Read Termanu MAZMUR 119 Bible Online

MAZMUR 119 - Termanu bible

MAZMUR 119

¹Maua-manalek ba'eneu hataholi fo, so'dan-na bu'u-ba'en ta, ma ana tunga MANETUALAIN hoholo-lalanen-nala.

²Maua-manalek ba'eneu hataholi fo, ana tunga paletan-nala, ma no dale katematuak, ana sanga enok, fo nalelak MANETUALAIN.

³Maua-manalek ba'eneu hataholi fo, ana tunga MANETUALAIN hihii-nanaun, ma ana ta tao, tatao-nono'i mangalauk fa.

⁴O fe ami, O hoholo-lalanem, ou MANETUALAIN, fo ela ami makalala'ok-kana, no lilinekak.

⁵Ela leo bee-na, au tunga O nakanenetem-mala no dale matea-mahelek.

⁶Metema, au taoafik neu basa O paletam-mala, soona neukose, au ta hapu mamaek fa.

⁷Metema, au anoli O nakeketum fo, ndoos ma matetuk-ka, soona au koa-kio O, no dale katematuak.

⁸Au nau tunga O hoholo-lalanem, de boso la'oela au makandondook.

⁹Hataholi muli-soluk-ka, nanea so'dan-na, fo bu'u-ba'en ta, metema naso'da tunga O paletam-ma.

¹⁰Au sanga enok no dale katematuak, fo au alelak O, boso po'ilotak au singo eme O paletam-ma mai.

¹¹Au pe'da O nanolim-ma, nai au daleng dale, fo ela au boso asala-asingo neu O.

¹²Ou MANETUALAIN au koa-kio O, manoli au, O nakeketum-ma.

¹³Au po'a-benga apane'e basa hoholo-lalanek fo, O fe kala.

¹⁴Au amahoko tunga O paletam-mala, sama leo, au anuu basa hata mata-matak lala'ena.

¹⁵Au nau anoli O nakeketum-mala, ma taoafik neu O natutu'dum-mala.

¹⁶O nakeketum-ma, tao namahoko au; neukose au ta afandele heni O nanolim-ma fa.

¹⁷Ela leo bee-na, O madale malole neu O atam ia, fo ela au aso'da ahele, ma tunga O nanolim-ma.

¹⁸Tao malaak au matang-nga, fo ela au ita nanolik fo nanadodoo doak nai O hoholo-lalanem dale.

¹⁹Ka'da hatematak esa mesak-kana, au leo nai daebafak ia, boso mafuni O hoholo-lalanem, neme au mai

²⁰Au daleng-nga, he'dis-sa, nanahu, tunga faik au ahiik bubuluk O hoholo-lalanem.

²¹O ka'i hataholi manakoa-ndaeaok-ka, ma O supa-soo hataholi fo, ana singo neme O paletam-ma mai.

²²Soi-po'i au, neme sila nakamumulu-nakamamaen, ma nakamuu-nakadaun mai, nana au akalala'ok O nakanenetem-ma.

²³Leomae basa manakoasa-la lakabubua, fo la'ban au, tehu O atam ia, neukose tai-dodoo O nakeketum-ma.

²⁴O nakanenetem-mala, da'di au manamanoli-mafa'dang, fo nandaa no au daleng-nga.

²⁵Au akandondoo nai daesopuk dale; tao mabebeu au so'dang-nga, tunga O hehelu-balataam.

²⁶Au manaku au tatao-nono'ing, boema, O mataa au; manoli au, O nakeketum-ma.

²⁷Tulu-fali au, fo au alelak matalolole O hoholo-lalanem-mala, neukose au tai-dodoo, O nanolim fo, nanadodoo doak ndia.

²⁸Au samaneng-nga lutu-lutu, hu kande susa tuni-ndenin, matetea-mahehele au, nandaa no O hehelu-balataam.

²⁹Madook au neme eno matofa-matalak-ka mai, hu kande O dale malolem-ma, manoli O hoholo-lalanem neu au.

³⁰Au hele basa soaneu tunga so, ma au afandendelek O paletam-ma, tataas esa.

³¹Au tunga O nakanenetem-mala so, ou MANETUALAIN, boso po'ilotak au hapu mamaek.

