Read Termanu AYUB 37 Bible Online

AYUB 37 - Termanu bible

AYUB 37

¹Sangu-a taon-na, au daleng-nga bii, ma au teneng-nga hako.

²Hai emi basa-basam-ma lemin, mamanene Manetualain halan-na; mamanene mangguluk, fo ana kalua neme bafan-na mai.

³Ana po'i Ndia mandelan-na, leo basa lalai lala'en-na neu; ma Ana haitua Ndia ta'tas-sa, leo daebafak-ka pe'dan-nala neu.

⁴Basa boema, halan-na nananamanenek nadodolo, mangguluk-ka no ta'tas-sa liin-na nadodolo; ma nai lii madodolok-ka tala'da, ta'tas-sa nangale'do tuti-nato.

⁵Hu kande, Manetualain paletan-na, de manada'di beuk-ka da'di, manada'di mata beuk, fo ita ta talak-kana fa.

⁶Hu kande paletan-na, de salju-a tu'da leo daebafak-ka mai; ma hu kande nadedenun-na, de u'daina, ana mai.

⁷Ana tao nate'e hataholi daebafak-ka, ue-le'din, fo ela ala bubuluk, lae Ana bei naue-nale'di.

⁸Boeo bana fuik-kala, leu leo bolok, ma leak-kala dalek leu, fo ala sulu lai ndunun-nala dalek,

⁹Sangu-a ana kalua neme kona mai, ma ani makasufuina, neme kii mai.

¹⁰Manetualain ani hahaen-na, taon-na oe-a lila, de Ana tao nasafalin, da'di eis mateaina.

¹¹Ana fua oe neu ko'as lain, ma ta'tas-sa mangale'don-na la'e ko'as-sa, de ko'as-sa nangale'do.

¹²Ko'as-sa la'ok leo basa daebafak-ka lala'en-na neu, no Manetualain paletan-na, de ko'as-sa la'ok leo mamanak lala'en-na neu.

¹³Manetualain fe u'dan-na mai, fo ana tao nakadoe dae-a, do boeo, soaneu Ana huku hataholi daebafak-ka; fafa'kama, soaneu Ana fes lita, susue-lalain ba'un-na seli, nahele losa dodoon-na.

¹⁴Hai Ayub, denge-denge ba'ihanak dei, fo mamanene leona; taoafik neu Manetualain manada'di beun-nala.

¹⁵Ade o bubuluk, tao leo beek, de Manetualain fe paleta, nalosa ndelas-sa nangale'do neme ko'as-sa ma masakoko'ak-ka mai do ta?

¹⁶Ade, o bubuluk, tao leo bee, de ko'as-sa la'o-la'o ma la'eneu manada'di beuk-kala leme Manetualain Fo Ana bubuluk la'iesak-kana mai do ta?

¹⁷Ta, ka'da o bisa haladoi, nana makadesek-ka metema ani konas-sa, la'e daebafak-ka.

¹⁸O bisa sama leo Manetualain, fo makapepela lalai maloa, de Ana tao natean sama leo liti nanapolik-ka do titinok-ka?

¹⁹Manoli ami, hata fo ami musa mafa'dan neu Manetualain; ami ta bisa mafa'da mangalele'do hata esa boen, nana ami dudu'a-aafim ta dai fa.

²⁰Au ta nau dokodoe, fo kokolak o Manetualain fa, te boso nalosak, Ana hapu ne'ek, fo Ana tao soe au.

²¹Besak ia, lalai-a mangale'don-na nasalaa nanseli, nalosa ana taon-na hataholi-a, matan-na keluha'buk; Ana fuu anin-na mai, de ana tao namaneu lalai-a.

²²Mangale'do manahiik-ka, ana to'da mai, neme kii mai, ma Manetualain mandela-masa'an, taon-na ita tasamanan.

²³Te'e-te'e, ita Manetualain, koasan-na ba'un-na seli; ita ta tapalani deka fan, Ana tao tunga ndoon-na, ma ndoos ma matetuk tataas esa; Ana beita tuni-ndeni nita hataholi daebafak-ka fa.

²⁴Hu ndia de, su'di see boe, muse fe ha'da-holomata neun, ma Ana ta paluu taoafik neu hataholi fo, ana manaku nae, ndia hataholi dodole maneu fa.”