Read Termanu AYUB 2 Bible Online

AYUB 2 - Termanu bible

AYUB 2

¹Mahahaek nusa so'dak-kala fali le'us leo MANETUALAIN leu, de Nitu-a, tunga boe.

²Boema, MANETUALAIN natanen ae, “O meme bee mai?” Nitu-a nataa nae, “Au eme, au leleo-lala'ong fo aleu-alaak su'di leo bee u, fo au la'ok okofefeok daebafak-ka.”

³Boema, MANETUALAIN natane nae, “Ade, o taoafik neu Au atang Ayub do ta? Nai basa daebafak-ka lala'en-na, ta hapu hataholi lilinekan ma dale malolen-na, sama leo ndia fa. Ana sene-do'ok neu Au, ma ana ta tao tatao-nono'i mangalauk makandondook fa. Ana bei lilineka nahele Au, leomae o fufu'di-oo'dok Au, fo Au tao susa-soen, no ta nanuu enon-na fa.”

⁴Tehu, Nitu-a nataa nae, “Maso'dak ma so'da-la'dak-ka, belin-na lena heni hata-heto. Hataholi daebafak-ka, nau fe heni basa hata-heton lala'en-na, sa'di ana hapu naso'da nahele.

⁵Leouni'ka, O tao mahe'di aoinan-na soona, tao leo bee-o, ana nakamumulu-nakamamaek O tutik nenik dede'a kokolan!”

⁶Boema, MANETUALAIN nafa'da Nitu-a nae, “Hei, taon tunga o dale hihiim-ma leo sa'di boso taomisan.”

⁷Boema, Nitu-a la'o neme MANETUALAIN matan-na, de ana fe bisu puluk-ka la'e Ayub aon-na lala'en-na, neme ein-na losa langan-na.

⁸Boema, Ayub neu nangatuuk nau afu tala'da, de ana ho'i falee fangik, de ana kakalo nenik aon-na.

⁹Saoinan-na nafa'dan nae, “Masa bole, o bei lilineka mahele neu Manetualain? Ayo, makamumulu-makamamaek-kana, fo mate leona!”

¹⁰Ayub nataa nae, “O kokolak sama leo hataholi nggoak-ka kokolan-na! Masa bole, ita nau sipo ka'da hata, fo malole neme Manetualain mai, te hata fo ta malole-a, ita ta nau sipo fan?” Da'di, leomae Ayub hapu basa susa-soe sila-la lala'en-na, tehu ana ta kokolak dede'a-kokolak fo la'ban Manetualain fa.

¹¹Ayub tia-lain telu, lamanene susa-soe fo manatuni la'e Ayub-pa. Ayub tia-lai ka telun sila-la, nde Elifas neme kota Téman-na mai, Bildad fo hataholi Suah, ma Zofar fo hataholi Naama. Ala lalahalak, leu donge-dama Ayub, fo ala kokoe-nanasin.

¹²Tehu lelek bei lai dook-ka, te lakanae litan so, tehu hihii lae, ta lalelak-kana so'on. Boema, ala kii, de ala dola heni halan-nala, ma ala sii-sii lulu'i bua papaken-nala, boema ala nggali afu leo lain neu, ma leo langan-nala lain neu.

¹³Langatuuk lai dae lain, lele'dok hitu, ma le'odaek hitu, lai Ayub boboan-na, tehu, ala ta kokolak heni dede'ak de'ek esa boen, nanahu lita Ayub doi-doson ba'un-na seli.