³²No namahokok, neukose au tunga O paletam-ma, nana O tao-ma au, boetai alelak.

³³Ou MANETUALAIN, manoli au, O nakeketum-mala, sosoa-ndandaan, fo ela au tungan losa mate'en-na.

³⁴Tao-ma au, alelak O hoholo-lalanem, fo ela au tungan, ma au tao-no'in no dale katematuak.

³⁵Ela leo bee-na, au ho'u ahele O paletam-ma, nanahu au dale hihiing-nga nde ndia.

³⁶Fe au dale hihiik, soaneu tunga O nakanenetem-ma, lena heni dale hihiik fo da'di kamasu'ik

³⁷Manea au, fo ela au boso usi ka'da hata fo, sosoa-ndandaan ta, tehu, fe au aso'da tunga, O hihii-nanaum.

³⁸Matetea-mahehele O hehelu-balataam soaneu O atam ia, hehelu-balataak fo, O fen neu hataholi manatunga neu O-a.

³⁹Madook nakamumulu-nakamamaek fo au bii-amata'u neun, nanahu, O hoholo-lalanem nde bee-na malole.

⁴⁰Fe au so'da beuk, nana O ndoos ma matetuk, au ahiik tunga O nakeketum-mala.

⁴¹Ou MANETUALAIN, matu'du leon mae, O sue-lai au nanseli, de soi-tefa-mala au, nandaa no O hehelu-balataam.

⁴²Soona au hapu ataa hataholi fo, nakamumulu-nakamamaek au, nana au asalai au deang-nga neu O hala-kokolam.

⁴³Tulu-fali au, fo afa'da ndoos tataas esa, nana au amahena neu O nakeketum-ma.

⁴⁴Au nau ho'u ahele O hoholo-lalanem, losa dodoon-na.

⁴⁵Soona neukose, au aso'da no ao loak, nanahu au sanga enok, fo tunga O nanolim-ma.

⁴⁶Neukose au tui-benga O nakanenetem-mala neu mane-manek-kala, de neukose au ta hapu mamaek fa.

⁴⁷Au namahokong-nga nde, au akalala'ok O paletam-ma, nana au sue-lai O paletam-ma.

⁴⁸Au fe ha'da-holomata, ma sue-lai O paletam-ma, neukose au tai-dodoo O nakeketum-ma.

⁴⁹Mafandendelek O hehelum-ma, neu O atam ia, heheluk fo, manafe namahehenak neu au-a.

⁵⁰Dede'ak-ka nde ia, nde ana kokoe-nanasi au nai au doi-dosong-nga dalek, nae O hehelum ndia, ana fe au aso'da.

⁵¹Hataholi manakoao-ndaeaok-ka, nakamumulu-nakamamaek au nanseli, tehu, au ta singo eme O hoholo-lalanem mai fa

⁵²au afandele neu O hoholo-lalanem, fo neme makahulun eli mai, boema au amahoko, ou MANETUALAIN.

⁵³Au amanasa hataholi mangalauk-ka nanseli, nanahu ala la'o ela O hoholo-lalanem.

⁵⁴Nai au maso'da keke'uanang, fo bei nai daebafak-ka, au tao O nakeketum-ma, da'di nakamee kokoa-kikiok.

⁵⁵Ou MANETUALAIN, nai fai le'odaen-na, au afandele O, de au ho'u ahele O hoholo-lalanem.

⁵⁶Au tunga O paletam-mala, de au hapu ua-nale malole.

⁵⁷Ou MANETUALAIN, fo au ahiik-ka, nde ka'da O, de au helu, neukose au akalala'ok O nanolim-ma.

⁵⁸Au dokodoe O dale kasiam-ma, no dale katematuak, sue-lai au, nandaa no O hehelum-ma.

⁵⁹Au dudu'a-dodoo basa, au ha'da-paliing so, de au aheluk, neukose au tunga O nakanenetem-ma.

⁶⁰Au ta ahani fa, te no lai-laik, au akalala'ok O paletam-ma.

⁶¹Hataholi mangalauk-ka, ana lona hihi'ik ba'eneu au, tehu au ta afandele heni, O hoholo-lalanem fa.

