Read Termanu MAZMUR 111 Bible Online

MAZMUR 111 - Termanu bible

MAZMUR 111

¹Koa-kio MANETUALAIN leona! No dale katema tuak, au oke makasi neu MANETUALAIN nai anan-nala nakabubuan-na tala'da.

²Tete'ek-ka, Manetualain tatao-nono'in matabeuk, nandaa, hataholi fo lahiik-kana, ala palisak matalololen.

³MANETUALAIN ue-le'din, matua-madema ma nanakoa-nanakiok, ndoos ma matetun, manaketu-basa tak losa dodoon-na.

⁴MANETUALAIN ndia, manasue ma manalai, Ana tao tatao-nono'ik fo, dodoo doak-kana, fo ela ita tafandendelek tahelen.

⁵Ana fe hataholi kamahehelek-ka, nana'a-nininuk ma nafandele tataas esa, neu hehelu-balataan.

⁶Ana natu'du basa koasan-na neu anan-nala, nenik Ana fes leoina-la dae pusakan-nala so.

⁷MANETUALAIN ndoos ma matetuk, ma manalilinekak, nai tatao-nono'in lala'ena dalek, ma paletan lala'ena, hapu nananamahelek.

⁸Hoholo-lalanen nakatatakak neme tepo lelek leo tepo lelek neu, Ana fen nai ndoos ma matetuk-ka dalek.

⁹Ana soi-po'i anan-nala, de Ana tao hehelu-balataak manaketu-basa tak nos. Ndia nde MANETUALAIN fo malalao-malalafuk, ma makadelek!

¹⁰ Ba'eneu see fo, ana hii da'di manatee-tenok soona, muse ana fe ha'da-holomata neu MANETUALAIN, Ana fe malelak-ka neu basa hataholi manatunga paletan-na. Kokoa-kikiok ba'eneu MANETUALAIN, neme tepo lelek leo tepo lelek neu!