Read Termanu AYUB 36 Bible Online

AYUB 36 - Termanu bible

AYUB 36

¹Mahani dodoo seluk faa, fo nenene leona, te bei hapu hata fo, au sanga afa'dan, hu kande Manetualain.

³Au malelang-nga ba'uk-ka; de neukose, au pake malelak ndia, soaneu au fe buti, ae Manamakadada'dik au-a nde been-na, ndoos ma matetuk.

⁴Ta hapu dede'a-kokola pepekok, nai au dede'a-kokolang dale fa; nana hataholi fo, te'e-te'e dodole maneu, besak ia, nai o matam-ma.

⁵Manetualain ndia, mabe'i-balakaik ma palani! Nalak basa hata lala'en-na. Ana ta nakadadaek hataholi esa boen.

⁶Ana ta po'ilotak hataholi masala-masingok-ka, naso'da nala dook-ka fa, Ana fe ndoos ma matetuk-ka, neu hataholi manadoi-dosok-ka.

⁷Ana taoafik neu hataholi, dale ndoos-sala, Ana tao nalas, ala koasa sama leo manek-kala, nalosa nanafe ha'da-holomata losa dodoon-na.

⁸Tehu metema, hataholi-a nanalangek nenik namosina besi, fo ana doi-doso, hu kande tatao-nono'in mesan-na,

⁹soona neukose, Manetualain buka heni sila sala-singon ma koao-ndaeaon-nala.

¹⁰Manetualain nadenus, fo lamanene Ndia hala nasanene'dan-na, ma ala tu'u-tapa heni, sila tatao-nono'i mangalaun-na.

¹¹Metema, ala tunga Manetualain, ma lalalao-laoonon neun, soona laso'da no mole-dame ma tetu-temak, losa sila fai maso'dan-na, nate'e.

¹²Tehu metema, ala ta nau lamanene fa soona, neukose ala mate nai, nggoak-ka dalek.

¹³Hataholi lamatua taak-ka, nape'da nasa-meluk; leomae, MANETUALAIN hukun boe, ala ta nau loke tutulu-fafalik fa.

¹⁴Ala mate nai fai muli-solun-nala dalek, nanahu so'dan-nala, henuk no nakamumulu-nakamamaek-ka.

¹⁵Manetualain fepa hataholi daebafak-ka, tunga doidosok-ka, Ana pake susa soaneu ala tuka tei-sale dale.

¹⁶Manetualain soi-po'i o neme toto'a-tataak-ka mai, nalosa o hapu mame'da mita mole-dame-a, ma o mei nana'am-ma, henuk no nana'ak-ka.

¹⁷Tehu besak ia, o sipo o huhukum-ma, nandaa no o tatao-nono'i mangalaum-ma.

¹⁸Manea matalolole leona, fo boso o nanake'di-ndiuk, nenik doi sosolo dalek-ka; boso hu kande su'i-betes-sa, de o la'ok sala eno ndoos-sa.

¹⁹O maloo bou-bou moke hataholi tulu-fali o, tehu manada'di tak, o be'i-balakaim lala'en-na, palsuma la'i esak-kana.

²⁰O dalem-ma, boso nahiik le'odae makahatuk-ka, fain-na losa, leoina-la mopo-mate, fo mopok-kasa

²¹Manea matalolole leona, fo boso fali leo tatao-nono'i mangalauk-ka mu. O doidosom tetee-tutu'dan nde, fo ela o tu'u-tapa heni tatao-nono'i mangalauk-ka.

²²Mafandendelek leona, te Manetualain ndia, te'e-te'e koasan-na ba'un-na seli. Ade, hapu mesen fo, malelan-na leo Ndia do ta?

²³See kande, bisa natu'du fen enok, do napalani kalaak-kana nae, Ana tao salak?

²⁴Ndia nanakoa-nanakiok tataas esa, hu kande tatao-nono'in, de o boeo, muse so'u laik-kana.

²⁵Basa hataholi-la, lita tatao-nono'in, tehu, ta hapu hataholi esa boen, fo te'e-te'e, ana hapu dodoo nalan fa.

²⁶Manetualain te'e-te'e, mandela-masa'ak, de ita ta hapu dodoo tala fan, do leke-tala, teun-na dede'un-na fa boe.

²⁷Manetualain nde hela oe-a, neme daebafak-ka mai, fo ana da'di ko'as, boema Ana tao nasafalin da'di u'da oe.

²⁸Ana fe u'dan-na mai, neme ko'as-sa mai; fo Ana tee-teen leo, hataholi daebafak-ka lain neu

²⁹Ta hapu hataholi esa boen, nalelak ko'as-sa leleo-lala'on fa, boema mangguluk-ka, nanggulu nai lalai, nai mamanak fo, Manetualain leo.

³⁰Ana nangale'do-na lalai lala'en-na, nenik ndelas-sa, tehu tasi buin-na, makahatu kiu-kiuina nahele.

³¹Enon-na nde ndia, Ana fe maso'dak, neu leoina-na, ma Ana fe nana'a-nininuk manasasi kao-kaok-ka.

³²Manetualain ho'un-na ndelas-sa, nenik liman-na, ma nadenun, fo teen-na mamanak fo Ana natu'duk-ka.

³³Mangguluk-ka, nggulun-na, ana da'di ta'du-tana, nae sangu-a sanga mai, bana-manu boeo, ala bubuluk, ani matuaina ana losa no lai-laik.