⁶²Au fo'a fatila'dak, fo au sanga koa-kio O, nanahu, O nakeketum-mala, ndoos ma matetuk.

⁶³Au tao tia-laik o basa hataholi kamahehelek-kala, ma basa hataholi fo, lakalala'ok O paletam-ma.

⁶⁴Ou MANETUALAIN, daebafak-ka henuk no O susue-lalaim, manoli au, O nakanenetem-mala leona!

⁶⁵Ou MANETUALAIN, O tao matetu O hehelum-ma, ma O tao malole neu O atam-ma so.

⁶⁶Fe au manatee-tenok ma malelak, nana au amahele neu O paletam-mala.

⁶⁷Beita nanahukuk fa, te au la'ok heo so, tehu besak ia, au ho'u ahele O paletam-ma.

⁶⁸Nana O malole, ma O tao malole, manoli au, O nakeketum-mala.

⁶⁹Hataholi manakoao-ndaeaok-ka, tao naggenggeo au na'deng-nga, tehu au tunga O nakeketum-ma no dale katematuak.

⁷⁰Hataholi sila-la, ta lalelak fa, tehu ba'eneu au soona, O hoholo-lalanem, nandaa no au daleng-nga.

⁷¹Memak, malole lenak O huku au, fo ela au alelak O nakeketum-mala.

⁷²Ba'eneu au soona, O hoholo-lalanem belin-na, lena heni basa lilopilas ma lilofulak manai daebafak-ka.

⁷³O nde makadada'dik, ma fe au lupa-aok, fe au malelak, fo au anoli O paletam-mala.

⁷⁴Hataholi kamahehelek-ka, neukose namahoko, metema nita au, nana, au amahena neu O hehelu-balataam.

⁷⁵Ou MANETUALAIN, au bubuluk, ae O nakeketum-ma, ndoos ma matetuk. O huku basa au so, nanahu O lilinekam.

⁷⁶Ela leo bee-na, O susue-lalaim, ana da'di au manakokoe-nanasing, nandaa no O hehelum neu O atam-ma.

⁷⁷Sue-lai au, fo au aso'da ahele, nanahu O hoholo-lalanem, nandaa no au daleng-nga.

⁷⁸Nemen-na fo, hataholi manakoao-ndaeaok-ka ana mae, nanahu nakamumulu-nakamamaek au so, tehu neukose, au tai-dodoo O paletam-mala.

⁷⁹Ela leo bee-na, hataholi kamahehelek-ka, ana mai leo au mai, ma basa hataholi fo, lalelak O nakanenetem-mala.

⁸⁰Ela leo bee-na, au daleng-nga, ana ta heo neme O nakanenetem-ma mai fa, fo ela au boso hapu mamaek.

⁸¹Au daleng-nga nahiik nanseli, neu so'da-molek fo manamaik neme O mai; au amahena O hehelum-ma.

⁸²Au matang-nga sota-mangu no nahani O tao matetu O hehelum-ma, au afa'da ae, “Neukose faihi'da de'i fo O kokoe-nanasi au?”

⁸³Au loung-nga kukulu, sama leo alukosu angol palaak-ka, tehu au ta afandele heni O nakeketum-ma fa.

⁸⁴Losa faihi'da, de'i fo O atam-ma, muse ta haelai namansa fa? Fa'ihi'da de'i fo, O huku hataholi manausi au-a?

⁸⁵Hataholi fo, ala ta tunga O hoholo-lalanem fa, ala kali basa bolok, fo lakahihi'ik au.

⁸⁶Basa O hoholo-lalanem lala'ena, hapu nananamahelek, tulu-fali au, nana ala usi au no ne'ek ta.

⁸⁷Isabain-na, ala hapu taolisa au, tehu au ta la'oela O paletam-ma fa.

⁸⁸Soi-tefa-mala au, nana O sue-lai mahele au, fo ela au hapu tunga O hoholo-lalanem.

⁸⁹MANETUALAIN, O dede'a-kokolam, matea-mahelek losa dodoon-na, manaketu-basa tak, losa dodoon-na nai nusa so'dak-ka.

