Read Termanu MAZMUR 105 Bible Online

MAZMUR 105 - Termanu bible

MAZMUR 105

¹Moke makasi neu MANETUALAIN, tui-benga matua-mademan, tui tatao-nono'in neu leoina-la.

²Makamee koa-kio ba'eneu MANETUALAIN, tui-benga basa tatao-nono'in fo dodoo doak-kana.

³Ndia nde MANETUALAIN Fo Malalao-malalafuk nanseli; mamahoko leona, nana Ndia nuun ita, basa manasene-do'ok-kala ela leo bee-na, mamahoko-setelee.

⁴Moke be'i-balakaik neme Ndia mai, sene-do'ok neun tataas esa.

⁵Hai atan Abraham, tititi-nonosin-nala, ma Yakob, fo hataholi hehelen-na, tititi-nonosin-nala, mafandendelek Ana tao basa manada'di beuk-kala, boso mafandele heni nakeketun-nala.

⁷MANETUALAIN nde bee-na, ita Manetualain-na, nakeketun-na, nananakalala'ok nai basa daebafak-ka lala'ena.

⁸Ana nafandele hehelu-balataan tataas esa, hehelu-balataan, nananakalala'ok losa dodoon-na.

⁹ Ana tao hehelu-balataak ndia, no Abraham, de basa boema, no Isak;

¹⁰ boema Ana tao natete-nahehelen no Yakob, fo ana da'di hehelu-balataak fo manaketu-basa tak ba'eneu hataholi Israel-la.

¹¹Ana nafa'da nae, “Neukose Au fe emi, dae Kanaan-na, fo da'di emi pusakam.”

¹²Makahulun-na, Manetualain anan-nala laso'da da'di leo hataholi manamai leme naa, dede'un-nala lumanak mesan.

¹³Ala laleu-lalaak leme leoina, leo leoina leu, ala lali leme nusak esa leo nusak esa leu.

¹⁴ Tehu MANETUALAIN ta po'ilotak su'di see boen, tuni-ndeni fas; hu kande sila, de Ana fe nasanene'dak neu mane-manek-kala nae,

¹⁵“Boso tao Au hataholi heheleng-ngala, boso tao mangalauk neu Au nabing-ngala!”

¹⁶ MANETUALAIN fe la'a-ndoes-sa, nai nusak ndia, ma Ana ho'i-na basa nana'ak nanasadiak-kala.

¹⁷ Tehu nadenu hataholi esa, neu nakahuluk neme sila mai, fo nde Yusuf, fo nananase'o basak, da'di leo ata.

¹⁸ Ein-na, nanahengek nenik lange, namosina besi-a, nanapa'ak nai botoliin-na.

¹⁹Mate'en-na, ana da'di sama leo ana neuk basak-ka, MANETUALAIN dede'a-kokolan, nafa'da nae, ana la'en.

²⁰ Boema mane Masir fo, manakoasa leoina-la, soi-po'in neme bui dale mai.

²¹ Ala hapu bela-ba'uk, ito-ato uma manek-ka, ma ana koasa, uma manek-ka hata-heton lala'ena;

²²boeo nanuu hak, soaneu ito-ato basa manek-ka, hataholi mana'a ngga'din-nala, ma nauli-nalanga hataholi lasik-kala.

²³ Boema Yakob neu leo Masir neu, de ana leo nahele neme naa, da'di leo hataholi manamai.

²⁴ MANETUALAIN tao-na anan-nala, boetai lamaba'u, nalosa be'i-balakain-nala lena heni musu noon-nala.

²⁵Ana tao nasafali, hataholi Masir-rala dalen-nala, nalosa ala ta hii anan-nala fa, de ala tao anan-nala, no ke'di-ndiuk.

²⁶ Boema nadenu atan Musa ma Harun fo hataholi hehelen-na.

²⁷Ala tao manada'di beuk-kala neme Masir, ma tatao-nono'i matuaina-la, neme MANETUALAIN mai,

²⁸ ma ala tunga Manetualain paletan-na. Boema MANETUALAIN tao-na nusak ndia da'di makahatuk.

²⁹ Ana tao nasafali sila leen-nala oen-na da'di daak, nalosa mate la'iesak i'ak-kala.

³⁰ Lo'donggelek-kala, lalo'do-lalaek nai sila nusan-na, nakalenak leu leo manek-ka uma manen dale leu.

³¹ No Manetualain paletan-na, de pena-la ma nenik-kala mai, de lakamomotu-la nusak-ka lala'ena.

³² Ana ngganga eis-sa mai, fo nggati u'dan-na, ma Ana fe ndela-sa tuti-nato.

³³Ana tao natu'u ai angol-lala, ma ai kaak-kala, ma Ana tao nabuu basa sila ain-nala.

³⁴ No Manetualain paletan-na, de lamak-kala mai, dede'un-nala makadotok nanseli, de ta leke-nala fas

³⁵Ala la'a heni, basa bubu'u-palusa manai tina-la, ma la'a heni basa sila dae-oen buna boan.

³⁶ Boema, Ana taonisa hataholi Masir-rala anatou ulun-nala.

³⁷ Basa boema, Ana noo hataholi Israel-lala kalua, de ala ho'i lini lilopilas ma lilofulak; basa-basas so'da-la'dak ma balakaik.

³⁸Bibii-namata'u matuaina, la'e hataholi Masir-ra, da'di, ala lamahoko, nai lelek hataholi Israel-lala la'o.

³⁹ Manetualain nakapepela ko'as-sa, fo nasulu anan-nala, ma ha'i fo nasalaa, nai fai le'odaen-na.

⁴⁰ Ala loke boema, Ana fes manupui kukuhaak, ana fes loti neme nusa so'dak-ka mai, de la'a losa lakabete.

⁴¹ Ana fa'a ba'e batu-a, boema oe-a faa mai, de ana faa sama leo lee nai moo solokaek-ka.

⁴²Nana MANETUALAIN nafandele hehelu-balataan neu atan Abraham.

⁴³Boema, Ana hela-nole anan-nala, no namahoko-seteleek, ma hataholi hehelen-nala no eeki-natadalek.

⁴⁴ Ana fe leoina-la daen-na neu anan-nala, ma Ana fe tinan-nala, leo anan-nala neu, fo da'di anan-nala pusakan,

⁴⁵fo ela anan sila-la, tunga hoholo-lalanen, ma tunga paletan-nala. Koa-kio MANETUALAIN leona!