Read Termanu AYUB 22 Bible Online

AYUB 22 - Termanu bible

AYUB 22

¹ Boema, Elifas nae, “Nai hataholi daebafak-ka dalek, ta hapu hataholi esa boen, masosoa-ndandaak ba'eneu Manetualain fa. Hataholi fo, dudu'a-aafin malole nanseli boeo, sosoa-ndandaan ka'da soaneu aoinan-na mesak-kana.

³Ade, masosoa-ndandaak ba'eneu Manetualain, metema, o tao tunga hihii-nanaun do? Ade, hapu nanalak ba'eneun, metema, o so'dam-ma matetu-mandaak do?

⁴Ta hu kande o bii-mamata'u neu Manetualain, boema o nanakalaak, ma lafa'da lae o masalak,

⁵tehu, hu kande o sala-singom makadotok, ma o nakeketum-ma, ma o ha'da-tataom, mangalauk nanseli.

⁶Metema, o tolanoom-ma, ta bae huta-bu'un fa soona, o loso-ma basa bua papaken-na.

⁷O ta fe hataholi mana sota-manguk-ka, ninu fa, ma o ta fe hataholi kamala'ak-ka, nana'ak fa.

⁸O pake o nangatuum-ma, ma o koasam-ma, fo o besilaa-ma, basa dae lala'en-na.

⁹Ta ka'da, o ta tulu-fali inafalu-la fa, te o tuni-ndeni kisa-anamaak-kala boe.

¹⁰Hu ndia de, besak ia, nai o boboa-kaisum, henuk no hihi'ik-ka, de no kaiboik, bibii-namata'uk-ka, potin-na o.

¹¹Lele'dok-ka, boetai makahatuk-ka, de o ta bisa mita fa; o bolo nai faa matuaina dale.

¹²Ade, Manetualain ta leo nai lalai mademaina, de Ana mete leo dae, fo leo nduuk mademaina-la nanseli fa do?

¹³Tehu, o matane mae, “Ndia bubuluk beek? Ndia nai ko'as-sa selik, de Ana ta bisa naketu-nala'di ita fa.”

¹⁴O maedaenga, ko'as-sa babaa ketu mata memeten-na, ma o mae Ana la'ok ka'da nai lalai no daebafak-ka, toon-na do?

¹⁵Ade, o sanga la'ok mahele nai hataholi mangalauk-kala hele enok-ka do?

¹⁶Sila fai mamaten-na, beita losa fa te, sila nanaloso-nak so, de faa ba'u nenis.

¹⁷Hataholi sila nde, lapalani tipa heni Ndia Fo Manakoasa, ma laedaenga, Ana ta taos le'e esa boen.

¹⁸Te se'kona, Manetualain nde fes da'di kamasu'i-makabetek-ka! Te'e-te'e, au ta alelak hataholi mangalauk-ka, dudu'a-aafin fa!

¹⁹Hataholi malole-a, ana hika, ma namahoko-setelee, metema, nita hataholi mangalauk-ka, hapu huhukuk.

²⁰Hataholi mangalauk-ka, hata-heton lala'en-na, mopo-mate la'iesak-kasa so, ma bei ela beek soona, ha'i na'a henis.

²¹Nah, Ayub, mole-dame moo MANETUALAIN leona, fo ela o hapu nee-nee lino-linok. Metema, o tao ndia soona, tao leo bee-o, o hapu nanalak.

²²Sipo-ma hata fo, MANETUALAIN nanolin neu o; pe'da basa sila-la, nai o dalem dale.

²³Fali leo MANETUALAIN mai, no dale taidaek ela leo been-na, tatao-nono'i mangalauk manai o umam-ma, mate'en leona.

²⁴Tu'u heni o lilopila isim-ma; tapan leo lee ma'dak-ka, buin-na neu.

²⁵Nemen-na, Ndia Fo Manakoasa, da'di o lilopilam, ma o lilofula kabelim-ma.

²⁶Soona o bole mamahele neu Manetualain, tataas esa, ma o bubuluk, mae Ndia nde da'di oemata, soaneu o ua-nale malolem-ma.

²⁷Metema, o hule-haladoi soona, neukose nataa o, ma o bisa tao matetu basa o hehelu-balataam lala'en-na.

²⁸Neukose o ue-le'dim, neni buna-boak tataas esa, ma mangale'dok-ka, neukose nangale'do-na, o so'dam-ma.

²⁹MANETUALAIN nakadadaek hataholi manakoao-ndaeaok-ka, tehu hataholi dale taidaek-ka, nanasoi-tefak.

³⁰Metema, o salam ta, ma o tao tunga Manetualain hihii-nanaun soona, Ana tulu-fali o.”