Read Termanu AYUB 28 Bible Online

AYUB 28 - Termanu bible

AYUB 28

¹Hapu mamanak fo, hapu lilofulak nai ndia; ma hapu mamanak, fo nai bee, lilopilas-sa nanataok neu liloisik.

²Besi nanakalik neme dae dale mai; ma latanoe liti-a, neme batu-a mai.

³Makahatu kiu-kiuina, ana tola mamanak madema ina, fo nanapalisak matalolek. Hataholi-a sanga batu, nai ndia, fo nai makahatuk dale,

⁴Nai mamana dook, fo hataholi ta leo nai ndia, ma beita ta'bu hain, do tunga hai ndia fa, hataholi-a naue-nale'di no lona-lona nai tali-a, nai bolo nee-nee lino-linok dale.

⁵Dae-a nabuna-naboa fe hataholi daebafak-ka, nana'ak, tehu, nai dae ndia buin-na boeo, nanaofe tapasasalak la'i esak-kana, nalosa daebafak-ka oe-isin lalefu-le'ak.

⁶Batu manai dae dale ndia, nde been-na batu momo'do mana'ahiik-ka nai dalek, ma daesopun-na, naisi lilopilas isik.

⁷Manupui balapua, ta bubuluk enok leo naa neu fa, ma manupui nasar-ra boeo, ana beita laa hai neme lain fa.

⁸Nau singa, do bana makaa-makisu fe'ek-kala, beita la'ok tunga hai enok nee-nee lino-linok, fo manaleo naa neu fa.

⁹Leomae batu tean-na seli boeo, hataholi-a kali batu ndia, de bolon-na demak-ka, ana kali heni letek-ka, losa huun-na da'di matetuk

¹⁰Lelek ana kali lete batu-a, fo ana tao enok tunga dalek-ka, ana hapu batu poemata kabelik-ka.

¹¹Ana kali losa lee-la, matan-na, boema ana soi heni, hata nananafunik-ka.

¹²Tehu, sanga manatee-tenok-ka nai bee? Ita hapu tanoli nai bee, fo ela ita talelak?

¹³Manatee-tenok-ka, ta nai hataholi daebafak-ka tala'da heon fa; ta hapu hataholi bubuluk beli mate'en-na fa.

¹⁴Tasi-la buin-na ma tasi maloaina-la lafa'da lae manatee-tenok-ka, ta nai ndia fa.

¹⁵Manatee-tenok-ka, ta hapu tuka fan, leomae tukan nenik lilopila isik boe, ma ta hapu asan nenik lilofulak boen.

¹⁶Lilopilas ma poemata kabeliina, belin-na ta dai fan.

¹⁷Ta hapu nakasasamak lilopilas do titino talimo'dis-sa no fan, ta hapu bae nenik galas nininuk lilopilas-sa fa.

¹⁸Manatee-tenok-ka, belin-na ba'u lena heni basa hata lala'en-na, lena heni merjan, kristal, do mutiara boe.

¹⁹Batu kabeli isik, dula kunik, ma lilopilas isik-ka, belin-na ta dai dudu'a-aafi malole-a fa.

²⁰Manatee-tenok-ka, matan-na nai bee? Ita hapu dudu'a manadaik-ka, nai bee?

²¹Ta hapu mahahae maso'dak, fo nita hain so, nakalenak, manupui manai lalai-a boeo, ta nita fan.

²²Mamates-sa, ma momopo-mamatek-ka boeo lafa'da lae, sila lamanene ka'da, dede'a anin mesak-kana.

²³Ka'da Manetualain mesak-kana, nde bubuluk manatee-tenok-ka, mamanan-na, ka'da Ndia nde bubuluk, enok leo naa neu-a,

²⁴nanahu Ndia nita daebafak-ka bu'u-bu'un-nala; nita basa hata lala'en, fo manai lala'i-a dae.

²⁵Lelek anin-na fen be'i-balakaik, ma naketu tasi maloaina, too-lanen;

²⁶lelek naketu u'dan-na mamana tutu'dan-na, ma ndelas-sa no mangguluk-ka enon-na;

²⁷nai lelek ndia, nde nita manatee-tenok-ka, de Ana so'ba su'dik belin-na, boema, Ana fen Ndia baba'e-papalan.

²⁸ Manetualain nafa'da hataholi daebafak-ka nae, “Soaneu hapu manatee-enok-ka, emi muse fe ha'da-holomata neu Manetualain. Soaneu hapu dudu'a manadaik-ka, emi muse dook-ka meme tatao-nono'i mangalauk-ka mai.”