Read Termanu AYUB 38 Bible Online

AYUB 38 - Termanu bible

AYUB 38

¹Basa boema, MANETUALAIN kokolak no Ayub neme ani sangu dale mai, nae leo ia:

²“See o, de o mapalani ta mamahele Au manatee-tenong-nga, nenik o hala-kokola nggoam-ma, ma louk ndia?

³Besak ia, o touk soona, masasale matak mo Au, fo mataa natatanek ia-la leona.

⁴Lelek Au akadada'dik daebafak ia, te o so do beik? Metema, memak o malelam-ma ba'uk soona, mataa leona!

⁵See kande, naketu daebafak-ka loloan-na? See kande, hela tali uukuk-ka, fo ukun-nana? O malelak natataan-na do ta?

⁶Leo beek fo dii manatia-toba daebafak-ka, lapadeik lahele? See kande, pe'da daebafak-ka batu netes, no matea-mahelek,

⁷nai lelek, nduu fafaik-kala, lakamee sama-sama loo mahahaek nusa so'dak-kala ma ala eeki-latadale no namahoko-seteleek.

⁸ See kande, kena-ketu lelesu-a, fo ana bakate'te tasi maloaina nai lelek oe-a nasapupulak, neme daebafak-ka buin-na mai?

⁹Au nde lala ketu tasi-a, nenik ko'as-sa, de Au potin nenik makahatuk-ka.

¹⁰Au aketu tasi maloaina, too-lanen, ma Au bakate'ten, nenik lelesu nananggoe nisak.

¹¹Au afa'dan ae, ‘Too-lanen nde ia, de boso la'ok selin! O lii matuainam-mala, late'e ka'da ia.’

¹²Hai Ayub, o madenu mita la'i esa, fo fe lolebalahaak-ka, ana mai so do beik?

¹³O madenu mita dulufula, ana ho'u daebafak-ka, ma o sasapu heni hataholi mangalauk-ka, neme sila mamane nafunin-na mai so do beik?

¹⁴Lele'dok-ka mangale'dok, de ana fe tita letek ma bafak-ka, no mangale'dok, sama leo dede'dek-ka nai dae ulek-ka, ma didikuk-ka, nai ba'du manalu esa.

¹⁵Lele'dok-ka mangale'don-na, nasalaa nanseli, ba'eneu hataholi lamatua taak-ka, ma nakatakas, tao naseti-nalakak.

¹⁶O kona hai leo tasi-a matan-na, nai bui mete'en-na so do beik? O la'o-la'o hai neme tasi maloaina laten-na so do beik?

¹⁷Hapu hataholi natu'du hai o, lelesuina manai bolo mamates, fo makahatu kiu-kiuina, matan-na so do beik?

¹⁸O hapu neuk-ma, daebafak-ka loloan-na do ta? Mataa leona, metema o malak-kana.

¹⁹Ade, o bubuluk, mangale'dok-ka, ana mai neme bee mai, ma makahatuk-ka mata matetun-na nai bee?

²⁰Ade, o bisa matu'du makahatuk-ka no mangale'dok-ka, too-lanen do ta? do madenu falik-kasa metema ala mai?

²¹Tao leo bee-o, o bisa, nanahu o mamalasi so, ma lelek daebafak-ka nananakadada'dik te, o so!

²²O donge-dama hai Au mamana pepe'dang, fo salju no u'da batu-a mamananan-na,

²³fo Au pe'dan soaneu fai toto'a-tataak-ka, soaneu lelek fai natee-natatik-ka do?

²⁴Ade, o bubuluk le'do-a mamana nate'en-na do? do ani timu-a, ana mai neme bee mai?

²⁵See kande, kali oelolok ba'eneu u'dan matuaina, ma ana fe mangguluk-ka no ndelas-sa enok?

²⁶See kande, fe u'dan leo moo solokaek-ka neu, ma leo dae nees-sa neu?

²⁷See kande tee-tee daebafa tuuk ma tokotik-ka, nalosa basa na'u-la ala moli?

²⁸Ade, u'dan-na ma ama bongik do? Dinis-sa oe manati'ti-na, aman nde see?

²⁹Ade, oe eis-sa, ma inak do? See nde bongi dinis manalilak-ka?

³⁰See tao nasafali oe-a da'di batu, ma ana taon-na tasi poin-na da'di natea?

³¹ O bisa puputu makabubua, nduu bubuak Kartika do? do o se'i heni, nduuk Belantik-ka, langen-na do?

³²O bisa hela-nole nduuk-kala la'e fain-na, ma o maketu nduu Ofak-ka, ana-matua, enon-na do?

³³Ade, o bubuluk hoholo-lalanek, manai lalai maloaina do? ma o bisa makalala'ok-kana, nai daebafak-ka do?

³⁴Ade, o bisa fe paleta neu ko'as-sa, ma madenun, fo nadiu o nenik u'dan?

³⁵Ma metema, o madenu ta'tas-sala, tuti-nato, soona, ade ala mai, fo lafa'da lae, “Au, Tuan!”?

³⁶Neme see mai, manupui ibis-sa, ana bubuluk nae faihi'da, Lee Nil-la neukose ana lifu-a? See nafa'da manulaluk-ka, nae u'dan-na sanga mai?

³⁷See dodole maneun-na dai, soaneu ana leke ko'as-sa, fo nasafalin, nalosa u'dan-na mai,

³⁸u'dan fo manatao natea afu-a ana da'di bubuak, ma dae la lakadiditaok?

³⁹Ade, o bisa usi fe singa-la nana'ak, fo hani makabete anan-nala tein-na,

⁴⁰metema, ala sulu nai leak dale, do ala loi nai ndunun-nala dalek do?

⁴¹See fali manupui kaa kamala'ak-ka, fo ana laa neu-mai-neu-mai sanga nana'ak? See kande, fe tutulu-fafalik boe, metema anan-nala, laloo beebou neu Au, loke nana'ak?