⁹⁰O lilinekam nakatatakak neme tepo-lelek leo tepo-lelek neu, O tao matea-mahele daebafak-ka, de natea-nahele losa besak ia.

⁹¹Besak ia, basa hataholi manai ia-la, lai ia nanahu O paletam-ma, nana sila basa-basas nde bee-na, O atam-mala.

⁹²Leouni'ka, O hoholo-lalanem ta da'di leo au oemata namahokong fa soona, tao leo bee-o, mate basa au nai au doi-dosong dale so.

⁹³Losa dodoon-na, neukose au ta afandele heni O paletam-ma fa, nana no enok ndia, de O tao naso'da au.

⁹⁴Soi-tefa-mala au, nana au ia, O nuum, de au sanga basa enok, soaneu tunga O nakeketum-ma so.

⁹⁵Hataholi managaluk-ka nahani, fo ana sanga taonisa au, tehu au nau taoafik neu Ohoholo-lalanem.

⁹⁶Au ita basa, ae matetu-mandaak-ka boeo, matoo-lanek, ka'da O paletam-ma nde, matetu-mandaak.

⁹⁷Au sue-lai O hoholo-lalanem, ba'un-na seli; au dodoo-tatain, nai fai katemak esa dalen-na.

⁹⁸Au afandele O paletam-ma, tataas esa, fo ana tao-na au da'di manatee-tenok, lena heni au musung-ngala.

⁹⁹Au malelang-nga, lena heni au meseng-ngala malelan-na, nanahu au dodoo-tatai O paletam-mala.

¹⁰⁰Esa Au alelak lena heni, hataholi lasik-kala, nana au ho'u O nakeketum-mala.

¹⁰¹Au adook au aong-nga, neme ha'da-palii mangalauk lala'ena mai, fo ela au tunga O nanolim-ma.

¹⁰²Au ta afandele heni, O hoholo-lalanem fa, nana, O nde manoli au-a.

¹⁰³O dede'a-kokolam, makeek nanseli, makeen-na, lena heni fanioe-a, makeen-na!

¹⁰⁴O hoholo-lalanem, fe au malelak, nalosa au ta ahiik, ha'da-palii manatipu-daik-ka fa.

¹⁰⁵O dede'a-kokolam nde bee-na, banuk ba'eneu au ei nggangganing-nga, ma mangale'dok, fo ana tao mangale'do au enong-nga.

¹⁰⁶Hata fo, au helu basan nenik soo, neukose au tao atetun, soaneu ho'u O nakeketum fo, ndoos ma matetuk.

¹⁰⁷Ou MANETUALAIN, au doi-doso anseli, manea au so'dang-nga, nandaa no O hehelum-ma.

¹⁰⁸Ou MANETUALAIN, sipo-ma au huhule-haladoi makasing-nga, ma manoli au, O hoholo-lalanem.

¹⁰⁹Au ase'o au so'dang-nga tataas esa, tehu au ta afandele heni, O hoholo-lalanem fa.

¹¹⁰Hataholi mangalauk-ka, lona hihi'ik ba'eneu au, tehu au ta heo neme O nakeketum-ma mai fa.

¹¹¹O paletam-ma nde bee-na, au pusakang losa dodoon-na, fo ana tao namahoko au daleng-nga.

¹¹²Au tutu'u basa, tunga O nakeketum-ma, losa au maso'da mate'eng-nga.

¹¹³Au sue-lai O hoholo-lalanem, au ta ahiik hataholi fo, ana lilineka neu O, ta no dale katematuan-na fa.

¹¹⁴O nde, au manamasala'eng, ma manamasulu-mahapang, au amahena neu O hehelum-ma.

¹¹⁵Hai hataholi mangalauk-kala lemin, madook meme au mai! Au nau tunga au Manetualaing paletan-na.

¹¹⁶Matetea-mahehele au, nandaa no O hehelum-ma, fo ela au aso'da, boso po'ilotak au daleng-nga ta tesa-tama nai au namahehenang-nga dalek.

¹¹⁷Tia-to'ba au, fo ela au aso'da, ma taoafik neu O paletam-ma, tataas esa.

¹¹⁸O ta sipok hataholi fo, ana heo neme O nakeketum-ma mai, sila tipu-dain, manada'di tak.

