Read Termanu MAZMUR 144 Bible Online

MAZMUR 144 - Termanu bible

MAZMUR 144

¹Dauk Kokoa-kikiok. Koa-kio MANETUALAIN, fo au manamasulu-mahapang-nga! Ana nanoli au nahotek, ma natee-natatik-ka.

²Ana da'di au mamana nasulu-nahapang, ma mamanak fo au akatatakak, au kota musung, ma au manasoi-manatefang, Au babaa fanang, ma au mamana masulu-mahapang, fo Ana fe leoina-la lakatele nai au koasang dae.

³ MANETUALAIN, hataholi daebafak-ka, beek ndia, nalosa O taoafik neun? See ndia de O mete-makanaen?

⁴Hataholi daebafak ndia, sama leo ani hahaek esa, sama leo salaok, fo mopok-kana, soona, hataholi daebafak-ka, so'dan-na leondiak.

⁵Ou MANETUALAIN, soiheni O lalaim-ma, fo kona leona, fo koila'e letek-kala, fo ela lamasu.

⁶Tapa O mandelam-ma mai, fo ela musu-a tapasasala, po'i O kokou isim-ma mai, fo ela ala lakalupu.

⁷Look O limam-ma, neme nusa so'dak-ka mai, fo soi-po'i au neme faa mai. Soi-tefa-mala au, neme hataholi nusa dea koasan-na,

⁸hataholi nusa deaf o, ala hii lasapepeko-lasandandali ma tipu-dai, ma ala soo pepekok.

⁹Ou Manetualain, neukose au akamee nakamee beuk ba'eneu O, ma au akaminak kecapi no nakameek.

¹⁰O fe manek-kala sesengik, ma O soi-po'i O atam Dauk.

¹¹Fe au ala hataholi ha'da hataholi tak-kala, tafainan-nala deak; soi-tefa-mala au neme hataholi nusa dea-la koasan-na mai, hataholi nusa dea fo, ala hii lasapepeko-lasandandali ma tipu-dai, ma soo pepekok.

¹²Ela leo bee-na, ita anatoun-nala, nai lelek muli-solun-nala, sama leo bubu'u-palusa fo namatua. Ela leo bee-na, ita anainan-nala, sama leo dii bu'uk-kala, fo ala painote uma manek-ka dii bu'un-nala.

¹³Ela leo bee-na, ita gudang-ngala henuk no nana'a-nininuk. Ela leo bee-na, bi'ilopo manai ita moon-nala ala bongi, fo anan-nala losa lifu-lifun.

¹⁴Ela leo bee-na, ita sapin-nala, boetai lamade'u, ma ta hapu mopo do kalaheni fa. Ela leo bee-na, ta tamanene hoo-nggu'u doidosok nai ita kotan-na, enon-nala fa.

¹⁵Maua-manalek ba'eneu leoina leondiak-ka, maua-manalek ba'eneu hataholi fo, Aman nde MANETUALAIN!