Read Termanu AYUB 9 Bible Online

AYUB 9 - Termanu bible

AYUB 9

¹ Tehu Ayub nataa nae, “Memak, au bubuluk, o hala-kokolam ndia, ta sala fan. Tehu, hapu nai bee, hataholi daebafak-ka nadede'a la'ban Manetualain, fo ana sengin?

³Manetualain fe natatanek lifun esa, soona hataholi daebafak-ka, ta hapu nataa nala esa boen.

⁴Manetualain ndia, malelak ma manatee-tenok nanseli, ma manakoasa; see bisa nakataka la'ban-nana?

⁵Manetualain kekoheok letek-ka, te hataholi ta bubuluk fa, boema Ana fae nalenga-natonon, nenik nasa-melun.

⁶Manetualain tao dae manggengok-ka, losa daebafak-ka naleulilok, ma dii manato'ba daebafak-ka laleuk.

⁷Manetualain bisa kena-ka'i le'do tii nai fai fafain-na, ma Ana ta fe nduuk-kala, lasalaa nai fai le'odaen-na fa.

⁸Ana nakapepela lalai, ta no tutulu-fafalik neme su'di see mai boen; Ana heheta-aa'i buta tasi-a muliha'in-na.

⁹ Ana pasak, nduu bubuak manai boboa kona-la nai lalai, ma nduu Biduk, nduu Belantik ma nduu Kartika boe.

¹⁰Ita ta bisa tai-dodoo talelak, tatao-nono'in lala'en-na fa, ma ita ta hapu leke tala manada'di beun-nala fa.

¹¹Ana la'ok tunga au matang-nga, tehu au ta ita fan; ma nasalape tunga au boboang-nga, tehu au ta alelak-kana fa.

¹²Metema, Ana kalo hata-heto soona, see kande napalani, kena-ka'in-nana? do napalani natanen nae, ‘Hai, O tao beek ndia?’

¹³Manetualain ta nakatatakak nasa-melun, ma dale namahanan-na fa; basa Rahab eila'o-limalopen-nala boeo, lakatele neun.

¹⁴Da'di, tao leo bee fo, au bisa ase'i on? Neukose au ataan nenik dede'ak matak beek-ka?

¹⁵Leomae au salang ta, tehu, au ta bole se'i fan, ka'da au dokodoe, susue-lalaik neme Manetualain, fo au manakee-manafulang-nga?

¹⁶Leouni'ka, Ana nataa au nai lelek au aloo bou-bou soona, au daleng-nga naba'e, ade tete'ek-ka, Ana nau namanene au halang-nga do ta?

¹⁷Ana tao nakalulutuk au, nai ani-sangu dale, ma Ana popo-tama au doi-dosong, tunga dale hihii mesan-na.

¹⁸Ana ta po'ilotak au, hela au hahaeng-nga, hatematak esa boen; nakalenak, Ana fe au akabete nenik makahe'duk-ka.

¹⁹Ade, au muse akasusu'di balakaik on do? Tehu mitak, be'i-balakain ba'un-na seli! Leo uni'ka, au kalaak au dede'ang-nga neun, soona see kande napalani naloon leo manakee-manafula matan neu?

²⁰Au lilineka, ma ta tao sala-singok fa, tehu au bafang-nga, nafa'da nae, au ta ndoos fa; basa hala-kokolak fo, au difadoong-nga kokolak-kana, nono'kabai, ana fe salak neu au aoinang-nga.

²¹Au salang ta, tehu au ta afaduli fa. Au ta hii aso'da so'on. Ba'eneu au soona, au ta paluu hata-hata so'on; manatao salak ma manatao ndoos, ua-nalen-nala sama, fo nde: neukose Manetualain tao namopo-namate duas no'u-no'u.

²³Metema, no kaiboik, mate hataholi sala taak-ka soona, Manetualain ka'da hika.

²⁴Manetualain fe daebafak-ka neu hataholi malelesik-ka, ma Ana taon-na basa manakee-manafula, poke matan-nala so. Manetualain tao basa ia-la, nana metema ta Ndia fa soona, see bai?

²⁵Au fai maso'dang-nga, sapu-lalo no lai-laik nanseli, boema mopok-kana, ta no ua-nale malole fa.

²⁶Sama leo ofa baluk-ka nalaik, leondiak boe au so'dang-nga mopo-kana no lai-laik, sama leo balupua la'u manuana.

²⁷Metema, au nau hume, ma hika-latadale, metema, au so'ba afandele heni doidosok lala'en-na, soona au dale manasusang-nga, fali ma'in, fo ana usi au; nana au bubuluk, Manetualain fe salak neu nahele.

²⁹Nah, metema leondiak soona, au bei paluu beek bai?

³⁰Ta hapu sabu, fo bisa tao namopo au sala-singong fa!

³¹Manetualain fe au tenak nai kadafuk dale, losa au bua papakeng-nga boeo, nafa'da nae, au nanamaluak.

³²Leouni'ka Manetualain ndia, hataholi daebafak soona, neukose au bisa ataan; boema, neukose ami meu leo manake-manafula meu, fo naketu nale'a-napilik lala'en-na.

³³Tehu, ta hapu manake-manafula nai ami tala'da fa, fo naketu ami dua fa.

³⁴Sa'di leo been-na, Manetualain hahae huku au, ma Ana hahae tao-na bibiik-ka neme au mai!

³⁵Boema, au ta bii fan, de neukose besak ia, au kokolak, nana au ta ame'da au salang-nga fa.