Read Termanu AYUB 5 Bible Online

AYUB 5 - Termanu bible

AYUB 5

¹Hai Ayub, maloo bou-bou leona, fo hapu natataak do ta? O moke tutulu-fafalik neme ata nusa so'dak beek-ka mai?

²Ka'da hataholi nggoak-ka, mesak-kana mate, nana dale he'din-na.

³Au ita hai hataholi nggoak-ka; mete so'dan-na soona, matea-mahelek nanseli. Tehu no kaiboboianak mesak-kana, de au soo-supa mamana leleon-na.

⁴Boema, anan-nala ta hapu nasulu-nahapak makandondook so'on ta hapu hataholi nasala'e fas, nai manakee-manafula matan fa.

⁵Ala ketu-kolu beek nai tinan-nala dale, hataholi kamala'ak-ka, na'a henin so. Nakalenak, gandum manai dila-nggauk-ka tala'da, hataholi kamala'ak-ka na'a henin so. Hataholi manatenepeta hata-heto-a, ana maku hata-heton ma su'i-beten-nala.

⁶Tatao-nono'i mangalauk-ka, ana ta mai neme daebafak-ka mai fa; toto'a-tatak-ka ta da'di neme dae-a mai fa.

⁷Ta! Te hataholi daebafak-ka, nde neni soe soaneu aoinan-na mesak-kana, sama leo ha'i masapipiti neme ha'i-a mesak-kana mai.

⁸Metema au nde o soona, neukose au aloo bou-bou neu Manetualain. Neukose au kalaak au dede'ang-nga neun.

⁹Manetualain tao tatao-nono'i matuaina-la, de ita ta hapu dodoo-tala fan, Ana tao manada'di beuk-kala, ta hapu leke-na dede'un-na fa, ma ta basa fan.

¹⁰Ana fe u'dan leo daebafak-ka mai, nalosa tina, ma mook-kala hapu oe.

¹¹Ndia nde Manetualain, fo manaso'u namadema hataholi taidaek-ka, ma manataon-nala hataholi manato'a-taak-ka naua-nanale.

¹² Ana taon-na hataholi malela keke'dik-ka, dale tutu'un-na, ta da'di fa, nakahihi'ik-kana, de Ana ho'un-na hataholi malelak ma manatee-tenok-ka, nalosa sila sasanga enon lala'en-na, ta da'di fa, ma sila dudu'a-aafin, ke'di seluk-kasa.

¹⁴Nai fai lele'don-na, makahatuk-ka potin-nalas, de lafangganggama, sama leo nai fai le'odaen-na.

¹⁵Tehu, Manetualain soi-tefan-na: hataholi nuu-taa hata-taak-ka neme mamates-sa mai, ma hataholi taidaek-ka, neme tuni-ndenik-ka mai.

¹⁶Besak ia, hapu namahehenak boe, ba'eneu hataholi fo, nuun ta. Ma hataholi mangalauk-ka, ta nahahala fa, nanahu Manetualain ko'o ketu bafan-na.

¹⁷ Metema Manetualain ka'i o soona, o maua-manale! Metema nakamuu o soona, dalem-ma boso ba'ihana.

¹⁸ Nana, Manetualain nde tao nahe'di, de Ndia boeo, nde puli-namo'do, Ma liman fo manafepa-li'uk-ka, nde tao malole falik-kana.

¹⁹Metema, soe-a mai soona, o nanasoi-tefak tataas esa.

²⁰Metema, la'a-ndoes mangalau soona, neukose ta mate o no la'as-sa fa. Metema natee-natatik-ka, ka'bo-ka'bo soona, o nee-nee lino-lino neme mamates-sa mai.

²¹O nanananeak, de o ta kokolak manggenggeo hataholi na'den, ma ta makananasak hataholi fa; o ta bii masasalematak moo soe-a fa.

²²Metema, naseti-nalakak, ma la'a-ndoes mai soona, neukose o matea-mahele, ma nakalenak o hika. O masasalematak moo bana makaa-makisu mangalauk-ka boeo, o ta mame'da bibii-namata'uk, do o tenem-ma hailua fa.

²³O foi-fala tina, neukose batun ta; neukose bana fuik-ka, ta sapu-na o fa.

²⁴Neukose, o leo nai o lalaa temam dale, no nee-nee lino-linok; ma metema o palisak o bi'ilopom-mala soona, basa-basas lamatetu, ta mopo esa boen.

²⁵Neukose, ta leke-na o upu-anam fa, nana dede'un-nala, sama leo na'u manai mook-ka.

²⁶Nono'kabai, ketu-kolu gandum tasak-ka, la'e fain-na, neukose o so'dam-ma boeo, so'da-la'dak, losa o fai lasim-ma.

²⁷Ayub, ami palisak basa sila-la so. Hala-kokolak sila-la, la'en, da'di ka'da sipok-kana leona.”