Read Termanu MAZMUR 139 Bible Online

MAZMUR 139 - Termanu bible

MAZMUR 139

¹Soaneu mauli-malanga nakameek-ka. Dauk Kokoa-kikiok. Ou MANETUALAIN, O bubuluk besa-besa moo au, ma O malelak au.

²O bubuluk au tatao-nono'ing lala'ena; O malelak au dudu'a-aafing, neme dook-ka mai.

³O mita au nau au nai ue-le'dis dale, do au hahaeaong boe, O bubuluk basa hata fo, au tao-no'in.

⁴Nakalenak, au beita kokolak fa te, O bubuluk basa hata fo, au sanga kokolak-kana so.

⁵O okofefeo-ma au, neme mamanak lala'ena mai, de O masulu-mahapa au, nenik O koasam-ma.

⁶Deman-na seli ba'eneu au, la'eneu O malelam ndia, au dudu'a-aafing, ta losa fan.

⁷Au u leo bee u, fo ela au ala O koasam-ma deak? Au alai leo be fo ela au dok ka neme O mata ma mai?

⁸Metema au kae leo lalai u, O nai naa, metema au sungu nai bolo mamates dale, O nai naa boe.

⁹Metema au laa seli heni dulufula, do au leo nai pe'dak muli, fo doon-na seli,

¹⁰O tulu-fali au, nai naa boe; O limam-ma hela-nole au, nai naa boe.

¹¹Metema au oke, fo ela makiu-makahatuk-ka poti-na au, fo mangale'dok manai au boboa-kaisung-nga, da'di le'odaek,

¹²soona makiu-makahatuk ndia boeo, ta da'di makiu-kahatuk ba'eneu O fa; le'odaek ndia mangale'dok, sama leo lele'dok-ka, ma makiu-makahatuk ndia, sama leo mangale'dok-ka.

¹³O makadada'dik au aopaang-nga lala'ena, ma O fe au lupa-aok, nai au inang ein dale.

¹⁴Au koa-kio O, nana au anseli! O tatao-nono'im lala'ena, mata beuk, ma dodoo doak-kana, te'e-te'e, au ame'da itan.

¹⁵Lelek au duing-ngala nananakadada'dik, nananakatoto'dok no malole, nai au inang tein dale, de au moli-da'di nai ndia, no nafufunik, tehu au ta nananafunik ba'eneu O fa.

¹⁶O mita au, nai lelek au bei nai au inang tein dale; basa-basan nanasulak nai O susulam dale; fain-nala nananaketu basak, nai lelek esa boeo, beita mulai fa.

¹⁷O dudu'a-aafim tean-na seli ba'eneu au, ou Manetualain, ma dede'un-na, makadotok nanseli!

¹⁸Metema au leken soona, de'u lena solokaek-ka; metema au fo'a, au bei dudu'a-dodoo la'eneu O.

¹⁹Ou Manetualain, ela bee-na O tao mamopo-mamate hataholi mangalauk-ka, madook basa kanisak-kala, neme au mai!

²⁰Ala kokolak dede'a mangalauk la'eneu O, ma ala soo pepekok linik O kotam-mala na'den-nala.

²¹Ou MANETUALAIN, au ta ahiik hataholi fo, ala ta lahiik O fa, au daleng-nga, ta tesa-tama la'eneu hataholi fo, ana la'ban O!

²²Au ta ahiik-kasa nanseli fa, ma au metes da'di leo musu.

²³Palisak matalolole au, ou Manetualain, ma mete besa-besa mo au daleng-nga, fola au, fo bubuluk au dudu'a-aafing.

²⁴Mete te, fafa'kama hapu mangalauk nai au so'dang-nga dalek, fo hela-nole au leo enok manaketu-basa taak-ka neu.