¹¹⁹O mete basa hataholi mangalauk-kala, da'di leo kadafu dae, hu ndia de, au sue-lai O nakanenetem-mala.

¹²⁰Au dele ngge'be-ngge'be nanahu au bii-amata'u neu O, au daleng-nga dele, la'eneu O nakeketum-ma.

¹²¹Au akalala'ok basa hoholo-lalanek, ma ndoos ma matetuk-ka so, de boso fe au leo, au musu noong-nga liman neu.

¹²²Maheluk leona, mae neukose O tulu-fali au, boso po'ilotak hataholi manakoao-ndaeaok-kala tuni-ndeni au.

¹²³Au matang-nga nakete no ahani O tutulu-fafalim fo maneni maso'dak-ka, au ahani soi-po'ik fo O heluk-ka.

¹²⁴Tao au nandaa no O susue-lalaim, ma manoli au, O nakeketum-ma.

¹²⁵O atam au, de tao-ma au alelak, fo ela au alelak matalolole, O paletam-ma.

¹²⁶MANETUALAIN, fain-na losa, soaneu O tao hata esa, nana hataholi-la la'olena, O hoholo-lalanem.

¹²⁷Au sue-lai O paletam-ma, lena heni lilopilas-sa, lena heni lilopilas isik-ka.

¹²⁸Hu ndia de, au aso'da, nandaa no basa O natutu'dum-mala; au ta ahiik ha'da-paliik fo, ta matetuk-ka fa.

¹²⁹O nakanenetem-mala nde bee-na, tete'ek-ka nanadodoo doak, hu ndia de, au tungan no dale katematuak.

¹³⁰Metema nafa'da mangalele'do O nanolim-ma soona, neni mangale'dok, ma ana fe malelak neu hataholi taidaek-ka.

¹³¹Au hae kofa-kofa, nanahu au ahiik O paletam-ma.

¹³²Lepos masale leo au mai, fo sue-lai au, sama leo O sue-lai hataholi manasue-lai O-a.

¹³³Matetea-mahehele au ei nggangganing-nga, nandaa no O hehelum-ma, boso po'ilotak mangalauk-ka, koasa au.

¹³⁴Soi-po'i au neme hataholi manatuni-ndeni au mai, fo ela au hapu tunga O nakanenetem-ma.

¹³⁵Ba'e-pala au, nenik O mamaim-ma, ma manoli au, O nakeketum-ma.

¹³⁶Au luuoeng-nga faa sama leo lee-a, nanahu ta hapu hataholi tunga O hoholo-lalanem fa.

¹³⁷Ou MANETUALAIN, O ndoos ma matetuk, basa O hoholo-lalanem-mala la'en.

¹³⁸O fe paleta-la boeo, ndoos ma matetuk, ma hapu nananamahelek.

¹³⁹Au nasa-melung, ana lua ponu-ponu nai au aoinang dale, nanahu au musung-nga, nafandele heni O nanolim-ma.

¹⁴⁰O hehelum-ma, matea-mahelek, ma hapu nananamahelek, au sue-lain ba'un-na seli.

¹⁴¹Au ia, hataholi anak, ma matasi'da-matasaek, tehu au ta afandele heni O nanolim-ma fa.

¹⁴²O ndoos ma matetum-ma, nakatatakak losa dodoon-na, ma O nakeketum-ma, la'en tataas esa.

¹⁴³Makase'ek ma susa, tuni-ndeni nala au, tehu O nakeketum-ma, tao namahoko au daleng-nga.

¹⁴⁴O nakanenetem-ma, ndoos ma matetuk tataas esa; fe au malelak, fo ela au aso'da.

¹⁴⁵Au aloo bou-bou neu O, no dale katematuak; mataa au leona! Ou MANETUALAIN, nana au nau tunga O paletam-ma.

¹⁴⁶Au aloo bou-bou neu O; soi-tefa-mala au, nana au nau ho'u ahele O nakanenetem-ma.

¹⁴⁷Fafain-na, au aloo bou-bou neu O, fo au oke tutulu-fafalik; nana au amahena neu O hehelum-ma.

