Read Termanu MAZMUR 148 Bible Online

MAZMUR 148 - Termanu bible

MAZMUR 148

¹Koa-kio MANETUALAIN leona! Koa-kio MANETUALAIN, hai nusa so'dak-ka, isin-nala lemin! Basa manaleo lai mamana madema, koa-kion leona!

²Koa-kion leon, hai basa ata nusa so'dak-kala, koa-kion leon, hai solda'du nusa so'dak lala'ena!

³Koa-kion leon, hai le'do ma bulak-ka,, koa-kion leon, hai nduuk fo, mangale'dok-kala lemin!

⁴Koa-kion leon, hai lalai fo mademaina, koa-kion leon, hai oe manai lalai lain!

⁵Malole lenak, sila basa-basas koa-kio MANETUALAIN na'den-na, nana basa-basas nananakadada'dik nenik paletan-na.

⁶Ana naketu esa-esak mamanan-na, de nakeketun-na nanapakek, losa dodoon-na.

⁷Koa-kion leon, hai daebafak-ka oe-isin, hai buta tasi-la, ma tasi maloaina;

⁸hai ndelas ma u'da eis, salju ma ko'as-sa, anin matuaina, fo ana tunga MANETUALAIN paletan-na lemin!

⁹Koa-kion leon, hai pupukuk-kala, ma letek-kala, ai maboak-kala, ma basa nula-la;

¹⁰basa bana-manu ma bana fuik-kala, basa bana manalo'do-malalaek ma maupui lala'ena lemin!

¹¹Koa-kion leon, hai mane-manek-kala, ma basa nggieo-bobongik lala'ena, basa manefetoana, ma basa manakoasa-la;

¹²basa ta'eanak anafe'oanak, lasi mulik.

¹³Malole lenak, sila basa-basas koa-kio MANETUALAIN na'den-na, nana na'den-na, matua-madema lena heni basa na'dek lala'ena; matua-mademan, dema lena lalai ma daebafak-ka.

¹⁴Ana tao natetea-nahehele leoinan so, de nalosa, anan susuen Israel koa-kion. Koa-kio MANETUALAIN leona!