Read Termanu MAZMUR 101 Bible Online

MAZMUR 101 - Termanu bible

MAZMUR 101

¹Dauk Kokoa-kikiok. Au nau akamee la'eneu lilinekak, ma ndoos ma matetuk-ka, fo au nakamee kokoa-kikiong, ba'eneu O, ou MANETUALAIN!

²Au nau taoafik neu, maso'dak fo bu'u-ba'e tak-ka, eno-dalan. Faihi'da, O mai leo au mai? Au nau aso'da no malalao-malalafuk nai au umang,

³neukose au ta po'ilotak tatao-nono'i mangalauk-ka fa. Au ta hii hataholi manafali deak-ka, tatao-nono'in fa, ma au ta nau sanga langa he'dik o fas.

⁴Au ta nau tao po'de-pai fa ma au ta nau solodo'dok leo tatao-nono'i mangalauk-ka dalek u fa.

⁵Neukose, au tao amopo-amate hataholi fo, no denge-dengek, ana tao nanggenggeo hataholi na'den. Neukose au ta po'ilotak hataholi manakoao-ndaeaok-ka, ma hataholi fo, namatutua-namadedema aoinan-na.

⁶Au ahiik hataholi fo, ana lilineka neu Manetualain; hataholi sila, bole leo nai au umang. Hataholi fo aso'dan-na bu'u-ba'en ta, bole nalalau-naoono au.

⁷Manatipu-daik-ka, ta bole leo nai au umang fa; masapepeko-masandandalik-ka, neukose ta nakatatakak nai au matang fa.

⁸Neme faik leo faik neu, neukose au tao amopo-amate, hataholi manatao tatao-nono'i mangalauk-kala, nai nusak ia. Basa hataholi manatao tatao-nono'i manalauk-kala, neukose au tao amopo-amates leme MANETUALAIN kotan-na mai.