Read Termanu AYUB 24 Bible Online

AYUB 24 - Termanu bible

AYUB 24

¹Tao le'e de, Manetualain ta naketu fai naketu-nala'dik-ka fa, fo ela hataholi manamalelak-kana, ala hapu ndoos ma matetuk-ka fa?

²Hapu hataholi nggelok, lakano'dok too-a, fo suekande, daen-na namaloa. Lamanako bi'ilopo bubuak-kala, fo ala foos leo sila lalaen dale neu.

³Lalai leni kisa-anamaak-kala, keledein-nala; ala besilaa-la faluina esa sapin-na, da'di neu bua pepe'dak.

⁴Lapanggenggee hataholi nuu-taa hata-taak-ka, fo ela ala boso hapu sila hak-ka, de no nakasetik, hataholi matasi'da-matasaek-ka, neu ke'ke.

⁵Da'di, hataholi nuu-taa hata-taak ndia, sama leo keledei fuik-ka fo ana sanga nana'ak nai mook makatemak dale; nana ka'da nai mamanak sila-la nde ana hapu nana'ak, soaneu anan-nala.

⁶No nakasetik neu foi-fala hataholi fe'ek tinan: hataholi mangalauk-ka angol boan-na, neukose ana o nakabubuas.

⁷Bua-lo'an ta, soaneu nalu'e nai fai le'odaen-na.

⁸Ana nakadoe hu ka nde u'da matuaina, hapun nai letek-kala, boema, neu sulu nai lete batu-la huun-na.

⁹Hataholi mangalauk-ka ana tao ni'iana ina-ama taak-ka, da'di ndia atan, ma anaho'i-na hataholi nuu-taa hata-taak fo, nahuta neun-na, ana bongi beun-nala.

¹⁰Hataholi nuu-taa hata-taak-ka, ana la'o no makaholak; namala'a, nai lelek ana ketu-kolu gandum nai tina.

¹¹Ana tao mina neme ai setun-na, boan-na mai, ma ana tao nininuk, neme ai angol-la, boan-na mai, tehu, ana maa ma'da nanseli.

¹²Hataholi fo hihii nae maten-na, hoo-nggu'un nananamanenek nai kota-la, hataholi mabisuk-kala, laloo bebou, loke puli-namo'dok, tehu Manetualain ta nau namanene huhule-haladoin-nala fa; Ana ta nau taoafik neu fas.

¹³Hapu hataholi nggelok, ta sipok mangale'dok-ka fa, de ala musu loon, ala ta lalelak, ma ala ta tunga enon-na fa.

¹⁴Nai fai lolobahaan-na, tou kanisak-ka, fo'a neme susungun-na mai, boema, ana kalua, fo neu taonisa, hataholi matasi'da-matasaek-ka, ma beita le'do a mai fa, te ana loi-loi mesan, sama leo nakodaa.

¹⁵Hataholi manahohongek-ka, nahani fai le'donosok-ka losa; ana poti ketu mata-panan, fo ela hataholi boso nalelak-kana.

¹⁶Nakodaa, ana bonga uma, nai fai le'odaen-na; fo nai fai lele'don-na soona, ana ta nau mangale'dok-ka, la'e fan, de neu ke'ke.

¹⁷Fafaik-ka, neni bibii-namata'u matuaina, ba'eneun, tehu makahatu kiu-kiuina, nandaa no dalen-na.”

¹⁸Boema Zofar nafa'da nae, “Faa ba'u neni hataholi mangalauk-ka, Manetualain soo-supa dae-oen; besak ia, osi angol-na, nee-nee lino-linok; ta hapu hataholi, naue-nale'di nai ndia so'on.

¹⁹Sama leo salju-a, fo fai hanas, ma le'do la'en soona, mopok-kana, leondiak boe, hataholi masala-masingok-ka, hataholi manamatek-ka daebafan-na, ko'do-nan.

²⁰Inan bongin-na boeo, nafandele henin, de kalatik-kala la'a aopaan-na. Neukose, ta lafandele na'den-na so'on; nanatao namopo-namatek, sama leo ai-a tu'u neu.

²¹Basa sila-la, ala da'di, hu kande ana tuni-ndeni, inafalu-la, ma ana tao inak fo, ana ta bongi anatouk fa, no ta pake dale kasian fa.

²²Tehu Manetualain usi heni hataholi ao makadelek-ka, nenik koasan-na. Manetualain ho'i nakeketuk, soona mate hataholi malelesik-ka.

²³Manetualain fen naso'da no mole-dame, tehu Ana ta hahae nanea fan.

²⁴Naso'da tetu-temak, ka'da ba'ihanak mesan, tehu basa soona, ana la'o losa dodoon-na. Ana male-tale, sama leo na'u sosoa-ndandaa tak-ka; sama leo, ke'di heni ha'de pulek-ka, neme huun-na mai.

²⁵See kande, ta namahele dede'ak ndia, do ana ta sipok au dede'a-kokolang fa?”