Read Termanu AYUB 14 Bible Online

AYUB 14 - Termanu bible

AYUB 14

¹Mulai neme hataholi ndia bongin mai-a, aon-na manandole-ndakuk, ma be'i-balakain ta; So'dan-na keke'uanak, boema henuk no doidosok-ka.

²Ana napena, ma ana male, sama leo bunga; mopok-kana, sama leo salaok-ka, fo mopon nakandoo.

³Ou Manetualain, masa bole, O nau makanae au, ma O moo au leo, O manakee-manafulam, matan neu!

⁴Ade, hapu hataholi daebafak masala-masingok-ka, bisa neni hata fo, matetu-mandaak do?

⁵O maketu basa, hataholi daebafak-ka, teun-na so; O maketu basa bulan-na, dede'un-na so. O maketu so'dan-na, too-lanen boe; de ta bisa, ana nggani seli fan.

⁶Nemen-na, fo ana hahaeaon-na, de boso eetok-kana; fo ela, ana hapu na'a nita ue-le'din buna-boan, nai maso'dan-na dalek, losa basa bela-ba'un.

⁷Bei hapu namahehenak, ba'eneu ai nanalo'o henik-ka, nana neukose, anabuku seluk, boema nandana.

⁸Leomae po'o okan-na nai dae dale, ma huu nanalo'o henik-ka maten, nanahu po'on,

⁹tehu, metema oe la'en soona, ana moli seluk; fo sama leo bubu'u-palusa manamoli beuk-ka, de bukun-nala mulai da'di seluk.

¹⁰Tehu metema, hataholi daebafak-ka maten soona, basa so; maten soona, ana leo bee neu?

¹¹Sama leo, oe namasu neme dano dale mai, sama leo lee oen-na le'e faa-faa losa ma'dan,

¹²leondiak boe, hataholi manamate basak-ka: Neukose, ana ta bisa fo'a falik so'on. Losa mopo lalai boeo, neukose, ana ta nggenge fa, ana sungu nakandoo, te ana ta fo'a so'on.

¹³Mafuni au, nai hataholi manamatek-ka daebafan dale; masulu-mahapa au, losa O ta mamanasa so'on Tehu maketu faik, soaneu mafandele au aoinang-nga.

¹⁴Nana metema, hataholi daebafak-ka maten soona, ade, ana bisa fo'a falik do ta? Au ahani, neme faik leo faik neu, losa au fai toto'a-tatang ia sapu-lalo.

¹⁵Soona neukose, O maloo au, fo au boeo, fe natataak; Neukose, O sue-lai seluk au, mahahaek fo, O makadada'dik-ka;

¹⁶Boema, neukose O manea au ei nggangganing lala'en-na, tehu O ta taoafik neu, au sala-singong so'on.

¹⁷Neukose, O fe do'o do ampon neu au sala-singong, ma O tu'u-tapa henis; neukose, O koka heni, au sala makahulung-ngala.

¹⁸Neu fai makabuin te, neukose letek-kala ndefa fo lakalulutuk, ma lete batu mateaina, neukose ana keko heok, neme mamanan-na mai.

¹⁹Oe manafaa matuaina, neukose na'a faa-faa no batu-la; neukose, u'dan matuaina, tao natenak heni dae-a. O tao makalulutuk hataholi daebafak-ka, namahehenan-na leondiak.

²⁰O sengin losa dodoon-na; O madenun fo ana la'o, ma O tao masafali mata-panan.

²¹Anan-nala da'di hataholi nananita-nalelak, tehu ana ta bubuluk-kana fa. Ma metema, ala da'di hataholi nananakamumulu-nakamamaek soona, ta hapu hataholi nafa'da fan.

²²Ka'da name'da ao paan-na makei; ma dalen-na, ka'da doi-doso no dale he'dik-ka.”