Read Termanu MAZMUR 116 Bible Online

MAZMUR 116 - Termanu bible

MAZMUR 116

¹Au sue-lai MANETUALAIN, nana namanene au ma Ana taoafik neu au dokodoeng-nga.

²Ana namanene au, nai lelek au aloo bou-bou neun,

³Soe mamates-sa, fe au nasanene'da mahelek; soe mamates-sa, neni bibii-amata'uk fe au, ana tao-na au daleng-nga, ta tesa-tama ma bii-namata'u.

⁴Boema, au aloo bou-bou neu MANETUALAIN ae, “Ou MANETUALAIN, au dokodoe, fo soi-tefa-mala au!”

⁵MANETUALAIN ndia, manasue-manalai, ma ndoos ma matetuk; ita Manetualain, henuk no dale kasian.

⁶MANETUALAIN nakaboboi hataholi taidaek-ka; Lelek au manatulu-manafaling ta, Ana soi-tefa-nala au.

⁷Au daleng-nga tesa-tama, nana MANETUALAIN malole neu au.

⁸MANETUALAIN soi-tefa-nala au, neme mamates-sa mai so; Ana kokoe-nanasi au, ma Ana ta po'ilotak au tu'u u fa.

⁹Boema, au bole aso'da nai daebafak ia, fo nai MANETUALAIN nasulu-nahapan-na dalek.

¹⁰ Au amahele ahele, leomae au afa'da ae, “Au nanatuni-ndenik nanseli.”

¹¹Nai au napangamang-nga dalek, au afa'da ae, “Ta hapu hataholi esa boen, fo hapu nananamahelek fa.”

¹²Au fe MANETUALAIN beek, fo balas dale malolen-na ba'eneu au?

¹³Neukose, au ini tutunu-hohotu angol, ba'eneu MANETUALAIN, fo au oke makasi neu tutulu-fafalin.

¹⁴Neukose au tao atetu, au hehelu-balataang neun, nai anan-nala lala'ena matan.

¹⁵MANETUALAIN nasasale dale nanseli, metema mate hataholi susue-lalain esa.

¹⁶Ou MANETUALAIN, O atam au ia, au boeo fe ha'da-holomata neu O, sama leo au inang. O soi-po'i au neme bui dale mai so.

¹⁷Neukose au ini fe O, tutunu-hohotu makasi, boema au atu'du huhule-haladoik neu O.

¹⁸Neukose au tao atetu au hehelu-balataang neu MANETUALAIN, nai anan-nala lala'ena matan,

¹⁹fo lakabubua nai Umam-ma so'dan-na, nai kota Yerusalem-ma, tala'da. Koa-kio MANETUALAIN leona!