Read Termanu AYUB 13 Bible Online

AYUB 13 - Termanu bible

AYUB 13

¹Au ita hai, ma au amanene matang, basa sila-la so, de te'e-te'e, au alak-kana.

²Hata fo emi malelak-kana, au alelak-kana boe; boso maedaenga, emi sengi au.

³Tehu, au sanga kokolak o Ndia fo, Manakoasa; au hii asala'e au dede'ang-nga, nai Manetualain matan.

⁴Nana, emi mafuni emi nggoam-ma, ma emi tipu-daim-ma, emi sama leo, hataholi malelak pepekok-kala.

⁵Leo uni'ka, emi ta kokolak fa soona, fafa'kama, lafa'da lae, emi manatee-tenok.

⁶Hu ndia de, amanene au hala sese'ing-nga, ma taoafik neu, au hala nasala'eng-nga.

⁷Ade, bole no Manetualain na'den-na, emi masapepeko-masandandali do? Ade, bole emi masapepeko-masandandali soaneu Manetualain paluun-na do?

⁸Ade, bole emi mook Manetualain, fo masala'en, da'di leo hataholi masala'e dede'ak do?

⁹Metema, Manetualain palisak emi soona, neukose buna-boan malole do ta? Ade, emi bisa ke'di-ndiu man, sama leo ke'di-ndiu hataholi daebafak-ka do ta?

¹⁰Metema, emi mamabela seselik, leomae no denge-dengek boe, neukose, Manetualain huku emi, nenik huhuku mabelaina.

¹¹Ade, Manetualain matua-mademan, ta tao nanggengek emi dalem-ma fa do?

¹²Emi nanoli-nafa'dam lala'en-na, sama leo daesopu sosoa-ndandaa tak-ka; emi nasala'em-ma, sama leo dae manuteik-ka, fo mu'dak lai esak-kana, hea ba'en.

¹³Hu ndia de, denge-denge leona, nemen-na, fo au kokolak! Ninenin-na leo beek boeo, au ta afaduli fa!

¹⁴Au aheheleaong, soaneu ase'o au so'dang-nga!

¹⁵Au daleng-nga kisak, nana ketu au namahehenang-nga so! Metema, Manetualain sanga taonisa au soona, au ta aule-ahelu fa, tehu, neukose au asala'e ha'da-paliing, nai matan-na.

¹⁶Fafa'kama, hu kande au napalaning ndia, de au aso'da, nana, hataholi mangalauk-ka, neukose ta napalani, nasasalematak no Manetualain fa!

¹⁷Besak ia, mamanene matalolole, au dede'a-kokolang leona; taoafik neu, au nafa'da mangalele'dong-nga.

¹⁸Au dede'ang-nga, nanasadia basak po'a-bengan; au amahele, au salang ta.

¹⁹MANETUALAIN, metema O mai fo kalak au soona, neukose au denge-denge ma au ahani ka'da au fai mamateng-nga.

²⁰Tehu tao matetu au dokodoeng kaduak ia la, fo ela au apalani asasale matak O seluk;

²¹boso fepa-li'u au ba'in, ma boso fe O nasa-melum matuainam-ma la'e au ba'i!

²²Kokolak leona, soona neukose au fe natataak. Do ela au kokolak, fo fe babalan-na!

²³Au tao sala singok ba'ubee? Ela leo been-na O mafa'da basa au malena langang-nga!

²⁴Tao le'e de O makadedeak ma la'o neme au mai? Hu beek de O tao au da'dik O musu nom?

²⁵Au ka'da akidok manakonok metema anin-na la'en, masa bole O makabibiik au! Au ka'da ha'de ai tuuk ma manamalek, masa bole O usi mahele au!

²⁶O maketu basa ua-nale makahe'duk-ka ba'eneu au; O fe babalak neu au sala-singon nai au fai muli-solung-nga

²⁷ Au eing-nga O pa'an nenik namosina besik; basa au heheo-hihilung O taoafik neu. Nalosa au ei dalen boeo, ta natapo'ik neme O mata memetem-ma.

²⁸Boema au da'di sama leo ai po'ok kabook-ka; sama leo anek-ka na'a temak-ka, au da'di leondiak.