Read Termanu MAZMUR 20 Bible Online

MAZMUR 20 - Termanu bible

MAZMUR 20

¹Soaneu mauli-malanga nakameek-ka. Dauk kokoa-kikiok.

²Ela leo been-na, MANETUALAIN nataa o, nai lelek o nai fai to'a-taak-ka dalek, ela leo been-na, Yakob Manetualain-na koasan-na, nasulu-nahapa o!

³Ela leo been-na, Ana haitua manatulu-fali neme Uman-na mai, ma Ana fe tutulu-fafalik neme Pupuku Sion-na mai.

⁴Ela leo been-na, Ana nafandendelek basa o tunu-hotum, ma namahoko nenik basa o tutunu-hohotu nanatunum lala'ena.

⁵Ela leo been-na, Ana fe o, basa hata lala'en fo o mahiik-kana, ma Ana fe o dale tutu'um lala'ena, leni buna-boak.

⁶Boema ami eeki-matadale nanahu o sesengim-ma, ma ami so'uk dedeo-la, soaneu koa-kio ita Manetualain. Ela leo been-na MANETUALAIN sipok basa o nonokem lala'ena.

⁷Besak ia, au bubuluk, ae MANETUALAIN fe sesengik neu manek fo, Ana helek-ka. MANETUALAIN nataan neme nusa so'dan fo malalao-malalafun-na mai; no MANETUALAIN koasan-na, de ana hapu sesengik matuaina.

⁸Hapu hataholi fo nasalai dean-na neu kaleta musun-nala, ma hapu nggelok lasalai dean-na neu ndalan-na. Tehu ita tasalai ita dean-na neu Amak fo ita MANETUALAIN-na koasan-na.

⁹Neukose ala lakatunu, fo ala tu'u leu, tehu neukose ita fo'a, fo tapadeik tatetu.

¹⁰Ou MANETUALAIN, fe sesengik neu manek-ka, mataa ami nai lelek ami maloo bou-bou.