Read Termanu AYUB 32 Bible Online

AYUB 32 - Termanu bible

AYUB 32

¹Hu kande, Ayub namahele nanseli neu ndia ndoon-na, boema tia-lai ka telun sila-la boeo, ta nau lataan so'on.

²Tehu hataholi esa nai ndia boe, na'de Elihu, fo Barakheel anan-na, fo Bus tititi-nonosin esa nde ndia, neme teidalek Ram-ma mai Ana ta bisa nakatatakak-na nasan-na fa, hu kande Ayub nafa'da nae, ndia ndoos, ma ana fe salak neu Manetualain.

³Boeo, namanasa Ayub tia-lain ka teluk sila-la, hu kande ala ta bisa se'i lala Ayub hala-kokolan fa, leomae ala fe salak neu Ayub.

⁴Nai hataholi sila dalek, Elihu nde muli-soluk-ka, hu ndia de, nahani losa basa-basas kokolak late'e.

⁵Lelek nita hataholi ka teluk sila-la, ta bisa lataa fa boema, namanasa,

⁶de ana kokolak nae leo ia, “Au bei muli-soluk, te emi mamalasi so, hu ndia de, au bii, ma au daleng-nga naba'e, soaneu au afa'da au hahapung-nga.

⁷Au dodoo ae, emi nde muse kokolak-ka, fo see lasin-na lena soona, ana muse baba'e manatee-tenon-na.

⁸Tehu, manafe manatee-tenok-ka neu hataholi daebafak-ka, nde ka'da Manetualain Fo Manakoasa, Duladalen-na.

⁹Hataholi-a da'di manatee-tenok, ta hu kande teun-na ba'uk-ka fa; hataholi-a nalelak ndoos-sa, ta hu kande teun-na nai lain fa.

¹⁰Hu ndia de, mamanene au dei; fe au loak, fo au afa'da au hahapung-nga.

¹¹Au amanene no ta haelai amanasa, nai lelek emi kokolak, ma au ahani, nai lelek emi sanga hala-kokolak manatee-tenok.

¹²Au taoafik besa-besa; au amanene, ae emi dudu'am-ma nakale'o, emi ta hapu fe buti, mae Ayub masalak fa.

¹³Tao leo bee, de emi bisa mafa'da, mae emi hapu manatee-tenok ndia so? Nanahu, nau do ta nau fa, emi kala so ka'da Manetualain nde bisa nataa Ayub.

¹⁴Ayub kokolak no emi dei, te ta no au fa, tehu, neukose au ta fe natataak sama leo emi fa.

¹⁵Ayub, ala lapangamak, de ala ta bisa fe natataak fa; ala ta bisa lafa'da hata esa so boen.

¹⁶Ka'da lapadeik, te ala ta bisa kokolak so'on. Ade, au muse ahani, leomae ala bedenge do?

¹⁷Ta, besak ia, au sanga fe natataak; neukose, au afa'da au hahapung-nga.

¹⁸Au ta nau ahani so'on Au ta hapu akatatakak ala, au hala-kokolang so'on

¹⁹Metema, au ka'da denge-denge soona, neukose heaba'e au, sama leo alukosu, fo henuk no angol beuk-ka siiba'en.

²⁰Au muse kokolak, fo ela au daleng-nga tesa-tama; au muse apook au bafang-nga, fo au fe natataak.

²¹Neukose, au ta asala'e esa boen, nai dede'ak ia dalek fa, ma au ta koa hataholi esa boen.

²²Nanahu au ta koa alelak hataholi fa, ma leouni'ka, au tao dede'ak ndia soona, neukose, no lai-laik Manetualain huku au.