Read Termanu AYUB 8 Bible Online

AYUB 8 - Termanu bible

AYUB 8

¹Boema Bildad nae, “O kokolak mae leondia, losa faihi'da? O dede'a-kokolam, sama leo anin mangguk-ka.

³Beita la'i esa fo, Manetualain tao peko-pakik, ndoos ma matetuk-ka fa; beita la'i esa fo napadedeik natetetu ndoos-sa, fo ta da'di fa.

⁴Fafa'kama, o anam-mala lasala-lasingo neu Manetualain, soona nandaa Ana hukus.

⁵Tehu, metema o masulu-mahapa neu Manetualain soona, moke dale kasian-na, ma dokodoe do'o do ampon,

⁶metema, o dalem-ma ndoos, ma bu'u-ba'en ta soona, neukose Manetualain tulu-fali o no lai-laik; ma da'di leo babalan-na, de neukose o uma-loom, nanatao nabebeuk.

⁷O su'i-betem manamopok sila-la, sosoa-ndandaan ta, metema nakasasamak-kana no hata fo, mahani te neukose o hapun.

⁸O muse taoafik neu hataholi malelak, ma manatee-tenok makahulun eli, ma dodoo-tatai, hata fo basa bei-ba'i kai-la, la'ola'din.

⁹Ita so'dan-na keke'uanak, te ita ta buhuluk hata-hata fa; ita fai maso'dan-na, sama leo salaok-ka.

¹⁰Mamanene makahuluk, hataholi malelak ma manatee-tenok sila-la, dede'a-kokolan dei, ala fe o nanolik-ka nde ia nae,

¹¹‘Hanoe-a, moli nai ka'da mamana oe; henak-ka moli nai ka'da dae manapepetek.

¹²Metema, ma'da oen-na soona, hanoe ndia male-tale lai-lai, lena heni na'u-aiana fe'ek-kala. Te se'kona, doon-na bei momo'dok, te fain-na beita losa, soaneu ke'di-nan, fo paken.

¹³Hataholi lamatua taak-ka, leondiak. Ana nafandele heni Manetualain, boema mopo namahehenan-na.

¹⁴Nasalai dean-na neu abas mangana'uk, dook esa; ma bolau ndunuk-ka, da'di neu namahehelen-na.

¹⁵Metema, tao bolau ndunuk ndia, da'di nasalai deak soona, teak-ka do ta? Metema, tao abas ndia da'di mamana hoho'uk soona, nakatatakak do ta?’

¹⁶Hataholi lamatua taak-ka, so'da-la'dan sama leo fii-a; metema, le'do haan-na la'en soona, ana moli fo nalole, fo henu osi dale.

¹⁷Okan-na fefeo-na batu manai dae dale-la; ana fefeo nahele, de ta nanggengo fa.

¹⁸Tehu besak ia, so'ba fe'a su'dik fii ndia, soona nono'kabai, fii ta nai ndia fa.

¹⁹Tete'ek-ka, hataholi mangalauk-ka, namahokon-na ka'da nde ndia; fo hataholi fe'ek mai nggatin.

²⁰Tehu, beita la'i esa fo, Manetualain la'oela hataholi manalilinekak-ka fa, ma beita la'i esa boen, fo Ana ta tulu-fali hataholi malelesik-ka fa.

²¹Neukose, Ana taon-na o bafam-ma, hika, ma neukose o difadoom-ma, eeki-natadale.

²²Hataholi fo, ana ta hii o fa, neukose ana mae, ma name'da aoinan-na nai daeanak, ma neukose, hataholi mangalauk-ka uman-na, nanatao nalutuk losa mopon.”