Read Termanu AYUB 21 Bible Online

AYUB 21 - Termanu bible

AYUB 21

¹Boema Ayub nataa nae, “Mamanene hata fo, au sanga afa'dan: ka'da ndia nde au oken-nana, fo da'di leo kokoe-nanasik.

³Fe au loak, fo au kokolak bai, basa ndia soona, emi bole makamumulu-makamamaek seluk!

⁴Au ta ale'a o hataholi daebafak fa, da'di ta hata-hata fa, metema au ta haelai amanasa fa.

⁵Makanae au, soona neukose emi bafam-mala be poo, emi ta makababale emi aom-ma fa, ma emi makatema emi bafam-ma.

⁶Metema, au dudu'a-dodoo au so'dang ia soona, au dele, nanahu au bii-amata'u.

⁷Tao le'e de, Manetualain fe hataholi mangalauk-ka, teun-na namanalu, ma hata-heton-nala, boetai lamaba'uk-ka?

⁸Laso'da lala dook-ka, nalosa lita upu-anan-nala, da'di hataholi touinak.

⁹Uma loon-nala, nee-nee lino-linok, ma so'da-molek; Manetualain ta fe susa-soe la'e fas.

¹⁰Bana-manun-nala bongi lakandoo, ma ala bongi no malole

¹¹Hataholi mangalauk-ka anan-nala, lakaboboku no namahoko-seteleek, sama leo bi'ilopo tenak-ka namahoko.

¹²Lakaminak rebana, kinuk ma kecapi, ala lakamee no makalupu-makaseek, ma fofoti-lolongek.

¹³Labasa le'do-fain-nala, nai namahoko-seteleek-ka dalek, ma mates no mole-dame.

¹⁴Te se'kona, lafa'da basa Manetualain lae, “Dook-ka meme ami mai, fo la'o leona! Ami ta mafaduli, ma ami ta nau taoafik neu O dudu'a-dodoom tetee-tutu'dan, ba'eneu ami so'dam-ma fa.”

¹⁵Ala dodoo lae, “Lalalau-laoono Manetualain soona, sosoa-ndandaan ta, ma hule-haladoi neun soona, ta hapu hata esa boen.

¹⁶Ade, ta hu kande ita bei-balakain mesan-na, de ita hapu basa hata lala'en, fo ita dudu'a-dodoon-nana hetu?” Tehu, au ta sipok makandondook, no dudu'a-aafik, ma hahapuk leondiak-ka fa.

¹⁷Hataholi mangalauk-ka, banun-na nanafuu nisa haik so do beik, ma ala hapu susa-soe, ma toto'a-sosotak do ta? Manetualain namanasa hais, de nalosa, Ana hukus so do beik?

¹⁸Ala da'di hai ha'deaik, ma afu, fo ani-sangu fuu nitas so do beik?

¹⁹Emi mafa'da mae, “Manetualain huku anak-ka, hu kande aman sala-singon.” Tehu, au afa'da ae, Manetualain hukuk-ka nde, hataholi masala-masingok ndia dei, fo ela, ala lame'da, lae hu kande sila sala-singon, de Manetualain haitua huhukun-na mai.

²⁰Nemen-na, fo hataholi masala-masingok-ka, ana lu'a-lepa aon sala-singon, nemen-na, fo name'da nita, Manetualain Fo Mademaina, nasa-melun.

²¹Metema, basa hataholi daebafak-ka le'do-fain nai daebafak ia soona, ana bei nafaduli, ade, teidalen-nala laua-lanale do ta?

²²Ade, hataholi daebafak-ka, bisa nanoli Manetualain do ta, nate'ka, Manetualain mesak-kana, naketun-nala'di mahahaek manai nusa so'dak-ka?

²³Hapu hataholi, nai fai maso'dan-na dalek, so'da-la'dak; ana mate no name'da dai so, ma dalen-na loa-loak mesan. Mamaten-na nee-nee lino-linok, no name'da naua-nanale, te se'kona be'i-balakain bei makadotok.

²⁵Tehu hapu nggelok, mate no doi dosok, ana beita name'da nita, ua-nalek-ka fa.

²⁶Tehu, nai lates dale soona, lakandondoo sama-sama; ulek-kala ma kalatik-kala lakamomotu-lalas.

²⁷Memak, au bubuluk hata fo emi dudu'a-dodoon, ma emi tutu'u basa eno mangalauk lala'en-na.

²⁸Boema, emi matane mae, “Manakoasa fo manatao tatao-nono'i malelesik-ka, uman-na nai bee?”

²⁹Ade, emi beita matane mita, hataholi fo, ana la'o la'i ba'uk-ka fa do? Ade, emi ta mamahele, lafa'da halak-ka fa do?

³⁰Lafa'da lae, “Nai faik fo Manetualain fe huhukuk-ka, basa hataholi manatao tatao-nono'i mangalauk-kala, neukose nanasoi-tefak.”

³¹Ta hapu hataholi kalaak ha'da-paliin fa; ta hapu hataholi, balas tatao-nono'i mangalaun-na fa.

³²Ko'on loon leo lates neu, fo taon leo bolo mamates dale neu; laten-na nanananeak ma nanatao balisik.

³³Hataholi lifu-lifun, tunga manandolo kopan-na, ma no koe-koek, lakadofu dae ketun.

³⁴Da'di, o kokoe-nanasim ndia, louk, ma o natataam lala'en-na, pepekok basa sila-la!”