Read Termanu AYUB 18 Bible Online

AYUB 18 - Termanu bible

AYUB 18

¹Boema Bildad nataa nae, “Hai Ayub, fa'ihi'da dei fo besak-ka o kokolak mate'e? Denge-denge leona, fo mamanene, besak ia, ami sanga kokolak.

³Tao le'e de, o mafa'da mae ami nggoak, de o makasasamak ami no kapa-la?

⁴O nasam-ma, ka'da tao nahe'di seluk o aoinam. Ade, hu kande o paluum-ma, de daebafak-ka muse namopo laun-na, ma letek-kala, muse keko heok leme mamanan-nala mai do?

⁵Hataholi mangalauk-ka, banun-na, tao leo bee-o, nanafuu nisak; neukose, ta de'de seluk-kana so'on.

⁶Mangale'dok manai lalaa teman dale-a, da'di makahatuk; nanahu banun-na ta pila fa.

⁷Ei ngganggani matea-mahelen-na, da'di naleulilok; dale tutu'un-na taon-nan nakatunu.

⁸Ana la'ok leo hihi'ik-ka dale neu, boema ein-na kai.

⁹Hihi'ik-ka nala ei tingan-na, nalosa ho'u lan.

¹⁰Hihi'ik-ka talin-na, nananakadofuk nai dae dale; hihi'ik-ka, ma lele'ek-ka nanapasak nai enok lain.

¹¹Bibii-namata'u matuaina, neme mamanak lala'en-na mai, de ana tao nanggengek hataholi mangalauk-ka; bibii-namata'uk-ka tungan, neme nggani eik leo nggani eik neu.

¹²Makahulun-na mabe'i-balakaik, tehu besak ia, ana male-tale; soe-a non nai mamanak lala'en-na.

¹³He'di belak-ka, na'a loun-na, alun-na, ma ein-na laboo pulu.

¹⁴Nanaloso nenik neme lalaa teman, fo mamana nee-nee lino-linon-na dalek mai, boema, nanalele'a-lolosok leo mamates-sa neu.

¹⁵Besak ia, su'di see-a, bole leo nai lalaa teman dale, fo ana nggali belerang, fo manatao namopo he'dis-sa.

¹⁶Okan-nala kukulu, ma ndanan-nala lamatuu.

¹⁷Ta lalelak-kana nai kota dale, do nai kota deak so'on; ta hapu hataholi esa boen, fo bei nafandendelek na'den-na.

¹⁸Nanausi henik neme mangale'dok-ka mai, leo makahatuk dale neu; nana-nadook neme hataholi maso'dak-ka daebafan-na mai.

¹⁹Ta maanak, ma ta matititi-nonosik fa; ta ela hataholin esa boen, nai nggolo-ta'dun-na fa.

²⁰Laun manai nusak muli-la, ala nggenge-la, nai lelek lamanene ua-nalen da'di tao leondiak, tehu laun manai nusak dulu-la, dele bengge'be, hu kande bibii-namata'uk-ka.

²¹Hataholi malelesik-ka, ua-nalen leondiak, leondiak boe, hataholi fo ana ta taoafik neu Manetualain fa.”