Read Termanu AYUB 15 Bible Online

AYUB 15 - Termanu bible

AYUB 15

¹Boema Elifas nataa nae, “Ayub, o kokolak bafa louk ndia. O hala-kokolam te'e-te'e, sosoa-ndandaan ta! Ta hapu hataholi malelak ma manatee-tenok-ka nataa, sama leo o ia fa, fo ta nasala'e aoinan-na, nenik dede'ak fo, sosoa-ndandaan ta ndia fa.

⁴Leouni'ka, tunga o kokolam ndia soona, ta hapu hataholi esa boen ana bii, do ana hule-haladoi seluk neu Manetualain fa.

⁵O hala-kokolam da'di buti, nae o masalak, tehu o mafuni o tatao-nono'im, nenik o maa mangana'um-ma.

⁶Ta paluu, au kalaak do au fe salak neu o fa, nana, hu kande o hala-kokolam, de o nanakalaak.

⁷O maedaenga, hataholi daebafak fo nanabongi makasososak-ka, nde o do? Lelek letek-kala, nananakadada'dik-ka, o nai ndia do?

⁸Ade, o mamanene Manetualain tao dale tutu'un-na do? Ade, ka'da o mesam-ma nde, manuu hataholi daebafak-ka manatee-tenon-na do?

⁹Basa hata lala'en fo o malelak-kana, ami boeo, malelak-kana; basa hata lala'en fo o malak-kana, mangale'dok ba'eneu ami boe.

¹⁰Ami sipo manatee-tenok ia, neme hataholi fo, langan-na mofa so; bongi hataholi sila te, beita bongi o amam fa!

¹¹Tao le'e de, o ta sipok Manetualain kokoe-nanasin fa? Ami kokolak no ta haelai mamanasa, ma mangana'uk, nenik Manetualain na'den-na.

¹²Tehu, o mamanasa, de o matam-ma pila;

¹³o mamanasa Manetualain, de o mase'i mon.

¹⁴ Ade, hataholi daebafak-ka, salan ta makandondook do? Ade, bisa ndia ndoos, nai Manetualain matan-na do?

¹⁵Nakalenak, ata nusa so'dak-kala boeo, Manetualain ta namahele fas; nana tunga Manetualain mata memeten-na, sila ta malalao-malalafuk fa.

¹⁶Muda hata no hataholi daebafak fo, dudu'a-aafi tak ma manggenggeok, fo ninu tatao-nono'i mangalauk-ka, sama leo oe-a.

¹⁷Mamanene Ayub, fo au afa'da mangalele'do o, hata esa,

¹⁸hata fo hataholi malelak ma manatee-tenok-kala lanolin neu au. Ala sipo nanolik sila, neme bei-ba'i kain-nala mai de ala tuin la'i esak-kana neu tititi-nonosin-nala.

¹⁹Lelek ndia, hataholi nusa dea, ta leo nai sila nusan-na fa,; ta hapu hata esa boen, tao nalas latofa-latalak leme Manetualain mai fa.

²⁰Hataholi manatao tatao-nono'i mangalauk, fo manatuni-ndeni nonoo hataholin-na, neukose dalen-na, ta tesa-tama nai fai maso'dan-na dalek.

²¹Malii matuaina la, tao la di'idoon-na nono'ka pakek-ka; manabonga uma mai sapu-nan, nai fai nee-nee lino-linok.

²²Ta hapu namahehenak, soaneu nadook aoinan-na neme makahatuk-ka mai, nana hataholi kanisak-ka tafainan-na, usin nai fai loak lala'en-na.

²³Manupui nasar-rala, lahani fai mamaten-na, fo ala sanga la'a popolan-na. Boema, name'da nae so'dan-na makahatuk manai fai manamaik-ka.

²⁴Soe-a, sama leo manek fo ao na makadelek naheheleaon basa, fo sanga kaa-nan.

²⁵Hataholi manala'ban Manetualain-na, ua-nalen leondiak, leondiak boe, hataholi fo napalani la'ban Manetualain Fo Manakoasa

²⁶No koao-ndaeaok, ana sapu ma ana la'ban Manetualain; ana pake babaa fanan-na, de ana ta nau sengi fan.

²⁸Ana leo nahele nai kota nakalulutuk-kala, nai uma louk-kala dalek Kota sila-la, nananaketu basak, soaneu da'di kota fo ai batu manatapasasalak.

²⁹Neukose mopo hataholi ndia su'i-beten; neukose basa la'i esak hata-heton.

³⁰Neukose, ta nala makiu-makahatuk-ka deak fa; neukose ha'i na'a heni buku beun-nala. Neukose, mopok-kana, hu kande Manetualain ani hahaen-na.

³¹Metema, namahele hata sosoa-ndandaa tak-ka soona, neukose ndia nde nanatipu-daik; ma neukose ndia da'di babalan-na fo ana sipok-kana, sosoa-ndandaan ta boe.

³²Fain-na beita losa fa te neukose maten, sama leo ndana tuuk-ka ta momo'dok fa.

³³Ndia sama leo ai angol-la, fo kono heni boan-na, sama leo ai setun-na, fo kono heni bunan-na.

³⁴Neukose, hataholi mangalauk-ka, tititi-nonosin ta; ha'i na'a heni uma, fo ana taon neme doi sosolo dalek-ka mai

³⁵Ndia nde sila fo manatutu'u eno mangalauk-ka, boema lakalala'ok-kana; ke'di-ndiuk-ka, nai dalen dale tataas esa.”