Read Termanu MAZMUR 146 Bible Online

MAZMUR 146 - Termanu bible

MAZMUR 146

¹Koa-kio MANETUALAIN leona! Hai au samaneng-ngonei, koa-kio MANETUALAIN leona!

²Au nau koa-kio MANETUALAIN nai au fai maso'dang-nga dalek, ma au akamee ba'eneu au Manetualaing beidai au bei aso'da ia.

³Boso mamahena neu manakoasa daebafak, ma neu hataholi daebafak fo, ana ta hapu soi-tefa fa.

⁴Metema, mates soona, ala fali leo dae-a leu; faik ndia boe, sila dale tutun-nala mopok-kana.

⁵Maua-manalek ba'eneu hataholi fo, nasalai dean-na neu Amak fo, ndia MANETUALAIN-na, ma neu Yakob Manetualain, da'di leo ndia manatulu-manafalin.

⁶ Ndia nde nakadada'dik lalai no daebafak-ka, ma tasi no oe-isin lala'ena,; Ana lilineka losa dodoon-na.

⁷Ana nasala'e hataholi nanatuni-ndenik-ka hak-ka, ma Ana fe hataholi kamala'ak-ka, na'a. MANETUALAIN soi-po'i, basa hataholi nanahukuk-kala,

⁸ma Ana tao-na hataholi pokek-kala lita, Ana hela nafofo'a hataholi manatu'uk-ka, ma Ana sue-lai hataholi manatao tunga ndoon-na.

⁹Ana nasulu-nahapa hataholi nusa dea-la; Ana tulu-fali basa faluina anamaak-kala, tehu Ana tao-na, hataholi mangalauk-ka dale tutu'un-na, manada'di tak.

¹⁰MANETUALAIN ndia, Manek losa dodoon-na. Hai Sion, o Manetualaim-ma, Ana koasa neme bobongik leo bobongik neu. Koa-kio MANETUALAIN leona!