¹⁴⁸Au ta sungu le'odae katemak esa dalen-na fa, nana au dodoo-tatai O nanolim-ma.

¹⁴⁹Mamanene au, nanahu O susue-lalaim, ou MANETUALAIN, manea au so'dang-nga, hu kande O ndoos ma matetum-ma.

¹⁵⁰Hataholi manausi au-a, ana deka so, ala tutu'u eno mangalauk, ma ala ta taoafik neu O hoholo-lalanem fa.

¹⁵¹Tehu O deka, ou MANETUALAIN, O paletam lala'ena, la'en.

¹⁵²Neme makahulun eli mai-a, au bubuluk O nanolim-mala, nae O maketun losa dodoon-na.

¹⁵³Mete au doi-dosong, fo soi-tefa-mala au leona, nana au ta afandele heni, O hoholo-lalanem fa.

¹⁵⁴Masala'e au dede'ang-nga, fo soi-po'i au; soi-tefa-mala au, nandaa no O hehelum-ma.

¹⁵⁵Neukose hataholi mangalauk-ka, nanasoi-tefa tak, nanahu ana ta tunga O nakeketum-ma fa.

¹⁵⁶Ou MANETUALAIN, tete'ek-ka, O dale kasiam-ma, ba'un-na seli, soi-tefa-mala au, nandaa no O ndoos ma matetum-ma.

¹⁵⁷Hataholi makadotok, ala musu ma ala usi au, tehu au ta afandele heni, O nakanenetem-ma fa.

¹⁵⁸Au ta ahiik mete malelesik sila-la fa, nana, ala ta tunga O nanolim-ma fa.

¹⁵⁹Mete leona, te au sue-lai-a, O paletam-ma ba'un-na seli, ou Manetualain, soi-tefa-mala au, nanahu O susue-lalaim.

¹⁶⁰Basa O dede'a-kokolam-mala, la'en, O hoholo-lalanem, fo ndoos ma matetuk lala'ena, nahele losa dodoon-na.

¹⁶¹Hataholi manakoasa-la, usi au no ne'ek ta, tehu au bii-amata'uk-ka, ka'da nde O hoholo-lalanem.

¹⁶²O hehelum-ma, ana tao namahoko au, sama leo, hataholi esa hapu hata-heto.

¹⁶³Au ta ahiik basa pepekok lala'ena fa, tehu au sue-lai O hoholo-lalanem.

¹⁶⁴Au oke makasi nakandondoo henin neu O, nanahu, O hoholo-lalanem fo, ndoos ma matetuk-ka.

¹⁶⁵Hataholi manasue-lai O hoholo-lalanem-ma, nee-nee lino-linok ma tetu-temak, ma ta hapu hata napanggengge fas.

¹⁶⁶Au ahani so'da-molek-ka, neme O mai, ou MANETUALAIN, au akalala'ok O paletam-mala.

¹⁶⁷Au tunga O nakanenetem-mala, ma au sue-lain no dale katematuak.

¹⁶⁸Au tunga O paletam-ma, ma O natutu'dum-ma, nana O mita au tatao-nono'ing lala'ena.

¹⁶⁹Ou MANETUALAIN, ela leo bee-na, au hala naloloong-nga losa O, fo fe au malelak, nandaa no O hehelum-ma.

¹⁷⁰Nemen-na fo, au dokodoeng-nga losa O, fo soi-tefa-mala au, nandaa no O hehelum-ma.

¹⁷¹Au nau koa-kio O, tataas esa, nana O manoli au, O nakeketum-ma.

¹⁷²Au hii akamee la'eneu O hehelum-ma, nana O paletam lala'ena, ndoos ma matetuk.

¹⁷³Ela leo bee-na, O nau tulu-fali au tataas esa, nana au hele basa, soaneu tunga O nakanenetem-ma.

¹⁷⁴Au daleng-nga nahik sodak-molek neme O mai, O paletam-ma taonamahoko au daleng-nga.

¹⁷⁵Ela au aso'da, fo au koa-kio O nadema; ma O nakeketum ala tulu-fali la au.

¹⁷⁶Au atofa-asalak leo bi'i lopo manamopokka, de mai fo sanga-ma O atam ia, Hukande au ta la'o ela O paleta ma fa.