Read Termanu AYUB 19 Bible Online

AYUB 19 - Termanu bible

AYUB 19

¹Tehu Ayub nataa nae, “Tao le'e de emi sanga au salang-nga nakandoo, ma emi tao doi-doso au, nenik dede'a-kokolak?

³Emi makamumulu-makamamaek au, la'inono'ik, ma emi ta bii-mae, fepa-li'u au fa.

⁴Leouni'ka, au tatao-nono'ing sala, soona ndia ta neni nahenik soaneu emi fa.

⁵Emi dodoo mae, emi malole lena neme au mai; emi mafa'da mae, au toto'a-tatang-nga, nde da'di buti neu au salang-nga.

⁶Bubuluk leona, te besak ia, Manetualain fepa-li'u au, de Ana ho'un-na au, nai meobesin dale.

⁷Au aule-ahelu, hu kande tatao-nono'in, fo ta nanuu dale ksian ndia fa, tehu, ta hapu hataholi esa boen, taoafik neu au fa. Au ngasi ae, “Ndoos ma matetuk-ka nai bee,” tehu, ta hapu hataholi namanene au fa.

⁸Manetualain kena ketu, au enong-nga, de au ta hapu la'o tunga ndia fa, Ana taon-na au eno anang-ngala, makahatu kiu-kiuk.

⁹Ana loso-na basa au hata-hetong lala'en-na, ma Ana tao nalutu, au na'de maloleng-nga.

¹⁰Ana tao nakalulutuk basa hata fo da'di au namahehenang-nga, sama leo hataholi-a fe'a heni, bubu'u-palusa okan-na, boema ana po'ilotak-kana, male-tale.

¹¹Manetualain nasa-melun neu au-a, ana pila lo'a-lo'a; nafa'da nae au da'di leo Ndia musun-na.

¹²Solda'dun-nala sapu, de ta hapu ta'da-na fas; napangge au enong-nga, de lakahapi-la au lalaa temang-nga.

¹³Ana usi nadook heni, au tolanoo ka'a-fa'ding, neme au mai; de au da'di hataholi manamai, ba'eneu au hataholi nalelang-ngala.

¹⁴Basa au tia-laing-nga, ladook aoinan-nala; au nonoong-ngala, ta lafandele au so'on.

¹⁵Au ata inang-ngala lafandele heni see au, fo sila tuan-na; nono'kabai sila beita lalelak au fa.

¹⁶Au aloo au atang-nga, tehu ta nataa fa, leomae au kokoen no mangana'uk boe.

¹⁷Au saoinang-nga, ana malua hae, au hahaeng-nga boon-na, au tolanoo bonging-nga, ana ta nau deka au fa.

¹⁸Ni'iana eno laik-kala, lakamumulu-lakamamaek au; metema au apadeik soona, ala hika au.

¹⁹Au tia-lai maloleng-ngala, mete au soona, ala malua; au sue-lai hataholi-la, ala la'oela au.

²⁰Au aopaang-nga, ela ka'da louk palu duik; esabain-na mate au, fo mopo au so'dang-nga.

²¹Hai, au tia-laing-ngala lemin, sue-lai au dei nana Manetualain liman-na, fepa au.

²²Manetualain ne'e nahele au; tao le'e de, emi na'da Ndia tatao-nono'in? Emi tao doi-doso u beita dai fa do?

²³Ah, ela leo been-na, au hala-kokolang nanasulak, fo ela nananafandendelek tataas esa;

²⁴ela leo been-na, fa'a nenik-kana pa'a besi, neu batu lain, fo ela nahele losa dodoon-na.

²⁵Au bubuluk, ae au Manamasala'eng-nga nai nusa so'dak-ka; mate'en-na, neukose Ana mai tulu-fali au.

²⁶Leomae, au loung-nga bisu-bisu mesan, de ka'dis, tehu nai lelek au bei aso'da nai daebafak-ka, neukose au mete Manetualain.

²⁷Neukose, au meten nenik au matang-nga, ma ba'eneu au soona, Ndia da'di au tia-laing. Au daleng-nga nakalulutuk, hu kande emi mafa'da mae,

²⁸‘Enon-na leo beek, fo ata kalaak-kana?’ Emi sanga ne'ek, fo tao dede'ak.

²⁹Tehu besak ia, bii tafaina leona! Nana Manetualain namanasa, de Ana huku hataholi masala-masingok-ka; soona emi bubuluk leona, mae hapu Manetualain, fo manamaketu-mala'di hataholi daebafak-ka.”