Read Termanu AYUB 6 Bible Online

AYUB 6 - Termanu bible

AYUB 6

¹Boema Ayub nataa nae, “Leouni'ka, tai au toto'a-sosotang ia soona,

³tao leo bee-o, belan-na lena heni solokaek manai tasi su'uk-ka. Da'di boso dodoo doak-kana, metema, au ta anea au dede'a-kokolang fa, fo au kokolak no dedelek.

⁴Manetualain, Fo Manakoasa, kokou isin-na tola au aopang-nga; de lason-na, nananama leo basa au aopaa-samaneng lala'en-na neu. Manetualain koasa matuainan-na, neni bibii-namata'uk nanseli, de nono'kabai, musu nook-ka solda'dun-nala sapu-la au.

⁵Metema, fe keledei-a na'u momo'dok soona, neukose na'a, fo nakabete, losa dai ma lena. Leondiak boe, metema fe sapi-a nana'an-na neu.

⁶Tehu see nau na'a, nana'a mamis? Ade, manutolo fulan-na hapu la'dan-na do?

⁷Au ta hii afaloe la'e fan; nana au maluan matema au u'an.

⁸Tao le'e de, Manetualain ta hii namanene au huhule-haladoing fa? Tao le'e de, Ana ta taoafik neu au hala naloloong-nga fa?

⁹Sa'di leo been-na, Manetualain nau tao nakalulutuk au! Sa'di leo been-na, Manetualain ho'i nakeketuk fo taonisa au!

¹⁰Neukose, dede'ak ndia, nalupa kokoe-nanasik ba'eneu au; neukose au longe nai doidosok-ka tala'da. Au tunga, ma au taoafik akandoo, neu basa Manetualain, Fo Malalao-malalafuk-ka, paletan lala'en-na.

¹¹Ade, au be'i-balakaing leo beek, de nalosa au bei aso'da? Ade, au namahehenang-nga leo beek, fo au hii aso'da ala dook-ka?

¹²Ade, au aopaang ia, tean-na leo batu-a do? Au aopaang ia, nanataok neme liti-a mai do?

¹³Basa au be'i-balakaing, hu kande sanga tutulu-fafalik; Ta hapu tutulu-fafalik, ba'eneu au so'on.

¹⁴Nai doidosok leo ia-ka dalek, au amahena neu tia-lai malole. Ade, au bei lilineka ahele, do au afandele heni Manetualain Fo Manakoasa so do?

¹⁵Tehu emi, hai, tolanoong-ngala lemin, ta hapu amahele, do tasalai dea-tala neu emi fa. Emi sama leo lee manama'dak-ka, nai faik fo, u'dan-na ta mai fa.

¹⁶Emi sama leo, lee fo, oen-na ene, de ana ta faa fa, nanahu salju potin-nan, de oen-na lila.

¹⁷Metema fai hanas-sa losa lai-lai soona, salju ma eis ndia noe henin, de len ta. Lee buin-na, namatuu, oen ta, de namatuu-tongo.

¹⁸Kafila-la latofa-latalak, nai lelek, ala sanga oe; ala leu-laak, de mates lai moo solokaek-ka.

¹⁹Kafilah leme Syeba, ma leme Tema mai, fo ala sanga oe ndia, ma lamahena oe ndia.

²⁰Tehu, sila namahehenan-na, manada'di tak nai lee oe taak-ka su'un-na.

²¹Emi sama leo lee ndia, tolanoong-ngo; o makadedeak, nana o bii mete au doi-dosong.

²²Tao le'e? Ade, au oke hata esa, neme o mai do? Do au adenu o, fo muu sosolo hataholi, soaneu au paluung-nga do?

²³Ade, au oke o soi-tefa-mala au, do soi-mala au neme musu fo, dale kasian ta ndia mai do?

²⁴Na, manoli au, ma matu'du au salang-nga leona! Neukose, au denge-denge, fo au amanene o hala-kokolam.

²⁵Hala-kokolak ndoos-sa, ana tao makasufu dalek-ka, tehu, o kokolam-ma louk soona, sosoa-ndandaan ta!

²⁶Emi mafa'da, mae au dede'a-kokolang, ka'da anin mesak-kana; palsuma la'iesak-kana, emi mataa au, fo manaketu namahehenak ia so.

²⁷Nakalenak, emi tu'u batu, soaneu ni'iana kisa-anamaak-ka, ua-nalen, emi ke'di-ndiu, emi tia-lai malolem-ma, fo emi mamasu'i.

²⁸So'ba, taoafik neu au; hapu nai bee, au asapepeko-asandandali emi?

²⁹Boso ho'i nakeketuk fo, ta ndoos ma matetuk fa, mame'dak leona! Boso makamuu-makadau au, te tete'ek-ka, au salang ta.

³⁰Ade, nai o dale dodoom-ma, au asapepeko-asandandali, ma ta bisa mete kofe'ek, beek-ka nde malole, ma beek-ka nde nakamuu-nakadauk-ka fa do?