Read Termanu MAZMUR 17 Bible Online

MAZMUR 17 - Termanu bible

MAZMUR 17

¹Dauk huhule-haladoin. Mamanene au hala naloloong fo, dokodoe ndoos ma matetuk-ka, taoafik neu au huhule-haladoing fo neme au dale ndoong-nga mai, ou MANETUALAIN.

²Sa'di leo been-na, masala'e au dede'ang-nga nana O bubuluk hata fo ndoos-sa.

³Meteme O fola au daleng-nga ma O mai palisak besa-besa mo au nai fai le'odaen-na soona, neukose O hapum-ma, au daleng-nga ndoos ma matetuk; au hala-kokolang sama leo au dudu'a-aafing.

⁴Au tao hata fo, O paletan ma au ta tao tunga, eno naseti-nalakak-ka fa.

⁵Au aso'da tataas esa, tunga O natutu'dum-ma ma au ta singo heni fan.

⁶Au aloo bou-bou neu O, ou Manetualain, nana O mataa au; taoafik neu au ma mamanene au hala-kokolang.

⁷Matu'du O susue-lalaim fo, matua-mademam-ma nana O soi-tefa-ma, hataholi fo nasulu-nahapa neu O, Nai O boboam-ma, ala hapu nee-nee lino-linok, neme musu-a mamain-na.

⁸Makaboboi au, sama leo O mata de'em-ma, mafuni au, nai O li'da masulu-mahapam-ma dalek

⁹neme hataholi mangalauk-ka mamain-na. Musu fo, ana nau taonisa au-a, nakahapi-na au;

¹⁰ala ta lanuu dale kasian fa de ala kokolak no koao-ndaeaok.

¹¹Ala tutulumatak, de ala la'ban au, ma lakamomotu-la au, ala sanga fai loak, soaneu ala bala labuu au.

¹²Sila sama leo singa fo, ana sanga kaa nana'an-na, singa muli-soluk, fo nahani nai mamana mafunik.

¹³Fo'a leon, ou MANETUALAIN, la'ban au musung-ngala, fo tao makalas leon-na. Soi-tefa-mala au, nenik O tafainam-ma, neme hataholi mangalauk-kala mamain-na

¹⁴Soi-po'i au neme hataholi-hataholi, fo manamakaduduluk hata-heto nai daebafak-ka. Hukus nenik susa-soe fo O sadia basan soaneus so. Nemen-na fo, huku sila upu-anan-nala boe.

¹⁵Tehu neukose au mete O, nanahu au salang ta. Nai lelek au fo'a, O mamaim-ma, tao namahoko au daleng-nga