Read Termanu MAZMUR 118 Bible Online

MAZMUR 118 - Termanu bible

MAZMUR 118

¹ Moke makasi neu MANETUALAIN, nana Ndia malole, ma susue-lalain manaketu-basa tak, losa dodoon-na.

²Ela leo bee-na, hataholi Israel-la nafa'da nae, “Susue-lalain manaketu-basa tak, losa dodoon-na.”

³Ela leo bee-na, basa imam-mala, lafa'da lae, “Susue-lalain manaketu-basa tak, losa dodoon-na.”

⁴Ela leo bee-na, basa hataholi kamahehelek-kala, lafa'da lae, “Susue-lalain manaketu-basa tak, losa dodoon-na.”

⁵Nai au makase'eng-nga dalek, au aloo bou-bou neu MANETUALAIN; boema nataa, de Ana soi-po'i au.

⁶ Au ta bii-amata'u fa, nana MANETUALAIN no au, hataholi daebafak-ka, ta hapu tao hata esa boen soaneu au.

⁷MANETUALAIN no au, fo Ana tulu-fali au, neukose au ita, au musung-nga kala.

⁸Malole lenak, tasulu-tahapa neu MANETUALAIN, neme tasalai dea-tala, neu hataholi daebafak.

⁹Malole lenak, tasulu-tahapa neu MANETUALAIN, neme tamahena neu manefetoana.

¹⁰Musu makadotok okofeo-la au; tehu no MANETUALAIN koasan-na, de au sengis.

¹¹Ala lakahapi-la au, neme mamanak lala'ena mai; tehu no MANETUALAIN koasan-na, de au sengis.

¹²Ala lakamomotu-la au, sama leo fani-a; tehu no MANETUALAIN koasan-na, de au sengis. Ala pila sama leo ha'i na'a makatema dila-nggauk-ka, tehu nai ka'da hatematak esa mesak-kana, sila ha'in-na, nanafuu nisak.

¹³Ala sapu-la au, de isabain-na, au tu'da, tehu MANETUALAIN tulu-fali au.

¹⁴ MANETUALAIN nde bee-na, au be'i-balakaing ma au kokoa-kikiong-nga. Ana soi-tefa-nala au so.

¹⁵Eeki sesengik-ka, nananamanenek nai anan-nala lalaa teman-nala nae, “MANETUALAIN tao tatao-nono'i matuaina-la!

¹⁶MANETUALAIN koasan-na, fe ita sesengik! MANETUALAIN tao tatao-nono'i matuaina-la.”

¹⁷Neukose ta mate au fa, tehu au aso'da ahele, fo tui-benga MANETUALAIN tatao-nono'in.

¹⁸MANETUALAIN fepa-li'u nanggae au so, tehu Ana ta fe au leo mamates-sa neu fa.

¹⁹Soi fe au, MANETUALAIN Uman-na, lelesuinan-na, fo ela au u leo dalek u, fo au oke makasi neun.

²⁰MANETUALAIN lelesuinan-na nde ia, fo ka'da hataholi manatao tunga ndoon-na, nde bole tunga ndia.

²¹Au koa-kio O, nana O sipok au huhule-haladoing; O fe basa au sesengik so.

²² Tuka uma-la, tu'uheni batu-la, ana da'di batu netes.

²³MANETUALAIN tatao-nono'in nde ndia, tete'ek-ka, ita dodoo doak-kana.

²⁴MANETUALAIN naketu faik-ka nde ia; mai fo ata tao feta (rayakan) no namahoko-seteleek.

²⁵ Ami dokodoe, MANETUALAIN, fo soi-tefa-mala ami, ou MANETUALAIN, fe ami sesengik!

²⁶ Nanaba'e-palak ba'eneu ndia fo, ana mai no MANETUALAIN na'den-na, ami fe emi baba'e-papalak, neme MANETUALAIN Uman mai.

²⁷Amak-ka nde bee-na, MANETUALAIN, dalen-na malole neu ita. Tutulumatak, fo la'ok nongo-nongo, ma ho'u ai ndanak nai emi limam-ma, fo okofeo-ma, MANETUALAIN mei tutunu-hohotun-na.

²⁸Au Manetualaing nde O, de au oke makasi eu O, Au Manetualaing-nga, au amatutua-amadedema O.

²⁹Moke makasi neu MANETUALAIN, nana Ndia malole susue-lalain manaketu-basa tak, losa dodoon-na.