Read Termanu MAZMUR 24 Bible Online

MAZMUR 24 - Termanu bible

MAZMUR 24

¹ Dauk kokoa-kikion-na. MANETUALAIN nde nuun daebafak-ka no oe-isin, daebafak-ka no basa hata-hata manaleo manai dalek-kala.

²Nakatetene daebafak-ka buin-na neu tasi maloaina lain, ma Ana fen napadeik natetu nai oe mademaina lain.

³See kande, ana bole kae leo MANETUALAIN Pupukun lain neu ma neu leo Uman dale neu?

⁴ Hataholi fo dudu'a-aafin ma tatao-nono'in fo ta nasala fa, ma ana ta soo-supa pepekok, ma ana ta sene-do'ok neu sosongo-tatangok fa.

⁵Hataholi ndia nde, neukose MANETUALAIN ba'e-palan ma soi-tefan, ma Manetualain nafa'da nae, hataholi ndia salan ta.

⁶Leondiak hataholi fo ana mai leo Manetualain mai, ma hataholi fo ana mai sene-do'ok neu Yakob Manetualain-na.

⁷Soi mamaloa lelesuina palaak dooinak-ka, fo ela Manek mandela-masa'ak-ka Ana masok.

⁸See kande, Manek mandela-masa'ak ndia? Ndia nde MANETUALAIN fo palani ta'ti batu; MANETUALAIN fo henuk no koasa, fo palani ta'ti batu nai natee-natatik-ka dale.

⁹Soi mamaloa lelesuina palaak dooinak-ka, fo ela Manek mandela-masa'ak-ka Ana masok.

¹⁰See kande, Manek Mandela-masa'ak ndia? MANETUALAIN Fo Manakoasa Ndia nde Manek fo mandela-masa'ak!