sala-singok ahele! Au ta apalani, botik au langang-nga fa, nana au amae'da dale he'dik, ma nananakamumulu-nakamamaek.

¹⁶Metema, au hapu buna-boak, leomae ta ba'uk fa, O usi au sama leo singa, ma O matu'du seluk, O koasam-ma, fo ka'da, soaneu O makabibiik au.

¹⁷O hela sakasii tataas esa, fo la'ban au; ma O nasa-melum, boetai namatuak-ka, soaneu au. O madenu solda'du beuk-kala, fo ala sapu-la au, ma latee-lata'ti loo au.

¹⁸Tao le'e de, O po'ilotak au, nanabongik leo daebafak-ka mai? Malole lenak, hataholi beita nita au fa te, mate au leona!

¹⁹Soona nono'kabai, au beita nanabongi nitak fa, nana, au kalua eme au inang tein dale mai tuti'ka, au nananatoi-natonok.

²⁰Ah, ta dook-ka so'on te, neukose mate au so, soona nemen-na, fo au mesang-nga, fo ela, au hapu ame'da ita, au le'do-faing, fo bei elak ia.

²¹Ta dook-ka so'on te, au u leo nusa makahatuk, ma makiuina dalek u, fo au ta fali so'on,

²²nusa makahatuk, ma henuk no tasi'bu-a, fo nai bee, mangale'dok-ka, sama no makahatuk-ka.”