Read Termanu MAZMUR 135 Bible Online

MAZMUR 135 - Termanu bible

MAZMUR 135

¹Koa-kio MANETUALAIN leona! Koa-kio MANETUALAIN na'den-na, hai emi fo ata-atan

²fo manamalalau-maoono nai MANETUALAIN Uman, fo nai ita Manetualain, mamana leleon-na.

³Koa-kio MANETUALAIN leona, nana Ndia malole, koa-kio na'den-na, nana Ndia dale malole.

⁴Ana hele Yakob ba'eneu Ndia, ma Ana tao hataholi Israel-la, da'di Ndia nuun.

⁵Nana au bubuluk, MANETUALAIN tete'ek-ka matuaina. Ndia matuaina, lena heni basa lamatua daebafak lala'ena.

⁶Ana tao hata fo, nahiik-kana, nai lalai ma daebafak-ka, nai tasi ma nai tasi maloaina madema.

⁷Ana fe ko'as-sa mai, neme daebafak-ka pe'dan-na mai, ma Ana tao ndelas-sa, soaneu u'dan-na Boema Ana paleta anin-na, fo daenga ana kalua neme, mamana pepe'dan-na mai.

⁸Nai Masir, Ana taonisa basa ana uluk-kala, mulai neme hataholi daebafak-ka, losa bana-manu.

⁹Nai naa, Ana tao manada'di beuk, ma ta'du-tana makadotok, fo huku manek-ka no basa hataholi mana'a ngga'din-nala.

¹⁰Ana tao namopo-namate, leoina makadotok, ma Ana taonisa mane-manek mabe'i-bakalaik-kala fo nde:

¹¹Sihon, fo mane Amori, ma Og, fo mane Basan-na, boema, basa mane-manek manai Kanaan-nala.

¹²Boema, Ana fe nusak sila-la leo Anan Israel neu, fo ala taon da'di sila pusakan.

¹³Ou MANETUALAIN, neukose O nanatui-bengak nahelek, ma basa tititi-nonosik-kala, lafandendelek O na'dem-ma,

¹⁴nana, O fe ndoos ma matetuk-ka neu O anam-mala, ma O sue-lai O atam-mala.

¹⁵ Sla sosongo-tatangon nanataok neme lilopilas ma lilofulak-ka, hataholi daebafak-ka nde tao-sala.

¹⁶Sosongo-tatangok sila-la, nabafak-kala, tehu ala ta hapu kokolak fa, mamatak-kala, tehu ala ta hapu lita fa.

¹⁷Madi'idook-kala, tehu ala ta hapu lamanene fa, ani hahaek ta kalua neme bafan-na mai fa.

¹⁸Ela leo bee-na, hataholi manataok-kala, ma hataholi fo lamahele neun-na, ua-nalen-nala leondiak boe.

¹⁹Hai hataholi Israel-la lemin, koa-kio MANETUALAIN leona! Hai Manetualain imam-mala lemin, koa-kion leona!

²⁰Hai hataholi Lewi-la lemin, koa-kio MANETUALAIN leona! Basa emi fo, hataholi kamahehelek-kala, koa-kion leona!

²¹Koa-kio MANETUALAIN nai Sion, ma nai Yerusalem, fo mamana leleon-na. Koa-kio MANETUALAIN leona!