Read Termanu AYUB 31 Bible Online

AYUB 31 - Termanu bible

AYUB 31

¹Au aheluk basa pake soo-supak, ae neukose au ta akahehe'dek mata o anafe'oanak fa.

²Ade, Manetualain tao beek, soaneu ita? Tao leo beek, fo Ana balas hataholi daebafak-ka tatao-nono'in?

³Tao leo bee-o, Ana fe soe ma susa neu hataholi manatao tatao-nono'i mangalauk-ka!

⁴Tao leo bee-o, Manetualain bubuluk basa, au tatao-nono'ing lala'en-na; ma nita basa au ei nggangganing lala'en-na.

⁵Au soo, ae au beita ho'i ita, makeketuk, fo ta ndoos ma matetuk fa; ma au beita tipu-dai ita, hataholi fa.

⁶Nemen-na, fo Manetualain tai au, nai tatais matetuk lain, soona neukose, Ana bubuluk, nae au salang ta.

⁷Metema, au singo heni eno ndoos-sa, do au daleng-nga, nahiik dede'a manggenggeok, metema, au limang-nga naggenggeo, hu kande sala-singok-ka,

⁸soona nemen-na, fo hataholi fe'ek, na'a hata fo, au sele-nggalik-ka buna-boan, ma nalutu la'iesak, au daeng-nga oe-isin lala'en-na.

⁹Metema, au daleng-nga nahiik hai, au uma titia-tataing saoinan-na, fo no nafufunik, au titinon neme lelesu-a dean-na mai,

¹⁰soona nemen-na, fo au saoinang-nga, do'de-nasu fe hataholi fe'ek; nemen-na, fo ana sungu no tou fe'ek.

¹¹Metema, memak au tao sala-singok manggenggeok ndia soona, nandaa au sipo huhukuk.

¹²Sala-singok ndia, ana tao namopo-namate, sama leo ha'i manai tasi ha'ik dale-a, ana hotu heni, basa au hata-hetong lala'en-na.

¹³Lelek au atang-nga haladoi, hu kande au tao sala ndia hak-ka, de au amanenen, ma au taon no dale ndoos.

¹⁴Metema ta soona, tao leo beek, fo au muse asasalematak o au Manetualaing-nga? Nai lelek, Ana mai naketu-nala'di au, soona au ataa ae le'e?

¹⁵Ade, Manetualain ta nde nakadada'dik au, ma au atang ia-la boe do ta?

¹⁶Beita la'i esa fo, au ta nau tulu-fali hataholi matasi'da-matasaek-ka, do po'ilotak faluina-la, laso'da nai ketu namahehenak-ka dalek fa.

¹⁷Beita la'i esa fo, au po'ilotak kisa-anamaak-ka namala'a-namandoe, te se'kona au nana'ang-nga dai ma lena.

¹⁸Au akabobois neme bei anan-nala mai; au hela-noles nai au fai maso'dang-nga dalek.

¹⁹Metema, au ita hataholi manato'a-taak-ka, hataholi matasi'da-matasaek nanseli, de bua papaken ta soona,

²⁰au fen temak, fo nanatenuk neme au bi'ilopong-ngala bulun-na mai, boema, neukose ana koa-kio au, no dale katema tuan-na.

²¹Fafa'kama, au tuni-ndeni hai kisa-anamaak, nana au amahele, neukose au sengi au dede'ang-nga,

²²soona nemen-na, fo la'di au limang duas, fo latapo'i leme au alung-nga mai.

²³Neukose, au ta tao leondiak fa, nana Manetualain huhukun-na, taon-na au bii-amata'u anseli.

²⁴Beita la'i esa fo, au asalai au deang-nga neu au hata-hetong,

²⁵do au daleng-nga, namatua hu kande au su'i-beteng fa.

²⁶Beita la'i esa fo, au sene-do'ok neu le'do-a, do bulak-ka boen.

²⁷Beita la'i esa fo, au daleng-nga nahiik-kana, do au so'uk au limang-nga, fo au fe ha'da-holomata neun fa.

²⁸Sala-singok matak leo ndiak-ka, nandaa huku nisan; hu kande nalelesi Manetualain, Fo Manakoasa so.

²⁹Beita la'i esa fo, au amahoko, hu kande au musung-nga doi-doso, do au amahoko, hu kande ana hapu soe.

³⁰Au ta hule-haladoi, soaneu au musung-nga mamaten-na fa; beita la'i esa fo, au tao sala-singok matak leondiak-ka fa.

³¹Hataholi mananaue-nale'di fe au-a bubuluk nae au fe su'di see boe, na'a nai au umang.

³²Au umang-nga nanasoik, ba'eneu hataholi manaleo-la'ok-ka; beita la'i esa fo, au po'i lotak-kasa sungu nai enok lain fa.

³³Hataholi fe'ek-ka, nafuni sala-singon, tehu beita la'i esa fo, au tao sama leo sila tataon ndia fa.

³⁴Au ta bii-amata'u neu lea hahapun-na fa, ma au ta afaduli hataholi-a, nakamumulu-nakamamaen-na fa. Beita la'i esa fo, au ahele eme uma, do au dedenge fa, ka'da hu kande, au bii neukose lakamumulu-lakamamaek au.

³⁵Ade, hataholi ta nau namanene au dede'a-kokolang fa do? Au soo, ae basa sila-la, tete'ek-ka. Ela leo been-na, Ndia Fo Manakoasa, nataa au. Leouni'ka, musu-a kalaan soaneu au-a, basa-basas nanasulak, nalosa au itan,

³⁶soona no dale namatua, au pasak-kana neu au alung-nga, ma au taon neu au langang lain, da'di leo bulamolik.

³⁷Au sanga afa'da au tao basa hata lala'en-na, neu Manetualain; neukose au asasale matak on, no dale namatua ma au botik au langang-nga.

³⁸Leouni'ka au amanako dae fo, au foi-falak-ka, ma au atona-an, neme manonuuk-ka mai,

³⁹leouni'ka au u'a heni buna-boan, ma au po'ilotak hataholi manasele-nggalin-nana, namala'a-namandoe,

⁴⁰soona nemen-na, fo manamolik manai tina ndia dalek-ka, ta betek do gandum fa, te makatema dila-nggauk ma fii.” Ayub dede'a-kokolan, ba'u ka'da ndia.